[1] Wo kɔ, ladɛnmɔɔ bɛ v'i wulila ka taa Isa le Pilati fɛlɔ.
[2] Ai do vɛ ai makasila a kan, ai vɛɛ: «Mɔ na kɛ́ min yena maa mɔɔlu lafilila k'ai lamulutu. A yi mɔɔlu dansiila ko ai kà nisɔɔn sala Lɔmu masakɛ ba ma. A do a fɔla a jɛlɛ ma ko Alimasihu, masakɛ kɔni.»
[3] Wo lɔ, Pilati ka a maɲininga, a vɛɛ: «Ile le Jahudiyalu ya masakɛ le?» Isa k'a javi, a vɛɛ: «Ile gbu le na wo fɔla.»
[4] Wo kɛ, Pilati k'a fɔ salakalaseba kundiilu ani jama bɛ yɛ, a vɛɛ: «M̀ ma ko ko ye kɛ́ min ya ko lɔ k'a fɔ ko ǹ a latɔn.»
[5] Kɛɛ ai ka to a mabamala, ai vɛɛ: «A yi mɔɔ bɛ lamulutula aa kalan ne Jude koovi fan bɛ lɔ. A na jusiila Galile ka na se haan fɔɔ jan.»
[6] Pilati ka kuma wo mɛn mingɛ, a k'ai maɲininga, a vɛɛ: «Jalasa kɛ́ min yi Galileka le le?»
[7] Pilati k'a ye mingɛ ko Isa bɔnin Galile le, a ka a lataa masakɛ Helodi ma min siinin tɛɛ Galile koovi kunna. Wo k'a talan Helodi gbu tɛɛ Jelusalɛm wo waate lɔ.
[8] Helodi ka Isa ye mingɛ, a ka sawa kosɛvɛ, baa a tɛɛ ka a mangan mɛn ani k'a ta waate jaan, a ye lɔɔ tɛɛ a la, sa wo yi kawanako dɔ kɛ a ɲana.
[9] Wo lɔ, a vɛ ɲiningali siyama kɛla Isa la, kɛɛ wo ma a dɔ javi.
[10] Salakalaseba kundii ni seliya kalanmɔɔlu k'i lɔ je ka to a jalakila fanga la.
[11] Hali masakɛ Helodi ni aa sɔdasilu tɛɛ a dɔɔyala ka a lafɛya. Ai ka masakɛ faani dɔ bila a kanna ka ban ka a lasei Pilati fɛlɔ.
[12] Pilati ni Helodi gbeyanin tɛɛ i ɲɔɔn yɛ kɔlɔkɔlɔ le. Kɛɛ wo lon kelen na, ai ka diya.
[13] Wo lɔ, Pilati ka salakalaseba kundii ni ɲamɔɔlu ani jama bɛ ladɛn.
[14] A vɛɛ ai yɛ: «Ài nanin kɛ́ min ne ǹ fɛ k'a fɔ ko a yi mɔɔlu lafilila. Wo lɔ, ǹ na a maɲiningala ài bɛ ɲana. Kɛɛ ǹ n'a yena ko ài na a jalakila ko ko lɔ, ài jo tɛ wo suu suu lɔ.
[15] Ài m'a ye? Helodi vɛ a lasei m̀ ma jan, baa ale gbazan ma koyon foi ye a lɔ. Alalaa a ma ko ko kɛ, min yi kɛ aa faa kun ne.
[16] Wo le y'a ma, ǹ kɛtɔ a gbasila ka a bila.»
[18] Wo lɔ, ai bɛ vɛ gbanɔla kan kelen nɔ, ai vɛɛ: «I yi kɛ́ min faa ka Balabasi bila!»
[19] Balabasi tɛɛ ka sokɔnɔmɔɔlu lamulutu fɔɔ ka mɔɔ dɔlu faa. Wo lɔ, ai ka a mina ka a bila kaso la.
