[1] Wo kɔ, Isa tɛɛ timintiminna so ni toodalu la ka mɔɔlu kawani, ani ka Samakan Kein nase ai bɛ ma ka bɛn Ala ya masaya ma. Ado aa keladen mɔɔ tan ni fila tɛɛ a fɛ.
[2] Moso dɔlu ka bila a kɔ gbazan. A tɛɛ vɛ a dɔlu lakɛnɛya. A do tɛɛ vɛ jina gbɛn ka bɔ a dɔlu kɔ. A dɔ tɔɔ tɛɛ ko Moyamu Magidalaka, Isa tɛɛ ka jina wolowulan gbɛn ka bɔ min kɔ.
[3] Johana, min tɛɛ masakɛ Helodi ya bonkunnasiiba Kuza moso le, wo tɛɛ ai lɔ. Susana gbazan tɛɛ je, a ni moso siyama gbɛlɛlu. Wolu tɛɛ Isa ni aa kɔbiladennu madɛmɛnna ai bolofennu la.
[4] Lon dɔ, jama ba ka na ka bɔ so siyama la k'ai ladɛn Isa fɛ. A do vɛ sana lala ai yɛ, a vɛɛ:
[5] «Sɛnɛkɛba dɔ ka bɔ ka taa malofalinya lɔ. K'a to malo falinna, a dɔlu ka ben siya dala. Timinbatɔlu ka wo lɔdɔndɔn ai sen ne ka a tiɲa. Kɔnɔnilu ka na k'a tɔ tata.
[6] Malo dɔlu ka ben fala kan. Wo ka fɛlɛn, kɛɛ ai bululu ka ja, k'a masɔlɔn sumaya tɛɛ tɛ je.
[7] Malo dɔlu ka ben woninnu tɛma. Ai fɛlɛnnin, woninnu gbazan v'i wulila ka malo lɔgbalin.
[8] Malo dɔlu gbazan ka ben duu kein nɔ, k'ai wuli ka ɲia kosɛvɛ k'ai den kɛmɛ kɛ.» Wo kɛ, Isa ka a kan nabɔ k'a fɔ ai yɛ, a vɛɛ: «Tolo yi min kun, wo tii y'a tolo malɔ kuma wo la.»
[9] Aa kɔbiladennu ka a maɲininga, ai vɛɛ «Sana wo kɔlɔ yi mindɛ le?»
[10] Isa vɛɛ ai yɛ: «Ala vɛ aa masaya gbonolu lɔnniya di ài ma, kɛɛ ko bɛ yi fɔla a dɔlu yɛ sanalu le lɔ. Wo lɔ, Ai y'ai ɲa kaana a lɔ, kɛɛ ai tɛ foi yena. Ai y'ai tolo malɔla a la, kɛɛ ai tɛ foi ɲayena.
[11] Sana wo kɔlɔ le min ne. Malo yi Ala aa kumakan sawula le le.
[12] Malo minnu bennin siya dala, wolu kɛnin ne iwo mɔɔ minnu yi Ala ya kumakan mɛnna, ado Soɛtana yi nala wo le lɔ ka kuma wo bɔ ai josokun nɔ, sa ai kana se limandeyala ka kisi.
[13] Malo minnu bennin fala kan, wolu kɛnin ne iwo mɔɔ minnu yi Ala ya kumakan mɛnna ka a mina telemanin sawa boloma. Kɛɛ kuma wo lilen tɛ donna ka jaanfa ai josokun nɔ. Ai yi waateni le kɛla Ala ya siya kan, kɛɛ do Soɛtana vɛ ai lɔsumanna, ai yi siya bila.
[14] Malo minnu bennin woninnu tɛma, wolu kɛnin ne iwo mɔɔ minnu yi Ala ya kumakan mɛnna, kɛɛ dunuɲalɔtɛɛ haminan ko le yi donna ai josokun nɔ, ani nafolo ladiyaɲɛ, ani jɛlɛdiyabɔ. Wo boloɲa ma, Ala ya kumakan lɔgbalinnin ai josokun nɔ, k'ai kɛ iwo malo fofo.
[15] Malo minnu bennin duu kein nɔ, wolu kɛnin ne iwo mɔɔ sɔvɛlu, minnu yi Ala ya kumakan mɛnna ka a mina kpekpe ai josolɔgbɛnin nɔ, ka ban ka gbeleya mina ai ma, iwo malo minnu y'ai den kɛla.»
[16] Isa vɛɛ ai yɛ kɔtunun: «Mɔɔ tɛ fitina lamɛnɛnna ka a sii daa kɔlɔ, ni wo tɛ lafen kɔlɔ. Fɔ i y'a sii fitinasiiya le lɔ, sa mɔɔ minnu yi donna bon na, wolu yi kɛnɛya ye.
[17] Fen doonnin suu suu tɛ je, min la tɛnala nkɛnɛmayala, kumatɛ gbono ko ma k'a fɔ min tɛnala bɔla gbɛ la.
