<2 Corintios - Corinto markacho taq yärakuq mayinkunaman apóstol Pablo qepa kaq cartata cartakushqan 12

[1] Alabakushqäwan imata mana jorqurpis kanan wilayäshayki Señor Jesucristo revelacionkunata rikasimashqanta.

[2] Jesucristuman yärakuq reqishqä runatami chunka chusku wata qepatana kimsa kaq ciëluman Tayta Dios aparqan. Isanqa manami musyäsu cuerpuntin aywashqanta o jaynilan aywashqantapis. Saytaqa Tayta Dioslami musyan.

[3] Cuerpuntin aywashqanta o almalan aywashqanta Tayta Diosla musyaptinpis

[4] paraísuman apashqantami musyaykä. Saychömi pipis mana wiyashqankunata wiyarqan. Say wiyashqankunataqa imano tantiyasiytapis manami kamäpakunsu.

[5] Say runa jana pasaman chashqanpita alabämanmi. Kikïmi isanqa alabakushaqsu, sinöqa munayniynaq kashlätami wilayäshayki.

[6] Alabakuyta munarqa rasun kaqtami alabaküman. Sayno kaptinpis santuna kashqäta runakuna yarpäyänanta mana munarmi alabaküsu. Manami alabakushqäta wiyarsu pipis ali runa kashqäta yarpanman, sinöqa imano kawashqätapis rikar y imata parlashqätapis wiyarmi.

[7] Jana pasacho rikashqäkunapita mana alabakunäpaqmi Tayta Dios kamakäsish fiyupa nakanäpaq. Say nakayqa cuerpücho kasha jatiraykaqnömi kaykan. Kikin Satanás kachamushqan nakaynöraqmi fiyupa nakasiman.

[8] Say nakaypita jorqamänanpaqmi Señorninsita kimsa kuti manakurqä.

[9] Manakuptïmi nimarqan: “Kuyashläwan contentakuy. Sayno nakar fuerzaynaq kaptikiraqmi munaynïwan yanapäshayki”. Sayno nimaptinmi say nakaywan nakar fuerzaynaq karpis kushikü. Fuerzaynaq kaptïraqmi Jesucristo yanapaykäman.

[10] Saymi qeshyarpis, ashliyämaptinpis, pishïpakurpis, chikiyämaptinpis y imano nakarpis Jesucristuta sirvir lakiküsu. Fuerzaynaq karpis fuertimi rikakü.

[11] Löcuno alabakur parlanäpaqqa kikikikunami ashipäyämashkanki. Alabakunäpa trukanqa qamkunami alabayämankiman karqan. Kikiläpita imatapis rurayta mana kamäpakurpis say apóstol tukuqkunapitaqa mas aliraqmi kä.

[12] Apóstol kashqäta tantiyakuyänaykipaqmi qamkuna kaqcho nakarpis admiraypaq milagrukunata y señalkunatapis rurarqä.

[13] Isanqa wakin markakunacho gastükunapaq wawqi panikunata manakushqänöqa qamkunata manami manakushkäsu. ¿Imanirtaq saypita jaqayash kaykäyanki? ¿Mana manakushqäsuraq jusä kash?

[14] Kamarikushnami kaykä qamkuna kaqman yapay shamunäpaq. Kananwanqa kimsa kutinami shamushaq. Manami kikïpaq imatapis ashirsu qamkunaman shamushaq, sinöqa qamkunata kuyapar yanapänäpaqmi. Musyashqansinöpis manami pï taytapis wamrankunata manakunsu, saypa trukanqa yanapanmi.

[15] Saynölami noqapis qamkunata manakunäpa trukanqa imäkunatapis ushashaq y qamkuna rayku wanunäpaqpis listu kaykä. Lapan shonqüwan qamkunata kuyapar yanapaykaptï ¿imanirtaq noqapita jukniraqyash kaykäyanki?

[16] Musyayashqaykinöpis manami mayqaykipa umaykitapis nanäsishkäsu. Sayno kaptinpis wakinnikishi nikäyanki muchuqkunapaq niq tumpala kikïkunapaq qellayta shuntaykäsiyashqäta.

[17] ¿Imanirtaq sayno yarpaykäyanki? Tantiyakuyay. ¿Imaylaqa qamkunaman kachamushqä wawqikuna mayqalanpis engañayäshurqaykiku?

[18] Juk wawqitawan Tituta qamkuna kaqman kachamuptï manami imatapis sakyayäshushkankisu. Tito mana sakyapakuq kashqannömi noqapis sakyapaküsu. Paywanqa say yarpaylami kaykäyä.

[19] Kay cartata apasiyämushqäta liyir capaz yarpäyanki sapakuyänaläpaq qelqayämushqäta. Kuyay wawqi panikuna, manami sapakuyänäpaqsu qelqaykämü, sinöqa tantiyakuyashpayki Tayta Dios munashqanno kawayänaykipaqmi. Jesucristuta sirviq karmi Tayta Diospa nawpancho qamkunata yäsikä.

[20] Qamkuna kaqman shamur lutanta ruraykäyaqta tarinäpaq kaqtami lakikü. Saynöpis lakikü sayno kaykaqta tarir qamkunata olqutupänäpaq kashqantami. Capazchir qamkunata tarïman rimanakuykäyaqta, chikinakuykäyaqta, rabyäsinakuykäyaqta, jukpa washanta rimaykäyaqta, jamuränakuykäyaqta, rabyapänakuykäyaqta, runa tukuykäyaqta y mana alikunata ruraykäyaqta.

[21] Capazchir melanaypaq kaqkunata, fornicación jusata y chïnäkur waynäkur puriykäyashqaykita kachariyashkankisu. Jusalikuykaqta tarir qamkunapita Tayta Diospa nawpancho penqakunäpaq kaqpitami lakikü.