[20] Jaa Pilati tɛɛ a fɛ ka Isa bila. Wo lɔ, a ka jama maɲininga kɔtunun.
[21] Kɛɛ ai ka to gbanɔla, ai vɛɛ: «A gbaan kɔlɔman ma ka a faa! A gbaan kɔlɔman ma ka a faa!»
[22] Pilati k'ai maɲininga a siɲa sawana lɔ, a vɛɛ: «Ǹ a faa mindɛ lɔ? A na koyon suu mindɛ kɛla? M̀ ma faa kun ye a la. Wo lɔ, ǹ kɛtɔ a gbasila ka a bila.»
[23] Kɛɛ ai ka a mabama ka to gbanɔla ko Isa yi gbaan kɔlɔman ma fɔɔ ai ka Pilati nɔ.
[24] Wo lɔ, ai tɛɛ min ɲininna, Pilati k'a latɛɛ ko a kɛtɔ wo kɛla ai yɛ.
[25] Ai tɛɛ mɔɔ min kɔ, a ka wo bila, min bilanin tɛɛ kaso la ka bɛn mɔɔlamulutu ni mɔɔfa ko ma. A do ka Isa don ai bolo, sa ai y'ai sawo kɛ a la.
[26] Ai taatɔla Isa le, ai ka bɛn Silɛnika kɛ́ dɔ le, min tɔɔ yi ko Simɔn. A tɛɛ bɔla tuu kɔlɔ. Sɔdasilu do k'a mina ka Isa gbaankɔlɔman la a kun ko a yi bila a kɔ wo le.
[27] Jama ba tɛɛ ai kɔ. Moso dɔlu tɛɛ je, ai vɛ ai sisi magbasila nilafin boloma ka kasi aa ko lɔ.
[28] Isa do k'i kɔdon k'a fɔ ai yɛ, a vɛɛ: «Jelusalɛm mosolu, ài kà kasi ǹa ko lɔ, kɛɛ ài yi kasi àilu gbu ni ài dennu ya ko lɔ.
[29] Baa waate dɔ kɛtɔ sena, ai kɛtɔ a fɔla ko: ‹Moso densɔlɔnbalilu ani minnu ma den sɔlɔn ba bene ani minnu ma sin di ba den ma, wolu le kunnadi le.›
[30] Wo waate, mɔɔlu kɛtɔ a fɔla tinilu yɛ ko: ‹Bilin mɔ kunna› ani k'a fɔ kooninnu yɛ ko: ‹Mɔ matunun!›
[31] Ni mɔɔlu yi ko suu min kɛla kɔlɔman kɛnɛ la, a vɛ jala do?»
[32] Ai do tɛɛ konyonkɛba fila gbazan malɔla a fɛ ko ai y'ai faa kelen ne.
[33] Ai y'a fɔla dingila min ma ko kunkolo dingila, ai ka se je ka Isa gbaan kɔlɔman ma ani konyonkɛba fila. Dɔ tɛɛ a bolokinin fɛ, dɔ tɛɛ a bolonunma fɛ.
[34] Isa do vɛɛ: «Ǹ Fa, i y'ai makoto, baa ai m'a lɔn ai yi min na.» Wo waate, sɔdasilu ka tombola kɛ ka aa faanilu lɔtala i ɲɔɔn wotɛ.
[35] Ka jama lɔnin to ko wo bɛ lasaala, Jahudiya ɲamɔɔlu tɛɛ Isa majɛlɛla, ai vɛɛ: «A na a dɔlu lakisila. Ni ale le Masa Tɔɔmasenin ne, Ala na min tala, a a jɛlɛ lakisi.»
[36] Sɔdasilu gbazan vɛ a lafɛyala ka gbɛ kumunnin dɔ jiya a la.
[37] Ai vɛɛ a yɛ: «Ni ile le Jahudiyalu ya masakɛ le, i i jɛlɛ lakisi.»
[38] Ai ka sɛvɛli dɔ kɛ Isa kunma wala kan. A sɛvɛnin tɛɛ ko: «Jahudiyalu ya masakɛ le min ne.»
