[1] GUSTE Allah Se Mahatenggi adhabu, “He, manossa se ta' langgeng, mara koca' ka Gog, rato agung dhari ra-nagara Mesekh ban Tubal ja' bi' Sengko' Gog jareya eokoma, ban kabala ja' Sengko' mosona.
[2] Bi' Sengko' Gog jareya epabiluga, egiba'a kalowar dhari dhaera se jau e dhaja, ka nong-gunong Isra'il.
[3] E jadhiya gandhibana bi' Sengko' epokola epasampe'a locot dhari tanang kacerra, ban panana epagaggara dhari tanang kanganna.
[4] E attassa nong-gunong Isra'il, Gog ban sakabbinna tantarana ban sakutuna bakal ngalotora, yit-mayyidda bi' Sengko' epakakana ka no'-mano' ban burun alas se galak.
[5] Rit-parjurit jareya bakal robbuwa ban bakal mateya e gal-teggal. Sengko', GUSTE Allah Se Mahatenggi, la ngoca'.
[6] Sengko' ngobbara tana Magog ban gir-penggir serengnga, se ekennengnge pandhudhu'na se taremtem odhi'na. Daddi reng-oreng jareya tao ja' Sengko' Pangeran.
[7] Tape e nga'-tengnga'anna oreng Isra'il, Sengko' anyata'agiya Tang nyama se socce, ban Sengko' ta' neng-ennengnga sopaja Tang nyama ta' sampe' epacemmer pole. Daddi sa-bangsa pas tao ja' Sengko' reya PANGERAN, Allahna Isra'il se socce.”
[8] GUSTE Allah Se Mahatenggi adhabu, “Are se esebbuttagi Sengko' jareya bakal napa'a onggu.
[9] Pandhudhu'na tha-kottha Isra'il bakal kalowara anyo-ronyo makompola ta-sanjata se la edina, iya reya tameng ban peddhang, gandhiba ban pana sarta thong-penthong, ekakajuwa. Bannya'na se epakompol cokop ekakaju pettong taon abidda.
[10] Daddi reng-oreng jareya ta' parlo nyare kaju ka gal-teggal ban ta' parlo moger ka'-bungka'an e alas, sabab ta-sanjata se edina cokop bannya'na kaangguy ekakaju. Reng-oreng jareya bakal arampoga ban arampasa dhi'-andhi'na reng-oreng se la arampok ban arampas dhi'-andhi'na. Sengko', GUSTE Allah Se Mahatenggi la ngoca'.”
[11] PANGERAN adhabu, “Mon jareya la kalakon kabbi, Gog bi' Sengko' eberri'ana tana koburan e Isra'il, e Cora Panyabbrangan se badha e temorra Tase' Mate. E jadhiya Gog ban sakabbinna tantarana bakal ekoburragiya, ban cora jareya bakal enyama'ana ‘Corana Pasukanna Gog’.
[12] Pettong bulan abidda reng-oreng Isra'il bakal repoda ngoburragi sakabbinna jinaza sopaja tana jareya ta' najjis.
[13] Sakabbinna pandhudhu' e nagara jareya bakal nolongana lalakon ngoburragi reng-oreng jareya; ban reng-oreng jareya bakal narema'a pangarga'an polana lalakon jareya e arena Tang kamennangan. Sengko', GUSTE Allah Se Mahatenggi, la ngoca'.
[14] Saellana bakto se pettong bulan jareya la lebat, badha reng-oreng se bakal esorowa mareksa nagara jareya kaangguy nyare yit-mayyit se gi' ajalamperran e tana me' olle ekoburragi sopaja nagara jareya berseya dhari se najjis.
[15] E dhalem parjalanan jareya, sabban nemmo tolangnga manossa, reng-oreng jareya bakal mobuwa tandha e erenganna, sopaja kang-tokang kobur nangale'e jareya sarta pas ngoburragi tolang jareya e Corana Pasukanna Gog.
[16] Kalaban cara se kantha jareya tana jareya epaberse dhari se najjis. (E budhi are, e cora jareya bakal badha'a kottha se nyamana padha ban Pasukanna Gog.)”
[17] GUSTE Allah Se Mahatenggi adhabu ka sengko', “He, manossa se ta' langgeng, mara olok no'-mano' ban burun alas laenna dhari man-dhimman, me' olle ngakan kurban se esadhiya'agiya bi' Sengko'. No'-mano' ban run-burun alas jareya bi' Sengko' epesta'agiya eparaja'a, epangakana daging ban epangenoma dhara.
[18] No'-mano' ban run-burun alas jareya bisa ngakan mayyidda wan-pahlawan, ban ngenom dharana para pangobasana dunnya, se epateyana akantha embi' lake' ban budhu'na embi', sarta theng-bantheng se lempo.
[19] Saellana reng-oreng jareya bi' Sengko' epate'e epakantha kurban, no'-mano' ban run-burun alas laenna bakal ngakana gajina sampe' padha'a ngota, sarta ngenom dharana sampe' mabu'.
[20] E Tang meja no'-mano' ban run-burun alas jareya bisa makennyang tabu'na ngakan ran-jaran ban orengnga se nompa' sarta reng-oreng se noro' aperrang. Sengko', GUSTE Allah Se Mahatenggi, la ngoca'.”
[21] PANGERAN adhabu, “Sengko' noduwagiya Tang kamolja'an ka sa-bangsa, noduwagiya baramma carana Sengko' aguna'agi Tang kakobasa'an kaangguy ajalannagi sakabbinna Tang kapotosan se adil.
[22] Molae dhari jareya oreng Isra'il bakal taowa ja' Sengko' GUSTE Allahna.
[23] Ban sakabbinna bangsa bakal apangrasa'a ja' oreng Isra'il ekerem ka pambuwangan polana dusana ka Sengko'. Oreng Isra'il bi' Sengko' edina'agi ban epanneng epakala moso ban epate'e e paperrangan.
[24] Bi' Sengko' eokom satembang ban kanajjisanna ban kajahadanna, saellana jareya bi' Sengko' laju edina'agi.”
[25] GUSTE Allah Se Mahatenggi adhabu, “Tape sateya Sengko' neserra ka ommat Isra'il toronanna Yakub, bi' Sengko' epama'mora pole. Kalaban cara se kantha jareya Sengko' ajaga sopaja Tang nyama teptebba ehormadi.
[26] Mon ommat Isra'il jareya la odhi' taremtem pole e nagarana dibi', ban tadha' oreng se ambabajane pole, reng-oreng jareya pas bakal loppa'a baramma aba'na se epamalo polana akiyanadi Sengko'.
[27] Ommat Isra'il jareya bi' Sengko' egiba'a abali dhari ra-nagarana mosona, ban Tang kasocceyan bakal katona ka sakabbinna bangsa polana se ejalannagi Sengko' jareya.
[28] Daddi Tang ommat tao ja' Sengko' reya GUSTE Allahna. Sabab Sengko' se ngerem reng-oreng jareya ka pambuwangan, tape Sengko' keya se ngeba reng-oreng jareya abali ka nagarana dibi', tadha' settonga se edina e pambuwangan jareya.
[29] Sengko' matorona Tang erroh ka bangsa Isra'il, ban ta' adina'agiya bangsa jareya pole. Sengko', GUSTE Allah Se Mahatenggi, la ngoca'.”