[1] Ichaqa imaynan llaqta ukhupi falso profetakuna karqan, chay hinallataqmi qankunapurapipas falso yachachiqkuna kallanqataq. Paykunaqa, iñiypa kontranpin, thunichiq yachachikuykunata pakallapi yachachinqaku. Hinan rantipapuqninku munayniyoq Señortapas mananchanqakuraq. Hinallataq paykuna kikinkupas qonqaylla hamuq wañuy ñak'ariypaq kanqaku.
[2] Askha runakunataqmi, chay wañuy ñak'ariyman risqankuta qatikunqaku. Hinan paykunahawa, cheqaq kaq ñanqa runakunaq k'arakta k'amisqan kanqa.
[3] Hinallataq qolqe sonqo kaspankun, sumaq rimakuqman tukuspa, qolqeta horqosunkichis. Paykunaq huchachasqa kayninkuqa ñawpa tiempomantaraqmi wakichisqaña karqan. Hinallataq wañuy ñak'ariyninkupas makillaña suyashan.
[4] Diosqa, huchallikuq angelkunata manapunin hina mana kastigasqallatachu qhawarirqan. Aswanpas infiernomanmi wikch'uykurqan. Chay tutayaq cheqaspi, taripay p'unchaykama waqaychasqa kananpaqmi hap'iykuchirqan.
[5] Manallataqmi ñawpa hallp'a pachatapas mana kastigaspachu qhawarparirqan. Aswanpas kay pachapi mana Diosniyoq runakunamanqa, unu-para taripaytan apamurqan. Ichaqa chanin kaqmanta willakuq Noellatan, wakin qanchis runakunatawan kuskata, waqaycharqan.
[6] Hinallataq, Sodoma llaqtata, Gomorra llaqtatapas usphamanraq tukuchispa, thunisqa kanankupaqmi huchacharqan. Hinan, kay pacha hamuq qhepa tiempopi mana Diosniyoq kaywan kawsaqkunaq rikunankupaq chaytaqa ruwarqan.
[7] Chanin Lot runallatan qespichirqan. Payqa, runakunaq aycha kuerponkuta mana watakuspa qhellipi purisqankuwanmi mana thakchu kasharqan.
[8] Chay chanin runaqa, millay runakuna chawpipin tiyarqan. Hinan runakunaq mana chanin ruwasqankuta p'unchay-p'unchay rikusqan, hinallataq uyarisqanpas chanin almanta mana thaktachu kachirqan.
[9] Dios sonqo runakunata wateqaymanta qespichiyta Señorqa yachanmi. Mana chanin runakunata taripay p'unchaypi kastigasqa kanankupaq waqaychaytapas yachallantaqmi.
[10] Aswantaraqqa, pikunachus aycha kuerponkuta mana watakuspa puriqkunata qatikuspanku, aycha kuerponkuta qhellichaqkunatan Señorqa kastiganqa. Chay runakunaqa, ‘wiraqocha’ nisqa kaqkunatan pisichanku. Paykunaqa, mana manchakuqkuna, hinallataq kikinkuq munapayasqallankuta maskhaqkunan kanku. K'ancharishaq kaqkunatapas mana manchakuspankun, k'arakta k'aminku.
[11] Angelkunataqmi ichaqa, paykunamanta aswan kallpayoq, hinallataq aswan atiyniyoq kanku. Chaywanpas paykunaqa, Señorpa ñawpaqenpi manan ima ñakay simikunallatapas chay falso yachachiqkunaq kontranpiqa rimarirqankuchu.
[12] Chay runakunan ichaqa, mana yuyaykukuq uywa hina, mana entiendisqankumanta mana allinta rimanku. Paykunaqa, hap'ispa wañuchinapaqpunin naserqanku. Hinallataq, kikinkuq waqlliyninkupin wañupunqaku.
[13] Paykunan p'enqay ruwaqkuna, hinallataq qhelli ruwaqkunaqa kanku. Qankunawan mikhushaspankupas q'otukuyninkupin kusikunku. Chayraykun mana chanin ruwasqankumanta chanin kaq premiota chaskinqaku.
[14] Ñawinkupipas wasanchaymi hunt'a kashan. Manataqmi huchallikuspankupas saksarinkuchu. Mana allin takyasqa runakunatan, munapakuywan aysayachinku. Sonqonkupipas ancha qolqe sonqollañan kanku. Ñakaypa wawankunataqmi kankupas.
[15] Siwk nisqa ñantan saqerparipunku. Hinan Beorpa churin Balaanpa ñanninta qatikuspanku waqllipurqanku. Balaanqa mana chanin pagotataqmi munakurqan.
[16] Ichaqa mana allin ruwasqanmantataqmi phiñarisqa karqan. Huk mana hayk'aq rimaq karga apaq uywataqmi runa hina rimarispa, chay profetaq mana yuyaywan ruwayninta sayachirqan.
[17] Chay runakunaqa, ch'akisqa pukyu hinan kanku. Chaymantapas, wayraq apaykachasqan phuyo hinan kanku. Paykunapaqmi, wiñay-wiñaypaq sinchi tutayaq ukhu pachaqa waqaychasqa kashan.
[18] Mana allin kawsaqkunamanta cheqaqtapuni ayqekamuqkunatapas, yanqa anchaykachaq simikunata rimayninkuwanmi, aycha kuerpoq mana allin munapayayninkunaman aysaykunku.
[19] Pipas llallirachikun chayqa, llalliqninpa kamachinñan kapun. Chaymi paykuna kikinkupas mana allin kawsayninkuq kamachin kashaspankupas, kacharichisqa kaytaraqtaq prometinkupas.
[20] Qespichiq Señor Jesucristota reqsikusqankuraykun, paykunaqa kay pachaq qhelli kayninkunamantapas ayqekamunku. Sichus yapamanta chaykunawan mayt'uchikuspanku atipachikunqaku chayqa, ñawpaq kawsayninkumantapas qhepa kawsayninkuqa aswan mana allinraqmi kapunqa.
[21] Paykunaqa, chanin kaq ñanta reqsishaspankuñan, Diospa qosqan ch'uya kamachikuymanta qhepaman kutipurqanku. Chay hina kaqtinqa, chay chanin kaq ñanta ama reqsiyninkun, aswan allinqa kanman karqan.
[22] Paykunapitaqmi kay cheqaq proberbioqa hunt'akurqan. Chay proberbioqa nintaqmi: ‘Alqoqa aqtusqantan kutirpakapun. Hinallataq mayllisqa khuchipas wakmantan t'uruman qhospaykapun,’ nispa. (Prob. 26:11)