<2 Corintios - Corinto markacho taq yärakuq mayinkunaman apóstol Pablo qepa kaq cartata cartakushqan 1

[1] Corinto markacho y Acaya provinciacho kaykaq yärakuq mayïkuna: Tayta Dios akramash kaptin Jesucristupa apostolnin karmi noqa Pablo wawqinsi Timoteuwan kay cartata cartakaykäyämü.

[2] Papäninsi Tayta Dios y Señor Jesucristo kuyapäyäshushpayki ali kawayänaykipaq yanapaykuyäläshunki.

[3] ¡Señor Jesucristupa Papänin Tayta Dios alabash kaykuläsun! Paymi kuyapämansi y imaypis shakyäsimansi.

[4] Ima nakaycho kashqapis shakyäsimansi noqansipis yärakuq mayinsikuna nakayaptin shakyäsinansipaq. Saymi Tayta Dios shakyäsimashqansino wakinkunatapis shakyäsinsi.

[5] Noqakunatapis Jesucristuman yärakuyashqäpita runakuna nakasiyämaptin Jesucristuwanmi Tayta Dios shakyaykäsiyäman mana ajayaypa payman yärakuyänäpaq.

[6] Sayno shakyäsiyämaptinmi shumaq tantiyayä qamkunatapis shakyäsiyänäpaq kashqanta. Saynöpami nakayaptïpis salvacionta chaskikur kushikuyanki. Saymi noqakuna nakayashqäno nakarpis Tayta Diosman mana ajayaypa yärakuyanki.

[7] Musyayämi noqakunano nakayaptikipis noqakunatano Tayta Dios yanapäyäshunaykipaq kashqanta.

[8] Wawqi panikuna, Asia provinciacho runakuna fiyupami nakasiyämash. Sayjinanpa nakasiyämaptin mana awantar kawayänäpaq kashqantapis manami yarpäyarqänasu.

[9] Wanusiyämänanpaq kashqanta yarparmi tantiyakuyarqä kikiläkunapitaqa imatapis mana kamäpakuyashqäta. Saynöpami yachakuyarqä wanuqkunata kawarisimuq Tayta Diosman mas yärakuyta.

[10] Wanusiyämänanpaq kashqanta yarpäyaptïpis Tayta Diosmi salvayämash. Manami saylachösu yanapäyämash, sinöqa imaypis yanapaykäyämanmi.

[11] Tayta Diosta noqakunapaq manakuyashpayki qamkunapis yanapaykäyämankimi. Sayno askaq manakuyaptinmi payta askaq agradëcikuyanqa.

[12] Qamkunata ni wakintapis mana lulapaypa y mana engañaypami kawaykäyä. Rasunpaypa sayno kayashqäta mana penqakuypami niyä. Sayno ali kawayänäpaq Tayta Diosmi imachöpis yanapaykäyäman.

[13] Cartakayämushqächöpis mana tumasipaylapami tantiyayänaykipaq kaqlata qelqayämushkä. Ojalä imaylapis shumaq tantiyanakushwan.

[14] Kanan mana tantiyayämaptikipis Señor Jesucristo kutimuptin noqakuna qamkunapita kushikuyashqänömi qamkunapis noqakunapita kushikuyankipaq.

[15] Shumaq tantiyayämänaykipaq kashqanta yarparmi Macedonia provinciapa shamur qamkuna kaqman puntata chämuyta yarpäyarqä. Yarpäyashqäno kamakaptinqa qamkuna kaqman ishkay kutinami chäyämüman karqan.

[16] Puntataqa Macedonia provinciapa päsaqnölami chämuyta yarpäyarqä. Kutimurpis yapay chämuytami yarpäyarqä. Qamkuna kaqman chäyämuptï Judeamanna aywayänäpaq yanapäyämänaykitami munayarqä.

[17] Chäyämunäpaq yarpash kayaptïpis manami yarpäyashqänösu kamakash. Wilakasimushqäno mana shayämushqäpita ¿imanirtaq wakinniki nikäyanki shumaq mana yarpachakuypa wilakasimushqäta? ¿Imanirtaq yarpäyanki awniparkurpis mana shayämunäpaq kashqanta?

[18] Mana cumpliyänäpaq kashqanta musyarqa noqakuna imaypis manami promitiyäsu.

[19] Tayta Diospa Surin Jesucristupis kay pasacho kar rasun kaqlatami pïmaytapis nirqan. Paypa wilakuynintami Silvanupis, Timoteupis y noqapis qamkuna kaqcho wilakuyashkä.

[20] Jesucristuta kachamurmi Tayta Dios lapan promitishqankunata cumpliykan. Saymi Jesucristuman yärakur Tayta Diosta alabashpansi “¡Amén!” ninsi.

[21] Payta sirvinansipaq churamashpansi Jesucristuman mana ajayaypa yärakunansipaqmi yanapämansi.

[22] Saynöpis shonqunsicho kananpaq Espíritu Santuta kachamurmi paylapana kanansipaq sëllamashkansi. Espíritu Santuta chaskikurmi musyansi Tayta Dios lapan promitimashqansita cumplinanpaq kashqanta.

[23] Wawqi panikuna, Tayta Diospa jutinchömi rasun kaqta nï: Shamuyta yarparpis qamkunawan jaqayäsinakuyta mana munarmi shamushkäraqsu.

[24] Qamkunata mandar jaqayäsiyänäpa trukanqa qamkunawan juntu Tayta Diosta sirviytami munayä. Saynöpami Tayta Diosman yärakur qamkunapis kushish kawayanki.