[1] Ba'na ce' raddinna, le', ba'na raddin onggu! Mata e budhiyanna totobba mowana ba'na akantha dara; obu'na ba'na akantha embi' saambalan, se toron dhari mo'-gumo' Gileyad.
[2] Gigina ba'na pote akantha dumba saambalan se buru ecokor ban epandhi'i badanna; sang-sapasang akantha budhu'na dumba kembar, maske settonga tadha' se elang.
[3] Bibirra ba'na akantha pita mera, colo'na ba'na ce' leburra. Pepena akantha dalima saseba', ngetek e budhiyanna totobba mowana.
[4] Le'erra ba'na akantha manarana Daud se epaddek epanyempen sanjata. Kalongnga akantha tameng saebu, gadana para pahlawan.
[5] Sosona ba'na akantha budhu'na manjangan dhadhuwa', otaba budhu'na keddang kembar se teppa'na amba e antarana bang-kembang kacobung.
[6] Sengko' ce' terrona entara ka gunong ban ka gumo' mennyan, sampe' angen laggu ngalesser, mamosna papetteng baja malem.
[7] Ba'na ce' raddinna, le', tadha' calena sakale.
[8] Mara toron ban sengko' dhari Gunong Libanon, le', mara toron ban sengko' dhari Gunong Libanon. Toron dhari konco'na Amana, dhari konco'na Senir ban Hermon, kennengnganna macan ban macan toltol.
[9] Ba'na ngapencot tang ate, le', tang pangantan, tang ate kapencot ban pangabassa matana, kalaban kalong mamatan se ngeyase le'erra.
[10] Kobassa onggu taresnana ba'na, le', tang pangantan, akobassa'an dhari anggur. Mennya'na ba'na ro'om asareddhemman, alebbidan dhari racegan apa'a bai.
[11] Cacana ba'na manes, le', akantha maddu se morne ban susu. Kalambina ba'na ro'omma akantha Gunong Libanon.
[12] Tang kakase kebbun se apagar geddhung, kebbun se apagar geddhung, somber se ekonci.
[13] E dhissa' tombu ka-bungkana dalima, se buwana paleng nyaman. Kembangnga pacar ban om-ro'oman,
[14] om-ro'oman ban konye', kaju manes ban tebbu, ban bungkana mennyan acem-macem. Mennyan ban garu, ban om-ro'oman se acem-macem.
[15] Dhari somber e tang kebbun nancel aeng odhi' se agili dhari Libanon.
[16] Mara jaga, angen dhaja, mara dha' enna' angen lao'! Mara dhateng ka tang kebbun, me' olle ro'omma asareddhemman. Moga tang kakase rabuwa ka kebbunna, ban adha'ar wa'-buwa'an se nyaman.