<2 Corintios - Corinto markacho taq yärakuq mayinkunaman apóstol Pablo qepa kaq cartata cartakushqan 13

[1] Kananwanqa kimsa kutinami qamkunaman watukaq shamushaq. Tayta Diospa palabrancho kayno qelqaraykashqanta yarpäyay: “Ishkay o kimsa testïgukuna shimpiyaptinraqmi pipis jusayuq kashqan musyakanqa”.

[2] Qamkuna kaqman shamur jusalikuykaqkunata maynami nirqä jusalikuyashqanta kachariyänanpaq. Kananpis nawpaykikunacho kaykaqnömi lapaykita yapay kayno nï: Kanan kutimur saynöla jusalikuykaqta tarirqa manami kuyapäyäshaykisu.

[3] Sayraqmi musyayanki qamkunata nishqäkuna Jesucristo munashqanno kashqanta. Jesucristupis manami mayqaykitapis jusaykipita sapäshunkisu. Saypa trukanqa jusalikuyta mana kachariyaptiki munayninwanmi corrigiyäshunki.

[4] Munayniynaq runano cruzcho wanuptinpis Tayta Diosmi munayninwan payta kawarisimush. Saynölami noqakunapis Jesucristuman yärakur kikiläkunapitaqa munayniynaq kaykarpis Tayta Diospa munayninwan qamkunata corrigiyäshayki.

[5] Jesucristuman rasunpaypa yärakuyashqaykita o mana yärakuyashqaykitapis kikikikuna tantiyakuyay. ¿Manaku tantiyayanki Jesucristo qamkunawan kaykashqanta? Payman mana yärakuyaptikiqa manami qamkunawansu kaykan.

[6] Rasunpaypa payman yärakurqa Jesucristo kachamashqanta tantiyakuyankimanmi.

[7] Tayta Diosta manakuykäyä nishqäkunata chaskikur jusalikuykunata kachariyänaykipaqmi. Manami munayyuq kayashqäta tantiyayänaykipaqsu manakuyä, saypa trukanqa munayniynaq kayashqäta yarparpis Tayta Dios munashqanno kawayänaykipaqmi.

[8] Sayno niyä Tayta Diospa ali wilakuyninta imapis mana sapänanpaqmi. Paypa wilakuyninta pïmaypis chaskikuyänantami munayä.

[9] Saymi Tayta Diosta manakuykäyä lapanchöpis pay munashqanno kawayänaykipaq. Pay munashqanno kawayaptikiqa munayniynaq kayashqäta runakuna yarpäyaptinpis kushikuyämi.

[10] Kay qelqamushqäkunata cäsukuyaptiki qamkuna kaqman chämushpä imatapis mananami niyäshaykinasu. Manami lakikasinäpaqsu apóstol kayman Tayta Dios churamash, saypa trukanqa shakyäsir yanapänäpaqmi.

[11] Wawqi panikuna, imaypis kushikuyay. Tayta Dios munashqanno kawayänaykipaq jukniki juknikipis shakyäsinakuyay. Mana chikinakuypa juk shonqula kawayay. Sayno kawayaptikimi kuyapäkuq y ali kawayta qomaqninsi Tayta Dios imaypis yanapäyäshunki.

[12] Jukniki juknikipis qaqlaykikunacho musanakuyashpayki winchinakuyay.

[13] Kaycho kaykaq lapan wawqi panikunapis salüduntami qamkunapaq apasikayämun.

[14] Señor Jesucristo, Tayta Dios y Espíritu Santu imaypis kuyapaykuyäläshunki. [Amén.]