[18] Ài y'ài tolo malɔ kobɛn! K'a masɔlɔn fen yi min bolo, a dɔ latɔ wo tii le ta kan. Kɛɛ fen tɛ min bolo, hali a yi min jatela a ta le, wo minatɔle a la.»
[19] Wo waate lɔ, Isa ba ni a dɔɔkɛlu ka na a ma, kɛɛ ai ma se ai madonna a la ka bɛn jama ma.
[20] Wo lɔ, ai vɛɛ Isa yɛ: «I ba ni i dɔɔkɛlu lɔnin lu ma. Ai y'a fɛ k'i ye.»
[21] A do k'ai javi, a vɛɛ: «Mɔɔ mɔɔ vɛ Ala ya kumakan mɛnna ka a labato, wolu le m̀ ba ni ǹ dɔɔkɛlu le.»
[22] Lon dɔ, Isa ni aa kɔbiladennu ka don kulun nɔ. A do vɛɛ ai yɛ: «Ài m'i taa kɔɔ kɔma.» Wo lɔ, ai vɛ taala.
[23] K'ai to kɔɔ kɔkan, sunɔɔ ka Isa mina. Ado fɔɲɛ ba vɛ bɔla ka kɔɔ lajaman fɔɔ ji tɛɛ donna kulun nɔ.
[24] Wo lɔ, ai ka na Isa lakunun. Ai vɛɛ a yɛ: «Kundii, kundii, mɔ faatɔle!» A do k'i wuli ka fɔɲɛ ni kɔɔ jamannin jamali. Fɔɲɛ ni kɔɔ lɔ ka suma tue.
[25] Wo kɛnin, Isa vɛɛ ai yɛ: «Àiya limandeya yi min ne?» Ai bɛ ka siyan ka kawakoya k'a kɛ a fɔle i ɲɔɔn yɛ, ai vɛɛ: «Ɛɛ! Mɔɔ suu mindɛ le min ne? Hali fɔɲɛ ni kɔɔ y'a kan minala.»
[26] Ai wɔlinin kɔɔ tɛɛla ka se Gelasenekalu makɛya lɔ, min ni Galile y'i ɲɔɔ ɲatelenman.
[27] Isa jiinin ka bɔ kulun nɔ, kɛ́ jinatɔ dɔ vɛ nala ka a labɛn. K'a ta waate jaan a tɛɛ tɛ feleyabɔ bilala. A do tɛɛ tɛ diɲala k'i sii bon na, fɔ kabuluso la.
[28] A ka Isa ye mingɛ, a ka gbanɔ ka na i mabilin a sen kɔlɔ. A k'a fɔ gbanɔkan nɔ, a vɛɛ: «Ile Isa, Ala Kɔlɔtaninba Den, mindɛ le ile ni ǹe ni wotɛ? I jaani, i kà ǹ tɔlɔya.»
[29] A ka kuma wo fɔ k'a masɔlɔn Isa tɛɛ vɛ jina jamali ko a yi bɔ a kɔ. Jina tɛɛ vɛ a mina siɲa siyama le. A tɛɛ vɛ a minala, sokɔnɔmɔɔlu tɛɛ a gbaan kulun na ka a sili jɔlɔkɔ la ka a lakana. Wo bɛ n'a kɛ, a tɛɛ jɔlɔkɔ ni kulun nɔkalikalila ka taa. Wo lɔ, jina tɛɛ a gbɛn haan fɔɔ dingila lɔkolonnu lɔ.
[30] Isa k'a maɲininga, a vɛɛ: «I tɔɔ di?» A k'a javi, a vɛɛ: «Jamaba.» Wo kɔlɔ le ko jina siyama le tɛɛ a kɔ.
[31] Jina wolu ka Isa madiya ko a kà ai lataa ka jangata sɔlɔn diɲa duun ba lɔ.
[32] Wo k'a talan kɔsɛ kulu ba tɛɛ dɔnnila tini kɔkan je. Jinalu ka Isa madiya ko a yi diɲa ai yi taa don kɔsɛlu lɔ. A do ka diɲa wo ma.
[33] Wo kɛ, jinalu ka bɔ kɛ́ kɔ ka taa don kɔsɛlu lɔ. Ai bɛ bɔlimantɔ ka jii tini la ka don kɔɔ kɔlɔ k'ai bɛ faa.
[34] Kɔsɛkunnasiibalu ka wo ye mingɛ, a vɛ bɔlila ka taa wo ɲafɔ so ni toodalamɔɔ bɛ yɛ.
[35] Mɔɔ wo bɛ vɛ bɔla ka taa wo lasaa. Ai ka se je ka jinatɔ kɔlɔ siinin ye Isa sen kɔlɔ. A hangili tɛɛ vɛ sei a ma. Faani tɛɛ a kanna. Ai bɛ ka siyan wo lɔ.
