[1] Kunantaq wawqe-panaykuna, Señorninchis Jesucristoq hamunanmanta, hinallataq paywan tupaykunanchismanta rimaykuykiku.
[2] Amapuni ima yuyaykusqaykichispipas usqhayllaman waqllichisqa kanaykichispaqmi balikuykiku. Hinallataq Señorpa p'unchayninpas qayllaykamushanmanña hinaraq, amapuni huk espírituq chawpintapas, nitaq rimaypa chawpintapas, nillataq ñoqaykuq kartaykupas kanman hina chaypa chawpintapas, mancharikunaykichispaqmi balikuykiku.
[3] Amapunin imaynallanmantapas piwanpas q'otuchikunkichischu. Dios kontra sayariy manaraq ñawpaqta hamunankama, hinallataq kamachikuy simita mana kasukuq chinkay churi manaraq rikhurimunankama, Señorpa chay p'unchayninqa manan chayamunqaraqchu.
[4] Chay chinkay churiqa, Diospa kontranpi, otaq llapallan Dios nispa sutiyasqakunaq kontranpi, hinallataq llapallan yupaychanapaq kaqpa kontranpin hatarimunqa. Chaymantapas, Diosman tukuspanmi, Dios yupaychana ch'uya cheqaspiraq tiyaykunqa.
[5] ¿Qankunawan kashaspayraq, chay imaymanakunamanta nisqaykunata manachu yuyarinkichis?
[6] Kunantaq chay chinkay churiq, tiemponpi rikhurimunanpaq imachus hark'ashasqantaqa yachankichisña.
[7] Chay pakasqa kaq mana kamachikuyniyoqqa, ñan llank'ashanña. Ichaqa, huk hark'aqmi kunan hark'ashan. Chay hark'aqqa, qayllanmanta qechusqa kanankaman hark'ashan.
[8] Chaymantañan chay kamachikuy simita mana kasukuq runaqa, rikhurichisqa kanqa. Paytataqmi, Señorqa siminwan phukurispalla wañuchinqa. Hinallataq hamuyninpa hatun k'anchariyninwan chinkachipunqa.
[9] Chay kamachikuy simita mana kasukuq runaqa, Satanaspa atiyninwanmi hamunqa. Hinan imaymananiraq tukuy atiywan ruwaykunata, señalkunata, hinallataq llulla musphana ruwaykunata ruwaspa hamunqa.
[10] Wañuy ñak'ariyman riq runakunaqa, qespichisqa kanankupaq kaq cheqaq munakuytan mana chaskirqankuchu. Chay hinapin paykunaqa, Satanaspa imaymananiraq lliw mana chanin q'otukuyninwan q'otuchikunqaku.
[11] Chaymi, llullakuyta kreenankupaq, sinchi q'otukuq yuyayta paykunaman Diosqa apachimunqa.
[12] Chay hinapin, paykunaqa, cheqaq kaqta mana kreerqankuchu. Aswanpas mana chanin kaqpin kusikurqanku. Chaymi paykunaqa, llapallanku huchachasqa kanqaku.
[13] Espiritunwan ch'uyanchasqanpa chawpinta, hinallataq cheqaq kaqpi iñisqaykichispa chawpintan, Diosqa qespisqa kanaykichispaq ñawpaqmantaraq akllakurqasunkichis. Chayraykun, Señorpa munakusqan wawqe-panaykuna, ñoqaykuqa qankunamanta Diosman grasiasta qoshanallaykupuni.
[14] Chaypaqmi Diosqa, allin willakuy willasqaykuq chawpinta, Señorninchis Jesucristoq hatun k'anchayninman aypanaykichispaq waqyarqasunkichis.
[15] Chay hinaqa wawqe-panaykuna, simiykuwanña, otaq kartaykuwanña yachachisqa karqankichis chaypas, chay yachachikuykunaman hap'ipakuychis. Hinallataq chaypi qaqa takyasqapuni kashaychis.
[16] Kikin Señorninchis Jesucristopiwan, Dios Yayanchispiwanmi munakuwarqanchis. Hinan allinpaq qokuyninrayku, wiñaypaq sonqochayta, hinallataq sumaq suyakuytawan qowarqanchis.
[17] Payllapuni sonqoykichista kallpachachun. Hinallataq tukuy allin kaq ruwayniykichispipas, allin kaq rimakuyniykichispipas takyachisunkichis.