[1] PANGERAN adhabu pole ka sengko',
[2] “He, manossa se ta' langgeng, ba'na badha e nga'-tengnga'anna kaom pamberonta'. Reng-oreng jareya andhi' mata tape ta' nangale; andhi' kopeng tape ta' ngedhing, sabab reng-oreng jareya dujan aberonta'.
[3] Lantaran jareya, he, manossa se ta' langgeng, pongpong gi' seyang, rengkesse rang-barangnga ba'na, bundu' akantha kabiyasa'anna oreng buwangan. Sabellunna malem, ba'na ondur dhari bengkona, rang-terrangan akantha oreng se egiba ka pambuwangan. Lobange geddhungnga bengkona ba'na, patangale'e ka kaom pamberonta' jareya. Du'-bundu' se aesse rang-barangnga ba'na jareya giba kalowar lebat lobang gella'. Pekol du'-bundu' jareya. Pas mangkat e baja malem se petteng. Totobi matana sampe' ba'na ta' nangale'e lorong se elebadi. Dina reng-oreng Isra'il me' olle nangale kabbi apa se elakone ba'na jareya, menangka parengeddan ka reng-oreng jareya. Olle daddi reng-oreng jareya pas apangrasa ja' aba'na pamberonta'.”
[7] Papakonna PANGERAN jareya bi' sengko' laju elakone. E are jareya keya, e bakto gi' seyang, sengko' arengkesse tang rang-barang, laju ebundu', akantha biyasana oreng se ngongse. E bakto la molae malem, sengko' alobange geddhungnga tang bengko ngangguy tang tanang, pas kalowar lebat e lobang jareya. Sengko' eabassagi sakabbinna oreng, mekol tang du'-bundu', laju terros mangkat.
[8] Kalagguwanna PANGERAN adhabu ka sengko',
[9] “He, manossa se ta' langgeng, bangsa Isra'il se dujan aberonta' rowa atanya ka ba'na apa se elakone ba'na jareya.
[10] Daddi kabala ka reng-oreng jareya apa se ekoca'agi bi' Sengko', GUSTE Allah Se Mahatenggi ka reng-oreng jareya. Tang pessen jareya etojjuwagi ka rato e Yerusalim ban ka sakabbinna pandhudhu' e kottha jareya.
[11] Kabala ja' apa se elakone ba'na jareya menangka lambang se bakal kadaddiyana ka reng-oreng jareya, iya reya: reng-oreng jareya bakal daddiya oreng buwangan ban tawanan.
[12] E malem se petteng ratona bakal mekola du'-bundu'na laju mangkat. Reng-oreng bakal alobangana geddhungnga sopaja ratona jareya bisa'a kalowar. Rato jareya bakal notobana matana sampe' ta' nangale'e ka lorong se elebadi.
[13] Tape Sengko' bakal abarbara Tang jala epamega'a rato jareya. Saellana jareya bi' Sengko' rato jareya pas egiba'a ka kottha Babil, ban e jadhiya bakal mateya ta' kalaban tao nangale'e kottha jareya.
[14] Sakabbinna essena karaton, tamaso' para panasehat ban pangawal pribadhina rato bi' Sengko' epabalessadana ka man-dhimman. Bi' Sengko' eserserra epateyana.
[15] E bakto reng-oreng jareya bi' Sengko' epabalessadan ka nga'-tengnga'anna sa-bangsa e ra-nagara manca, reng-oreng jareya bakal taowa ja' Sengko' PANGERAN.
[16] Sabagiyan dhari reng-oreng jareya badha sakone' se bi' Sengko' epasalamedda dhari paperrangan, dhari kalaparan ban dhari panyaket, sopaja e nga'-tengnga'anna sa-bangsa manca jareya reng-oreng buru padha'a apangrasa ja' aba'na la atengka ce' jahadda. Daddi reng-oreng jareya bakal ngakowana ja' Sengko' reya Pangeran.”
[17] PANGERAN adhabu ka sengko',
[18] “He, manossa se ta' langgeng, mara ba'na pangetter e bakto ngakan, pagumegil katako'an e bakto ngenom.
[19] Kabala ka sakabbinna bangsa reya apa se ekoca'agi Sengko', GUSTE Allah Se Mahatenggi ka pandhudhu' Yerusalim se gi' badha neng e nagarana. Reng-oreng jareya bakal ngetterra e bakto ngakan ban gumegila katako'an e bakto ngenom. Tanana bakal kajala, sabab reng-oreng se badha neng e jadhiya ros-terrosan nerrak hokom.
[20] Tha-kottha se sateya gi' possa' ban oreng bakal eancora ban gal-teggal bakal daddiya ra-ara. Daddi reng-oreng jareya pas tao ja' Sengko' reya PANGERAN.”
[21] PANGERAN adhabu ka sengko',
[22] “He, manossa se ta' langgeng, arapa oreng Isra'il me' but-nyebbut parebasan reya: ‘Jaman agante, tape nobuwadda bi-nabbi tadha' se kalakona’?
[23] Sateya kabala ka reng-oreng jareya ja' Sengko', GUSTE Allah Se Mahatenggi, aberri' jawaban kantha reya: Parebasan jareya bi' Sengko' epatadha'a, sopaja ta' ekacaca oreng pole e Isra'il. Menangka gantena, kabala ka reng-oreng jareya ja' baktona la napa', ban sakabbinna nobuwat bakal kalakona.
[24] E Isra'il ta' kera badha pole pangatonan otaba ramalan palsu.
[25] Sengko', GUSTE Allah Se Mahatenggi, acaca'a ka bangsa Isra'il ban apa se ekoca'agi Sengko' bakal kalakona kabbi, ban ta' eparot-nyoroda pole. Mara edhingngagi, he, kaom pamberonta'! E bakto ba'na gi' odhi' reya Sengko' ajalannagiya sabarang se bi' Sengko' la eparengeddagi ka ba'na. Sengko', PANGERAN Se Mahatenggi la ngoca'.”
[26] PANGERAN adhabu ka sengko', “He, manossa se ta' langgeng, reng-oreng Isra'il ngoca' ja' pangatonan ban nobuwadda ba'na rowa bakal kalakona pagi'.
[28] Daddi kabala ka reng-oreng jareya, ja' Sengko', GUSTE Allah Se Mahatenggi, ngoca' kantha reya: Sabarang se ekoca'agi Sengko' masthe kalakon kabbi, ta' eparot-nyoroda pole. Sengko', GUSTE Allah Se Mahatenggi, la ngoca'!”