[36] Jinalu gbɛnnin tɛɛ minnu ɲana, wolu ka dandɛɛli kɛ dɔlu yɛ.
[37] Gelaseneka bɛ ka siyan a ɲa gbu gbu ma, ka Isa madiya ko a yi bɔ ai makɛya lɔ. Wo lɔ, Isa ni aa kɔbiladennu ka don kulun nɔ ko ai yi seikɔla.
[38] Wo kɛ, jinatɔ kɔlɔ vɛ Isa madiyala ko a a fɛ ka to a fɛ, kɛɛ a do ma diɲa fɔ k'a kelaya, a vɛɛ:
[39] «Taa i fɛso. Ala na ko ba min kɛla i yɛ, i yi wo lase i balamɔɔlu ma.» Isa tɛɛ vɛ ko ba min kɛ a yɛ, a vɛ taala wo lasena so fan bɛ lɔ.
[40] Isa seikɔnin kɔɔ kɔma, jama ka a lɔmina, baa ai bɛ tɛɛ a makɔnɔna.
[41] Wo waate, Aladalibon ɲamɔɔ dɔ ka na Isa ma k'i mabilin a sen kɔlɔ. Wo tɔɔ le tɛɛ ko Jailusi. A do vɛ Isa madiyala ko a yi taa aa bon na.
[42] Ko a denmoso kelenpesa yi faa bolo le ma. Wo tɛɛ vɛ san tan ni fila sɔlɔn. Isa taatɔla je, mɔɔ siyama vɛ bilala a kɔ fɔɔ k'a lɔgbalin ai tɛma.
[43] Wo k'a talan moso jangalotɔ dɔ tɛɛ je. Wo tɛɛ vɛ san tan ni fila kɛ jelibɔ jangalo y'a la. Danalibalu tɛɛ vɛ a bolofen bɛ dɔn, kɛɛ wo suu suu ma se a lakɛnɛyala.
[44] Moso wo k'i madon Isa la a kɔfɛ ka a bolo tuu aa faaniba dagbolo la. Aa jeli bɔ la ka lɔ telemanin.
[45] Wo lɔ, Isa vɛ ɲiningali kɛla, a vɛɛ: «Jene n'a bolo tuula ǹ na?» Mɔɔ bɛ vɛ a fɔla, ai vɛɛ: «Ǹe tɛ.» Piɛl vɛɛ a yɛ: «Kundii, i ma jama walanin ye fɔɔ k'i lɔgbalin ai tɛma?»
[46] Isa k'a javi, a vɛɛ: «Jama ko tɛ dɛ! Mɔɔ dɔ n'a bolo tuula ǹ na. Ǹ k'a lɔn fanga dɔ vɛ bɔ ǹ nɔ!»
[47] Moso k'a ye mingɛ ko a tɛ se i doonna, a jaajaatɔ ka na k'i bilin Isa sen kɔlɔ. A ka a bolo tuu aa faani dagbolo la kun min na, ani a ka kɛnɛya teme telemanin, a ka wo bɛ ɲafɔ Isa yɛ jama bɛ ɲana.
[48] Wo lɔ, Isa vɛɛ a yɛ: «Ǹ denmoso, iya limandeya v'i lakisi. Taa hɛlɛ lɔ.»
[49] Ka Isa to kumala, keladen ka na ka bɔ Aladalibon ɲamɔɔ ya bon na k'a fɔ a yɛ, a vɛɛ: «I denmoso vɛ sa. I kà kalanmɔɔ ɲagba butu.»
[50] Isa ka kuma wo mɛn mingɛ, a vɛɛ Jailusi yɛ: «I jei kà tɛɛ. I yi limandeya m̀ ma dein. Wo vɛ kɛla, i denmoso yi kɛnɛyale.»
[51] A senin Jailusi fɛlɔ, a ma diɲa mɔɔ yi don a fɛ bon na, fɔ Piɛl ni Yaya ni Janguba ani den fa ni a ba.
[52] Mɔɔ bɛ tɛɛ kasila ka sayagbanɔ kɛ den ya ko lɔ. Ado Isa vɛɛ ai yɛ: «Ài kà kasi. Denni ma sa. A yi sunɔɔ le lɔ.»
[53] Ai do ka jɛlɛ a ma, k'a masɔlɔn ai bɛ tɛɛ k'a lɔn feu k'a fɔ ko den vɛ sa.
[54] Isa do ka taa den mina a bolo ma ka a kan nabɔ, a vɛɛ: «Denni, i yi wuli!»
[55] Wo lɔ, den nin vɛ seila a lɔ. A do v'i wulila telemanin. Wo kɛnin, Isa vɛɛ ko ai yi balo di a ma.
[56] Den fa ni a ba ka kawakoya, kɛɛ a k'ai jamali ko ai kà wo fɔ mɔɔ suu suu yɛ.