[1] Adhu, paraban se anggun, leburra sokona ba'na se ngangguy sandhal jareya. Leggu'na pokangnga akantha eyasan gabayanna seniman.
[2] Bujella akantha tobung se bungkol se ta' tao kakorangan anggur campor. Tabu'na akantha tombuganna gandum se ekalenglenge bang-kembang kacobung.
[3] Sosona akantha budhu'na manjangan dhadhuwa', akantha keddang se kembar.
[4] Le'erra akantha manara gaddhing. Matana akantha man-taman e Hesybon, e seddi'anna labang saketheng Batrabim. Elongnga akantha manara e Gunong Libanon, se ngadhep ka kottha Damsyik.
[5] Cethagga akantha Gunong Karmel; obu'na se ekoncer agalirap akantha kaen saten se paleng bagus; sampe' ngapencot atena rato.
[6] Raddin onggu ba'na reya, se paleng ekataresnae e antarana se ekaleburi.
[7] Badanna anggun akantha bungkana korma, sosona akantha gundhunganna buwana.
[8] Terrona sengko' nae'a ka bungkana korma jareya, ban metthega gundhunganna buwana. Sosona ba'na akantha gundhunganna anggur, nyabana ro'om akantha appel,
[9] colo'na manes akantha buwana anggur! Dina anggur jareya me' olle terros agili ka tang kakase tadha' ambuna; madhateng kasmaran, la'-mala' ka reng-oreng se teppa'na tedhung.
[10] Sengko' kaagunganna tang kakase, se terro ka sengko'.
[11] Ngereng ja' meyosa ka talon, kakase, kelem e teggal e antarana bang-kembang pacar.
[12] Ngereng ja' meyosa ka kebbun gu-laggu, nengale ponapa anggurra ampon kalowar pocedda kembang, ponapa kembangnga ampon mekkar; ponapa bungkana dalima ampon padha ngembang. E ka'dhissa' abdidalem ngatorragiya kataresna'an abdidalem ka junandalem.
[13] Bungkana arak ro'om bauna, e seddi'anna labangnga junandalem sareng abdidalem badha wa'-buwa'an se nyaman acem-macem, se ampon abit sareng se gi' buru epetthek; sadaja sareng abdidalem esempen kaator junandalem.