[1] Wo waate lɔ, Lɔmu masakɛba Ɔgɔstɔ k'a latɛɛ ko aa jamana fan bɛ mɔɔ bɛ yi taa ai tɔɔ sɛvɛya lɔ.
[2] Tɔɔsɛvɛ kunfɔlɔ wo ka kɛ waate min, masakɛ Kiliniyɔ le siinin tɛɛ Siliya jamana kunna.
[3] Ka bɛn tɔɔ sɛvɛ ko ma, mɔɔ bɛ vɛ taala ai fɛso.
[4] Wo lɔ, Jusufu ka bɔ Nazalɛti, min yi Galile koovi lɔ, ka taa Jude koovi so dɔ la, min tɔɔ yi ko Bɛtilɛhɛm, nabi Dawuda ya so kɔni, k'a masɔlɔn a tɛɛ nabi Dawuda bɔzɔn dɔ le le.
[5] Ale ni aa maminamoso Moyamu ka bila i ɲɔɔn kɔ ka taa tɔɔ sɛvɛya lɔ. Wo k'a talan, Moyamu kɔnɔma le tɛɛ.
[6] K'ai to Bɛtilɛhɛm, Moyamu moi lon ka se.
[7] A do na a denkɛ kunfɔlɔ sɔlɔnna, ka a mamɔlɔmɔlɔ faani lɔ ka a lala kolofen ya dɔnnikɛfen nɔ, k'a masɔlɔn ai tɛɛ ma jiya sɔlɔn lonabon na.
[8] Wo k'a talan, saakunnasiiba dɔlu tɛɛ sila tuu kɔlɔ so kɔɔkan k'ai jando aiya saalu lɔ.
[9] Mɔtii ya mɛlɛka ka bɔ gbɛ lɔ ai ɲana, ado Mɔtii nɔɔlɔ ka mɛnɛnmɛnɛn ai laminin nɔ. Ai do ka siyan bubale.
[10] Mɛlɛka vɛɛ ai yɛ: «Ài kà siyan, k'a masɔlɔn ǹ nanin samakan kein ne le ài fɛ, min kɛtɔ mɔɔlu bɛ kɔnɔ diyala kosɛvɛ.
[11] Lakisiliba vɛ sɔlɔn ài yɛ bi, nabi Dawuda ya so la. Ale le Masa Tɔɔmasenin ne, ani Mɔtii.
[12] Ǹ'i tɔɔmase min jiyala ài la, wo le ne, ài kɛtɔ denkulani yena, a mamɔlɔmɔlɔnin faani lɔ, a lanin kolofen ya dɔmunnikɛfen kɔnɔ.»
[13] Telemanin, mɛlɛka siyama vɛ bɔla sanfɛ ka na kafon mɛlɛka kunfɔlɔ wo kan. Ai bɛ ladɛnnin vɛ Ala tanula, ai vɛɛ:
[14] «Bunya yi Ala yɛ dingila kɔlɔtaninnu lɔ, Hɛlɛ y'a diyanan mɔɔlu yɛ duukolo kan.»
[15] Mɛlɛkalu seikɔnin haijɛnɛ, saakunnasiibalu k'a fɔ i ɲɔɔn yɛ, ai vɛɛ: «M'i taa Bɛtilɛhɛm. Mɔtii na ko min nasena mɔ ma, m'a lasaa.»
[16] Ai do vɛ taala ɲagba le ka Moyamu ni Jusufu talan ka denkulani lanin ye kolofen ya dɔnnikɛfen kɔnɔ.
[17] Ai ka wo ye mingɛ, ko min bɛ fɔnin ai yɛ ka bɛn denni ya ko ma, ai ka taa wo dandɛɛli kɛ.
[18] Minnu bɛ ka saakunnasiibalu ya kuma mɛn, wo bɛ ka kawakoya.
[19] Moyamu kɔni ka ko wo bɛ ladalo a joso lɔ ka to i milila ai ma.
[20] Saakunnasiibalu vɛ seikɔla ka to Ala buɲala ka a tanu, baa ai ka kolu ye ani k'a mɛn, iwo mɛlɛka k'a fɔ ai yɛ teme.
[21] Den sɔlɔn ka tele sein bɔ mingɛ, ai ka a makɛnɛkɛ ka a tɔɔla ko Isa, mɛlɛka ka tɔɔ min fɔ Moyamu yɛ, k'a talan a tɛɛ ma kɔnɔ ta ba bene.
[22] Sɛnɛya waate ko min sɛvɛnin kela Musa ya Taulati lɔ, wo ka dafa mingɛ, ai ka taa denni le Jelusalɛm ka a kalifa Ala la.
[23] K'a masɔlɔn a sɛvɛnin Taulati lɔ ko: «I den kunfɔlɔ vɛ kɛla kɛ́ le, i yi wo kalifa Ala la k'a kɛ a ta le.»
[24] Ai taanin tɛɛ gbazan ka salaka ko ɲabɔ, iwo a sɛvɛnin Mɔtii ya seliya kitabu lɔ teme, ko: «Poponi fila, ni so tɛ sokɔnɔbilini den fila.».
[25] Wo waate, kɛ́ dɔ tɛɛ Jelusalɛm, min tɔɔ yi ko Simiyɔn. Mɔɔ telennin ne tɛɛ, ani Alaɲasiyanɲamɔɔ. A tɛɛ waate dɔ makɔnɔla, Ala kɛtɔ Isilanmɔɔlu joso sumala waate min. Ado Lɔhɔlɔma Fɔɲɛ tɛɛ a kan.
[26] Min tɛɛ vɛ a jiya a la, ko a tɛ sa haan fɔɔ a ɲa vɛ lala Masa Tɔɔmasenin kan, Mɔtii Ala na min lahedi tala.
