[1] E tanggal lema' bulan empa' e taon se kapeng tello polo, e taon se kapeng lema' saellana Rato Yoyakhin eangko' ka pambuwangan, sengko', Imam Yehezkiel ana'na Busi, teppa'na badha e penggirra Songay Kebar e Babil, abareng ban reng-oreng buwangan Yahudi laenna. O-tao langnge' maroka ban sengko' eparenge pangatonan parkara Allah. Sengko' ngedhing PANGERAN abu-dhabu ka sengko', ban sengko' ngarassa'agi kowadda kobasana.
[4] Sengko' adhanga, pas nangale'e kaleng busbus dhateng dhari dhaja. Kelap dhap-ngareddhap dhari ondhem se raja, ban langnge' e sabingkerra tera' tar-kataran. E dhalem dhap-keddhap se rap-galiraban jareya katon badha barang se agalirap akantha paronggu.
[5] E nga'-tengnga'anna ondhem jareya sengko' nangale'e badha kerub pa'-empa', iya reya mahlok odhi' se padha ban manossa,
[6] tape sabban kerub jareya andhi' mowa pa'-empa' ban kalembang dhu pasang.
[7] Sokona loros ban agalirap akantha paronggu se eossowe. Garigi'na sokona badha kokona akantha kokona bantheng.
[8] Kajabana mowa se pa'-empa' ban kalembang se dhu pasang jareya, e baba'anna saneyap kalembang jareya badha tanangnga akantha tanangnga manossa.
[9] Saneyap mahlok jareya kalembangnga sang-sapasang epenthang, konco'na kalembang se settong nyedding ka konco'na kalembangnga mahlok settonganna, daddi mahlok se pa'-empa' jareya abangon masagi empa'. Mon aguli, kabbi padha aguli loros kaadha', tadha' se abalik ka budhi.
[10] Saneyap mahlok jareya mowana se pa'-empa' banneyan; se badha e adha' mowana manossa, se badha e kangan mowana macan, se e kacer mowana bantheng, ban se e budhi mowana rajabali.
[11] Saneyap mahlok jareya kalembangnga se sapasang menthang ka attas, sampe' konco'na nyedding ka konco'na kalembangnga mahlok laenna se badha e seddi'anna, ban kalembangnga se sapasangnga rapet notobi badanna.
[12] Saneyap mahlok jareya e dhalem settong bakto ngadhep ka empa' kennengngan, daddi bisa entar dha' emma'a bai noro' sakencengnga, ta' kalaban moter badanna.
[13] E nga'-tengnga'anna lok-mahlok jareya badha barang se katon akantha mardha otabana obur se li-guliyan tadha' ambuna. Apoy jareya mancorong ban kalowar dhap-keddhap.
[14] Lok-mahlok jareya dibi' ajalan jar-ganjir, ceppedda akantha dhap-keddhap.
[15] Teppa'na sengko' ngabassagi jareya kabbi, sengko' nangale'e e tana, e erenganna saneyap mahlok se pa'-empa' gella' badha rodhana settong ebang.
[16] Rodha se pa'-empa' jareya padha bangonna, ban rap-galiraban akantha mamatan; sabban rodha jareya badha rodhana se malang e nga'-tengnga'anna.
[17] Daddi dha-rodha jareya bisa ajalan ka adha', ka budhi, ka kangan ban ka kacer.
[18] Bunterranna dha-rodha jareya possa' ban mata.
[19] Lok-mahlok jareya ajalan dha' emma'a bai sakarebba, ban dha-rodhana noro', sabab dha-rodha jareya ekobasae lok-mahlok jareya. Mon lok-mahlok jareya ngabber ka bang-abang otabana ambu, dha-rodhana noro' keya.
[22] E attassa cethagga lok-mahlok jareya badha barang se padha ban kubah dhari kristal se agalirap.
[23] E baba'anna kubah jareya lok-mahlok gella' padha menthang kalembangnga se sapasang ka mahlok se badha e seddi'anna, dineng kalembangnga se sapasangnga epanotobi badanna.
[24] Mon lok-mahlok jareya ngabber, sengko' ngedhing monyena kalembangnga; monyena akantha garudhu'na garujugan, akantha garadabba tengka'na pasukan tantara se bannya', akantha sowarana Allah Se Mahakobasa. Mon se ngabber ambu, bang-kalembangnga eparapet ka badanna,
[25] tape dhari attassa kubah se badha e attassa cethagga gi' badha monyena sowara.
[26] E attassa kubah jareya badha barang se katon akantha tahta dhari mamatan kacobung, ban e attassa tahta jareya badha se alenggi, katonna akantha manossa.
[27] Bagiyan attassa katon rabbang akantha paronggu e nga'-tengnga'anna apoy se rabak. Bagiyan babana tera' tar-kataran,
[28] ban ana-barna akantha andhang. Jareya sonar tera' se noduwagi ja' PANGERAN badha e jadhiya.