<2 Corintios - Corinto markacho taq yärakuq mayinkunaman apóstol Pablo qepa kaq cartata cartakushqan 4

[1] Tayta Dios kuyapäyämashpan wilakuyninta wilakuyänäpaq churayämash kaptinmi conträ sharkuyaptinpis lakikuyäsu.

[2] Noqakuna manami imatapis lutankunata ni penqakuypaq kaqkunata rurayäsu. Manami pitapis engañaykäyäsu ni Tayta Diospa wilakuyninman ituykasilar kikïkunapa yarpaynïkunata yapayäsu. Saypa trukanqa wilakuyninta pïmaypis musyayänanpaqmi Tayta Dios munashqanno kawayä.

[3] Sayno kaptinpis infiernuman qaykush kayänanpaq kaqkunaqa wilakuyashqäta manami chaskikuyansu.

[4] Sayno chaskikuyansu kay pasacho kaykaq dios yarpayninkunata upatakäsish kaptinmi. Saymi Jesucristupa wilakuynin aksino kaykaptinpis paykunaqa mana rikaqno kar say wilakuyninta tantiyayansu. Jesucristuchömi Tayta Dios imano kashqantapis tantiyansi.

[5] Manami noqakunapa munaynïcho kawayänaykipaqsu wilakuyä, sinöqa Señor Jesucristupa munaynincho kawayänaykipaqmi. Noqakunaqa Jesucristuta sirvir qamkunapa ashmaynikinölami kaykäyä.

[6] Sayno kaykäyä chipipiykaq aksitano ali wilakuyninta shonqükunaman Tayta Dios churamush kaptinmi. Sayno churamush kay pasata kamar sakaycho asikyay kananpaq nishqannölami. Saymi Tayta Dios imano kashqantapis Jesucristucho shumaq tantiyaykäyä.

[7] Say ali wilakuyqa shonqükunacho kaykan mitu mankacho seqaypa väliq riquëza kaykaqnömi. Noqakuna mitu mankanöla karmi kikïkunapa podernïkunawansu wilakuyä, sinöqa Tayta Diospa poderninwanmi.

[8] Saymi imano nakasiyämaptinpis mana ajayaypa wilakuykäyä. Ima rurayta mana kamäpakurpis manami aläpaqa lakikuyäsu.

[9] Chikiyämaptinpis Tayta Dios manami kachariyämansu. Conträ sharkuyaptinpis Dioslamanmi imaypis yärakuykäyä.

[10] Maypa aywayaptïpis Jesucristo nakashqanno nakayashqätami runakuna rikayäman. Payta cäsukurmi wanuymanpis cäsi cäsi chäyä. Saynöpami runakuna tantiyayan wanuypita salvamänanpaq Jesucristo munayyuq kashqanta.

[11] Jesucristupa wilakuyninta wilakushqäpita wanusiyämayta munayaptinpis Jesucristo noqakunawan kawaykashqanmi musyakaykan.

[12] Saymi wanuy tumapäyämaptinpis mana ushakaq kawayta tariyänayki rayku wilakuykäyä.

[13] Tayta Diospa palabrancho kayno nirmi qelqaraykan: “Payman yärakurmi wilakushkä”. Say qelqaraykashqannölami noqakunapis Tayta Diosman yärakur wilakuyninta wilakuykäyä.

[14] Payman yärakurmi musyansi Señor Jesucristuta kawarisimushqanno kawarirkasimashpansi nawpanman pushamänansipaq kashqanta.

[15] Saymi imano nakarpis salvakuyänaykipaq wilakuyä. Saynöpami wakin runakunatapis Tayta Dios kuyapar salvaptin maysaychöpis payta agradëcikur alabayanqa.

[16] Saymi Tayta Diospa wilakuyninta mana ajayaypa wilakuyä. Awkinyash cuerpunsi lasaptinpis shonqunsichöqa waran waran mas maqtanömi kaykansi.

[17] Kay pasacho kashqansiyaqla nakarpis gloriacho imayyaqpis kawanansipaqmi kamarikuykansi. Say kawaymanqa manami imapis kay pasacho kaqkuna tinkunsu.

[18] Manami kay pasacho kawanalansipaqsu yarpachakunsi, sinöqa gloriacho kawanansipaqmi. Kay pasacho kawayqa ushakaqlami kaykan. Gloriacho kawaymi isanqa mana ushakaq kaykan.