[27] Lɔhɔlɔma Fɔɲɛ ka Simiyɔn lana lɔhɔlɔmabonba la. Wo waate kelen, den sɔlɔnbalu ka na Isa le je ka salaka laana ɲabɔ iwo a sɛvɛnin seliya kitabu lɔ teme.
[28] Simiyɔn bɛnnin ai le je, a ka denkulani ta k'a bolo mɔlɔmɔlɔ a ma, a vɛ Ala tanula, a vɛɛ:
[29] «Ǹ Tii Ala, i v'iya lahedi mafa. To butu ǹ'i sa hɛlɛ lɔ.
[30] I na kisiko min nɔbɛnna adamaden bɛ yɛ,
[31] m̀'ɛ wo ye ǹ ɲa la bi.
[32] Kɛnɛya le a le, min kɛtɔ kolu lankɛnɛmayala siboloma gbɛlɛlu yɛ, ani ka buɲali di iya Isilanmɔɔlu ma.»
[33] Min fɔnin Isa ma, wo ka a fa ni a ba kawakoya.
[34] Wo kɔ, Simiyɔn ka duwawu kɛ ai yɛ ka ban k'a fɔ Isa ba Moyamu yɛ, a vɛɛ: «I tolo malɔ! Ala v'a latɛɛ ko den min kɛtɔ mɔɔ siyama ya halaki ni kisiko le sabu le Isilan jamana lɔ. A do kɛtɔ tɔɔmase le, mɔɔ siyama bantɔ min nɔ.
[35] Wo boloɲa ma, mɔ siyama miliya lankɛnɛmayatɔ. Ile kɔni Moyamu, i joso tiɲantɔle. A do kɛtɔle iwo siyaminfan v'i sɔɔ.»
[36] Kelamoso dɔ tɛɛ je gbazan, min tɔɔ yi ko Ana. Fanuɛl denmoso le tɛɛ, min bɔnin Asɛli kabila lɔ. Ana tɛɛ vɛ kɔlɔya bakɛ. A singbiliya waate, a tɛɛ ka fulu ka san wolowulan kɛ a kɛ́ fɛ.
[37] A fulu san wolowulan, a kɛ́ ka sa k'ale kelen to. A sɔlɔn tɛɛ vɛ san bisein ni naani bɔ butu. A tɛɛ tɛ a mabɔla lɔhɔlɔmabonba la fɔ ka to Ala batola su ni tele, sun don ni Ala dali fɛ.
[38] Ana gbazan ka na ai ma wo waate kelen nɔ. A vɛ balika bɔla Ala yɛ, ka ban ka to denni ya ko fɔla mɔɔ bɛ yɛ, minnu jei siinin tɛɛ Ala la ko a kɛtɔ Jelusalɛmkalu kunmakala ka bɔ aiya tɔlɔya lɔ.
[39] Jusufu ni Moyamu ka ko bɛ kɛ mingɛ ka bɛn Mɔtii ya seliya ma, ai ka seikɔ ai fɛso Nazalɛti, min yi Galile koovi lɔ.
[40] Denni ka to buɲala ka fanga sɔlɔn. A do hangili ka wala, ani Ala lɔhɔlɔma tɛɛ a kan.
[41] San san Isa sɔlɔnbalu tɛɛ taala Timinkunna Selilon kɛla Jelusalɛm.
[42] Isa ka san tan ni fila sɔlɔn mingɛ, ai ka siya mina ka taa Jelusalɛm, iwo ai deinnin tɛɛ a kɛla teme.
[43] Seli ka ban mingɛ, Isa sɔlɔnbalu ka siya mina ka seikɔ ai fɛso. Jaa Isa tɛɛ vɛ to ai kɔ Jelusalɛm je, kɛɛ ai tɛɛ ma wo lɔn.
[44] A tɛɛ ai kɔnɔ ko Isa y'ai taamaɲɔɔlu fɛ jama tɛma. Wo lɔ, ai ka tele wo bɛ kɛ taamana. Ai do vɛ a ɲininna ai badenma ni ai lɔnbalu tɛma.
[45] Ai ma a ye mingɛ, ai ka seikɔ ka taa a ɲininya lɔ Jelusalɛm.
[46] A tele sawana lon, ai ka don lɔhɔlɔmabonba la ka Isa siinin ye kalanmɔɔlu tɛma. A tɛɛ a tolo malɔla ai la ka ɲiningali kɛ ai la.
[47] Aa hangilimaya ni aa javili ɲa ka a lamɛnba bɛ kawakoya.
[48] A sɔlɔnbalu ka a ye mingɛ, ailu gbazan ka kawakoya. A ba vɛɛ a yɛ: «Ǹ den, mindɛ kɛnin i vɛ ko min suu kɛ mɔ la tan? Ǹe ni i fa tɛɛ i ɲininna fan bɛ lɔ hamin boloma.»
[49] Isa k'a javi, a vɛɛ: «Mindɛ lɔ ài tɛɛ ǹ ɲininna? Ài m'a lɔn ǹ ka kan ka kɛ ǹ fa aa bon ne la?»
[50] Kɛɛ a sɔlɔnbalu ma aa kuma ɲaye.
[51] Isa ka taa ai kɔ Nazalɛti, ka to ai bolo je. A fanmajiinin tɛɛ ai yɛ. A ba do tɛɛ ko wo bɛ ladalola a joso lɔ.
[52] Isa buɲatɔla, a hangili ma ka to kafonna lon lon. Ala lɔhɔlɔma ka to lala a kan, ado aa ko ka diya mɔɔlu yɛ.