[1] Mastekana jung-kejungan anggidanna Sulaiman.
[2] Seyom abdidalem sareng latheepon junandalem; kataresna'annepon junandalem akobassa'an dhari anggur.
[3] Junandalem asareddhemman ro'omma, akadi mennya' ro'om se nompa; daddi junandalem ekaleburi ban-paraban sadajana!
[4] Ngereng duliyan asareng abdidalem, Guste Rato bakta'agi abdidalem ka kamar. Lantaran junandalem abdidalem sadaja padha perak, sareng ngalem kataresna'annepon junandalem ngalangkonge anggur; pantes ban-paraban padha lebur ka junandalem.
[5] E, babine'an Yerusalim, maske celleng sengko' raddin; celleng akantha mah-kemah Kedar, tape lebur akantha dhen-kordhen e karatonna Sulaiman!
[6] Ja' abas tang kole' se celleng, sabab sengko' kapanasan sonarra are. Tang ka'-kaka' gigir ka sengko'; sengko' esoro alako e kebbun anggur; sampe' ta' andhi' bakto ngorosa tang aba' dibi'.
[7] Ngereng dhabuwagi, kakase, e ka'dhimma junandalem ngowan ba-dumbana, epatedhung e ka'dhimma sareng junandalem e baja asar? Masa' abdidalem alenglenga nyare'e se junandalem e antarana ba-dumbana ca-kancaepon junandalem?
[8] Masa' ba'na ta' tao kennengnganna, e, se raddin e antara babine'an? Toro' bai lampadda sokona ba-dumba se bannya' rowa, owan bi'-embi'na ba'na e seddi'na parkemahanna reng-oreng ngowan.
[9] Kakase, ba'na akantha jaran bine' se narek karetana rato Messer.
[10] Pepena ba'na ce' leburra katotoban eyasan, le'erra bagus ngangguy kalong mamatan.
[11] Sengko' kabbi agabayyagi ba'na eyasan dhari emmas epobuwi ne'-mane' salaka.
[12] Sabatara tang rato ren-sarenan, tang mennya' ro'om asareddhemman.
[13] Tang kakase akantha mennyan ro'omma, e bakto marobbu e tang dhadha.
[14] Tang kakase akantha bungkana kembang pacar e bun-kebbun anggur En-Gedi.
[15] Raddin onggu ba'na, le', raddin onggu ba'na! Matana nyonar agandhu' taresna.
[16] Junandalem bagus onggu, kaka', junandalem gantheng onggu! Katedhunganna junandalem sareng abdidalem neng e rebba se biru.
[17] Kalenggiyannepon junandalem sareng abdidalem ngangguy cangga bungkana aras, ata'na dhari bungkana comara.