[1] Hatun kamachikuqkunamanpas, llaqtapi umalliqkunamanpas, huch'uyaykukuywan kasukunankupaq yuyarichiy. Llapan allin kaqta ruwanankupaqpas wakichisqallapuni kashachunku.
[2] Ama pimantapas mana allintaqa rimachunkuchu, nitaq huchatariylla munaqchu kachunku. Aswanpas munakuqkuna, tukuy llamp'u kayta llapa runakunaman rikuchiqkuna kanankupaq yuyarichillaypuni.
[3] Ñawpa tiempopiqa, ñoqanchispas mana yuyayniyoq, mana kasukuq, hinallataq pantachisqan karqanchis. Hinan imaymana mana allin munapayaykunatawan, q'ochurikuykunatawan serbirqanchis. Mana allinpi, enbidiakuypi, chiqninakuypi, hinallataq hukkuna-hukkunawan chiqninakuspan kawsarqanchis.
[4] Ichaqa Qespichiqninchis Diospa qoykukuq kayniymi, munakuyninpiwan runakunapaq rikhurimurqan.
[5] Manataqmi ima chanin ruwayta ruwasqanchisraykuchu, aswanpas paypa yanapakuyninman hinan qespichiwarqanchis. Hinan mosoqmanta kawsarichiy mayllikuypa chawpinta, hinallataq mosoqyachiq Santo Espírituq chawpinta qespichiwarqanchis.
[6] Hinan Qespichiqninchis Jesucristoq chawpinta, askhallapiña Diosqa Santo Espirituta hich'aykamuwarqanchis.
[7] Chay hinapin allinpaq qokuyninwan chaninman tukuchisqa kaspa, wiñay kawsay suyakuyman hina erensiata chaskiq kapunchis.
[8] Chay yachachikuyqa, cheqaqmi. Hinallataq Diospi kreeqkunapas allin kaq ruwaykunapipuni kashanankupaq, chay yachachikuytaqa sut'itapuni rimanaykita munani. Chay imaymanakunaqa, runakunapaqpas allinpuni, kusapunitaqmi kanpas.
[9] Mana yuyaykukuspa huchatariykunapas, runa-miraykunamanta rimaypas, huchatariykunapas, Kamachikuy Simimanta churanakuykunapas yanqan, manataqmi imapaqpas balinchu. Chayrayku chaykunamantaqa t'aqakuy.
[10] Yapa-yapa anyaykushaqtiyki wak t'aqakuna hatarichiq runataqa, ama chaskiyñachu.
[11] Chay runa pantakapusqanwan, huchallikusqanpiwan, pay kikinta huchachakapusqantaqa yachankiñan.
[12] Nikópolis llaqtapi, paray tiempo pasaytan yuyaykukuniña. Chayrayku Artemasta, otaq Tikikota qanman kachamuqtiyqa, imaynatapas usqhayllaman hamunkipuni.
[13] Kamachikuy simita sut'inchaq Zenasmanwan, Apolosmanwan, ñanpi mana pisichikunankupaq tukuy sonqowanpuni yanapaykunki.
[14] Chay hinapin wawqe-pananchiskunaqa, allin kaq ruwayniyoq kayta, pisichikuqkunaman usqhaylla haywariyta, yachanqaku. Mana hinaqa, mana ruruyniyoqmi kankuman.
[15] Llapallan ñoqawan kashaqkunan napaykamusunkiku. Iñiypi munakuqninchiskunatayá napaykunki. Diospa allinpaq qokuyninpas llapallaykichiswanpuni kachun. Ahinapuni kachun.