[39] Konyonkɛba fila minnu dɛnnin tɛɛ Isa dafɛ, wolu lɔ kelen tɛɛ a jɛvɛla, a vɛɛ: «Ile le tɛ Masa Tɔɔmasenin ne? I i jɛlɛ lakisi ka ǹu gbazan nakisi.»
[40] Kɛɛ a tɔ kelen ka a makuma, a vɛɛ: «I tɛ siyanna Ala ɲa? I m'a lɔn mɔ bɛ yi latɔn kelen ne kɔlɔ?
[41] Ǹu kɔni ka kan ka tɔlɔya min sɔlɔn k'a masɔlɔn ǹu na koyon min kɛla, wo sala le wo le. Kɛɛ kɛ́ min do ma koyon foi kɛ.»
[42] A do vɛɛ: «Isa, i vɛ nala iya masaya lɔ waate min nɔ, i hangili yi to ǹ nɔ.»
[43] Isa k'a javi, a vɛɛ: «Ǹ'i tuɲa fɔ i yɛ, bi i kɛtɔ ǹ fɛ kɔnɔdiyaso la.»
[44] Telelatelen waate senin, tele mɛnɛn ka koli, ado divi ka don jamana fan bɛ lɔ ka to ten haan fɔɔ lɛlɛ sawa.
[45] Ado lɔhɔlɔmabonba daladɛnfaani ka fala a tɛma fila le.
[46] Wo kɛnin, Isa ka a kan nabɔ, a vɛɛ: «Ǹ Fa, ǹ'i ǹ nin donna i bolo.» Wo fɔnin, a ka sa.
[47] Sɔdasi kundii ka ko wolu ye mingɛ, a vɛ Ala tanula k'a fɔ, a vɛɛ: «Kɛ́ min tɛɛ mɔɔ telennin ne le jɔ!»
[48] Mɔɔ minnu ladɛnnin tɛɛ ko lasaaya lɔ, ai ka wo ye mingɛ, ai vɛ seikɔla so, ai vɛ ai sisi magbasigbasila josotiɲa boloma.
[49] A lɔnba bɛ ka to pon ko lasaaya lɔ, ani moso minnu bilanin tɛɛ a kɔ ka bɔ Galile.
[50] Wo k'a talan kɛ́ dɔ tɛɛ je, min tɔɔ yi ko Jusufu. A bɔnin tɛɛ Alimate, min yi Jahudiyalu ya so dɔ le. Mɔɔ bɛlɛ le tɛɛ ani mɔɔ telennin. A jei siinin tɛɛ Ala ya masaya waate le la. A do tɛɛ kititɛɛjama ɲamɔɔ dɔ le le, kɛɛ ai ka Isa ya kiti tɛɛ teme, a tɛɛ ma diɲa wo ma.
[52] A do ka taa Pilati madiya ko a yi diɲa a yi Isa fuleni ta ka taa a sudoon.
[53] Wo kɔ, a ka fuleni lajii ka bɔ kɔlɔman ma ka a kasange ka a sudoon kawawoo dɔ lɔ, a tɛɛ ka mɔɔlu lɔ min senna ka kɛ a jɛlɛ kabulu le. Su tɛɛ ma don ba wo kɔnɔ bene.
[54] Lon min na, mɔɔlu tɛɛ i lɔbɛnna Nɔningɛlon na, ado Nɔningɛlon tɛɛ jusii bolo le ma.
[55] Moso minnu tɛɛ Isa kɔ k'a ta a bɔ waate ma Galile, wolu ka taa Jusufu fɛ sudoonya lɔ. Wo boloma, ai ka kabulu ye ani a sudoonɲa.
[56] Wo lɔ, ai vɛ seikɔla so kɔnɔ ka tulu sumadiyanin ni latikolon lɔbɛn Isa fuleni yɛ. Ka bɛn seliya ma, ai ma baale kɛ Nɔningɛlon.