[1] Isa k'a fɔ aa kɔbiladennu yɛ kɔtunun, a vɛɛ: «Nafolotii dɔ le tɛɛ, a ka kɛ́ dɔ ta k'a kɛ aa nafolo kunnasiiba le. Mɔɔlu ka a jalaki aa kundii ɲakɔlɔ mingɛ, ko a aa nafolo lɔtutula,
[2] a do k'a kili k'a fɔ a yɛ, a vɛɛ: ‹Ǹ'i ko mindɛ le mɛnna i kɔ yi ne? I na ko suu suu kɛla ǹa nafolo lɔ, fɔ i wo bɛ dandɛɛli kɛ ǹ yɛ, baa i tɛnala kɛla ǹa nafolo kunnasiiba le butu feu!›
[3] Nafolo kunnasiiba k'a jɛlɛ maɲininga wo lɔ, a vɛɛ: ‹Ǹ a kɛ di vɛ? Baa ǹ kundii kɛtɔle m̀ bɔla aa nafolo kunnasiibaya la. Fanga tɛ ǹ na ka sɛnɛ kɛ. Ado daili maaya yi ǹ na.
[4] Awa, ǹ k'a lɔn ǹ kɛtɔ min kɛla fɔsa ni ǹ kundii ka ǹ nabɔ aa baale lɔ, mɔɔlu yi ǹ nɔminale aiya bonnu la.›
[5] Kɛ́ v'i wulila wo lɔ k'aa kundii ya julutii bɛ kili kelenkelen ne ko ai yi na. A ka mɔɔ kunfɔlɔ maɲininga, a vɛɛ: ‹Ǹ kundii ya julu min y'i la, wo yi jein ne le?›
[6] Wo vɛɛ a yɛ: ‹Tulu palan kɛmɛ sein.› A do vɛɛ: ‹I sii vɛ, iya julu sɛvɛli mafalin ka kɛ palan kɛmɛ naanin ne.›
[7] Wo kɔ, a k'a dɔgbɛlɛ maɲininga, a vɛɛ: ‹Julu jein y'i la?› Wo vɛɛ: ‹Malo bɔlɔ kɛmɛ loolu le.› A do vɛɛ a yɛ: ‹Iya julu sɛvɛ mafalin ka kɛ kɛmɛ naanin ne.›
[8] A kundii ka ko wo mɛn mingɛ, a ka nafolokunnasiiba telenbali wo matɔɔ, ko a jateyanin ne. Baa dunuɲa min mɔɔlu k'i ɲɔɔn mina ɲa lɔn ka timin Ala ya mɔɔlu gbu la, minnu yi kɛnɛya lɔ.
[9] Ǹ a fɔ ài yɛ, ǹ ko dunuɲa nafolo vɛ kɛla ài bolo, ài yi wo kɛ mɔɔlu madɛmɛnfen ne, fɔsa wo vɛ banna, wo le y'a kɛ, ai y'ài lɔmina àiya habadan solu la.
[10] Mɔɔ min yi kɛla lanande le ko dennilu lɔ, wo yi kɛle lanande le ko balu lɔ gbazan. Mɔɔ min do yi kɛla telenbali le ko dennilu lɔ, wo yi kɛle telenbali le ko balu lɔ gbazan.
[11] Wo lɔ, ni ài ma kɛ lanande le dunuɲa min nafolo ko lɔ, jene kɛtɔ nafolo bɛlɛbɛlɛ kalifala ài la?
[12] Ani ni ài ma kɛ lanande le nafolo ko lɔ min tɛ ài ta le, jene yi nafolo di ài ma ka kɛ ài ta le?
[13] Jɔn tɛ se baale kɛla jɔnfa fila yɛ waate kelen nɔ. Ni wo ka kɛ, jɔn kɛtɔ a dɔ lagbeyaɲɛla ka a dɔ kanu. A do fasatɔ a dɔ ma, k'i ban a dɔ lɔ. Wo lɔ, ài tɛ se kɛla Ala ya jɔn ne, ka kɛ wɔli gbazan ya jɔn ne.
[14] Falisilu ka kuma wo mɛn ka jɛlɛ Isa ma, baa wɔli ko ka diya ai yɛ bubale.
[15] Wo lɔ, Isa vɛɛ ai yɛ: «Ài y'ài jɛlɛ kɛla iwo mɔɔ telennin mɔɔlu ɲana, kɛɛ min y'ài josokun nɔ, Ala ka wo bɛ lɔn. Baa fen minnu kulu gbeleyanin adamadennu ɲana, wolu yi ɲama le le Ala ɲana.»
