[1] Entar dha' emma kakasena ba'na paraban se paleng raddin? Entar dha' emma kakasena ba'na, mara etolongana nyare?
[2] Tang kakase meyos ka kebbunna, ka kebbunna pa-palappa ngowan ba-dumbana e kebbun, ban metthek bang-kembang kacobung.
[3] Sengko' reya kaagunganna tang kakase, salerana tang andhi', salerana ngowan ba-dumba e nga'-tengnga'anna kembang kacobung.
[4] Ba'na raddin, le' raddinna akantha kottha Yerusalim, akantha kottha Tirzah. Ba'na ngapencot ate, akantha tantara ban bul-ombulla.
[5] Mara atole ka sengko', sabab sengko' bingong nangale'e pangabassa ba'na. Obu'na ba'na akantha embi' se pak-ampagan, se toron dhari mo'-gumo' Gileyad.
[6] Gigina ba'na pote akantha ba-dumba se buru ecokor ban epandhi'i sabadan; sang-sapasang akantha dhu'-budhu'na dumba se kembar tadha' se elang settonga balakka'.
[7] Pepena ba'na akantha dalima saseba', ta' etangale, badha e budhina kodhungnga mowana.
[8] Maske badha sabidak prameswari, ban ballung polo seller, sarta ban-paraban ce' bannya'na,
[9] tape pera' settong buwana ate se ekaterrowe sengko', se raddin akantha dara, ana' nonggal kakasena ebuna. Ban-paraban padha ngabas ban padha ngalem, para prameswari ban para seller heran nangale'e robana.
[10] Sapa rowa se dhateng akantha pajjar se buru ngombar, lebur akantha bulan pornama, tera' akantha are? Ngapencot ate, akantha tantara se ngeba bul-ombulla?
[11] Sengko' entar ka kebbun konale, ngabasa bang-kembang e cora; pola bungkana anggur me' la kalowar pocedda kembang, ban bungkana dalima la padha ngembang.
[12] Sengko' rep-ngarep kataresna'anna ba'na, akantha oreng se terro nompa'a kareta perrang abarengnga ban oreng agung.
[13] Mara, paraban Sulam, mara padha atari, sopaja sengko' ngennenga nenggu. Arapa ba'na me' terro nangaleyana sengko' teppa'na atari e antarana barisanna reng-oreng se padha nenggu?