[1] Qan ichaqa, allin yachachikuyman hina yachachiy.
[2] Kurak runakunaqa, ima ruwaspanpipas makilla kuidakuq, respetanapaq hina, hinallataq allin yuyaywan kawsakuq kachunku. Hinallataq iñiypipas, munakuypipas, pasiensiakuypipas allin takyasqapuni kachunku.
[3] Chay hinallataq kurak warmikunapas Diosta manchakuq hinapuni kachunku. Ama yanqa qasinmanta tumpaq, nitaq binoq sinchi kamachinpaschu kachunku. Aswanpas allin kaqta yachachiqllapuni kachunku.
[4] Sipas warmikunatapas qosanku munakuyta, hinallataq wawanku munakuytapas yachachichunku.
[5] Hinallataq allin yuyaywan kawsayta, ch'uya kayta, wasinkupi imapas ruwakuyta, sumaq kayta, kikinkuq qosankuman kasukuq kayta ima yachachichunku. Chaymi Diospa siminqa, mana k'arak k'amisqachu kanqa.
[6] Chay hinallataqyá waynakunatapas allin yuyaywan kawsanankupaq kallpachaykuy.
[7] Tukuy imaymana allin kaq ruwaykunapi yachaqakunapaq hina rikuchikuy. Allin yachachikuypi, cheqaq kaqkunapi, respetanapaq hina kaypi, mana allin ruwaykunamanta t'aqakuypi rikuchikuy.
[8] Hinallataq mana wikch'uyukuna cheqaq simita yachachiy. Chay hinapin, qankunaq kontraykichispi mana allin rimaqqa, mana imatapas rimananpaq tarispa p'enqachisqa kanqa.
[9] Kamachikuna kikinkuq patronninkuman tukuypi kasukuq kanankupaq kallpachaykuy. Ama kutipakuchunkuchu, aswanpas patronninkuta kusichiq kachunku.
[10] Ama imatapas suwakuchunkuchu. Aswanpas qespichiqninchis Diospa tukuy yachachikuyninta, tukuy imakunapipas sumaqchanankupaq allin hunt'aq sonqo kayninkuta rikuchichunku.
[11] Diospa allinpaq qokuyninqa, llapa runakuna qespikunanchispaqmi rikhurimurqan.
[12] Chay allinpaq qokuyqa, mana Dios sonqo kaytawan, kay pachaq kaqnin munapakuykunatawan, wikch'upuytan yachachiwanchis. Hinallataq allin yuyaywan kawsakuspa, kay tiempo kawsaypi chaninta, hinallataq Dios sonqo kawsakunanchispaqmi, yachachiwanchis.
[13] Hatun Dios Qespichiqninchis Jesucristoq k'ancharishaq rikhurimuynintaqa, kusikuywanmi suyakushanchis.
[14] Jesucriston, llapa mana kamachikuy simiman hina kawsashaqtinchis, rantipapuwananchispaq ñoqanchisrayku pay kikinta qoykukurqan. Hinallataq pay kikinpa llaqtanpuni kaspa, allin ruwaykunata munaqkunallapuni kananchispaq ch'uyanchaykuwarqanchis.
[15] Chay imaymanakunataqa, tukuy kamachikuyniyoq kaywan rimaykuy, kallpanchaykuy, hinallataq phiñarikuy. Amataq pipas pisichasunkikuchu.