[16] «Min sɛvɛnin kela Musa ya Taulati ni kela dɔgbɛlɛlu ya kitabulu lɔ, mɔɔlu tɛɛ wo kawanili kɛla fɔɔ ka na a sii Yaya ya waate la. K'a damina wo waate ma, Samakan Kein ka bɛn Ala ya masaya ma, wo la yi sena mɔɔlu ma, ado mɔɔ bɛ y'i lɔjala ka don a lɔ.
[17] Sangbolo ni duukolo ban nɔɔyanin ka timin Ala ya seliya kelenpesa ban na, hali a tomi kelen.
[18] Ni mɔɔ min ka a moso bila ka moso gbɛlɛ fulu, wo tii vɛ jalɔnya kɛ. Ni do kɛ́ ka moso fulu wo boloɲa ma, wo gbazan vɛ jalɔnya kɛ.
[19] Banakɛ dɔ tɛɛ je, min tɛɛ a masilila faani kein keinnu lɔ ani ka dɔnni ɲuma kɛ lon lon.
[20] Wo k'a talan, mɔɔlu tɛɛ kɛla nala bolokolon dɔ le ka a lala aa lu da la, min tɔɔ yi ko Lazali. A fali fan bɛ kɛnin tɛɛ daa le le.
[21] A lɔɔ tɛɛ a la ko a yi fen kulunkulunnilu dɔn, min tɛɛ benna banakɛ wo ya tabali kɔlɔ. K'a dɔ la wo kan, hali wulunilu tɛɛ nala ka a daalu lanɛn.
[22] Lon dɔ, bolokolon wo ka sa mingɛ, mɛlɛkalu ka taa a le ka a lasii nabi Ibulahima tɔɔfɛ. Wo kɔ, banakɛ gbazan ka sa, ai do ka a sudoon.
[23] K'a to tɔlɔya lɔ sulu ya so la, a k'a kun nawuli ka nabi Ibulahima ye poon, Lazali tɛɛ a tɔɔfɛ.
[24] Wo lɔ, a ka a kan nabɔ, a vɛɛ: ‹Ǹ fa Ibulahima, hina ǹ na. I yi Lazali lataa, a a bolokɔni bila ji lɔ ka na ka ǹ nɛɛ lasuma wo le, baa m̀'ɛ tɔlɔya taa bolo bubale.›
[25] Nabi Ibulahima do k'a javi, a vɛɛ: ‹Ǹ den, i kà ɲina. I na iya dunuɲalɔtɛɛ kɛla kunnadiya le lɔ, kɛɛ Lazali na a ta kɛla kunnagbeya le lɔ dein. Ale joso vɛ suma butu, k'a talan ile do yi dimin ba lɔ.
[26] K'a la wo kan, folon ba yi mɔ ni àilu tɛma. Wo le y'a kɛla, ni mɔɔ v'a fɔla ko a yi bɔ jan ka ka taa ài fɛlɔ, wo tii tɛ se. Ani mɔɔ suu suu tɛ se bɔla àilu gbu fɛlɔ ka na mɔ fɛlɔ jan.›
[27] A do k'a javi, a vɛɛ: ‹Ǹ fa, ni a yi ten ne, i jon jaani, i yi Lazali kela ka taa ǹ fa aa lu ma.
[28] Baa ǹ dɔɔkɛ mɔɔ loolu yi je. A yi taa ai lali, sa ai kana tɔlɔya sɔlɔn jan.›
[29] Kɛɛ nabi Ibulahima vɛɛ a yɛ: ‹Kela Musa ya Taulati ni kela dɔgbɛlɛlu ya kitabulu y'ai bolo. Ai y'ai tolo malɔ wolu la.›
[30] A do vɛɛ a yɛ: ‹Ǹ fa Ibulahima, wo tɛ a bɛn ɲia. Kɛɛ ni mɔɔ dɔ v'i wulila ka bɔ saya lɔ ka taa ai ma, ai yi tubele.›
[31] Kɛɛ a k'a javi kɔtunun, a vɛɛ: ‹Ni ai ma ai tolo malɔ kela Musa ya Taulati ni kela dɔgbɛlɛlu ya kitabulu la, hali ni mɔɔ dɔ k'i wuli ka bɔ saya lɔ ka taa ai lali, ai tɛnala diɲala ka tube tuun.›»