[1] PANGERAN adhabu pole, dhabuna,
[2] “He, manossa se ta' langgeng, mara aramal ban kabala ka bangsa Messer apa se ekoca'agi Sengko' GUSTE Allah Se Mahatenggi ka reng-oreng jareya. Mara aera' sarta nanges pakaja kantha reya:
[3] Adhu! Arena PANGERAN la para'! Okomanna Pangeran la para' dhapa'a. E are jareya petteng ban kandel ondhemma, sa'at sa-bangsa narema'a okoman.
[4] Mosiba raja bakal teba'a ka Sudan. E Messer bakal badha'a paperrangan. Ban-kurban bakal ngalotora e man-dhimman; saantero nagara erampok epadaddi jur-gujuran.
[5] E dhalem paperrangan jareya keya para parjurit sewa'an dhari Sudan, Lidiya, Libiya, Arab, Kub ban la'-mala' dhari Tang bangsa dibi' bakal ekennenga pate'e.”
[6] GUSTE Allah Se Mahatenggi adhabu, “Dhari Migdol e dhaja sampe' ka Aswan e lao', sakutuna Messer bakal ngalotora kabbi e dhalem paperrangan. Ban tantara Messer se sombong jareya bakal ancora. Sengko' PANGERAN Se Mahatenggi la ngoca'.
[7] Nagara jareya bakal daddiya nagara se paleng seppe ban paleng nako'e e antarana ra-nagara se seppe, ban tha-kotthana bakal daddiya jur-gujuran.
[8] Mon Sengko' la ngobbar Messer sarta mate'e sakabbinna sakutuna, reng-oreng jareya tao ja' Sengko' reya PANGERAN.
[9] Mon are jareya la napa', ban Messer la ancor, Sengko' ngerema otosan-otosan bi' pal-kapal epamatakerjada reng-oreng Sudan se ta' nyangka pa-apa jareya, daddi kabbi bakal padha'a takerjat katako'an. Onggu, are jareya bakal dhatengnga!”
[10] GUSTE Allah Se Mahatenggi adhabu, “Rato Nebukadnezar dhari Babil bi' Sengko' epangancora sakabbinna dhi'-andhi'na Messer.
[11] Nebukadnezar ban tantarana se ta' andhi' ate neser rowa bakal dhatengnga, ngancora tana jareya. Messer bakal eserranga ban peddhang, yit-mayyit bakal ajalamperrana e nagara jareya.
[12] Songay Nil bi' Sengko' epakerrenga, ban Messer epassra'agiya kabbi ka reng-oreng jahat. Reng-oreng manca bi' Sengko' esorowa mamosna nagara jareya. Sengko', PANGERAN, la ngoca'.”
[13] GUSTE Allah Se Mahatenggi adhabu, “Sengko' ngancora la-brahala ban ba-diba e Memfis. Bakal tadha'a rato pole e Messer. Pandhudhu'na kabbi bi' Sengko' epaandhi'a rassa tako'.
[14] Messer lao' bi' Sengko' epaseppeya kabbi ban kottha Sowan e dhaja eobbara. Tebe ibu kotthana bi' Sengko' eokoma,
[15] dineng dhi'-andhi'na epamosna'a. Peggella Tang ate bi' Sengko' eteba'agiya ka Pelusium, kottha se daddi bintengnga Messer,
[16] ban kottha jareya bakal nyangsara'a parana. Onggu, Messer bi' Sengko' eobbara. Dhung-geddhungnga kottha Tebe bakal gujura ban kottha jareya bakal eanyo'a banjir.
[17] Ngangodhadanna kottha Heliopolis ban Bubastis bakal mateya e dhalem paperrangan ban babine'anna bakal etawana.
[18] E bakto Sengko' nyabut kakobasa'anna Messer se edir-edirragi, Tahpanhes bakal pettengnga calemodan ban babine'anna bakal etawana.
[19] Kantha jareya Sengko' se ngokoma Messer, daddi reng-oreng jareya tao ja' Sengko' reya PANGERAN.”
[20] E tanggal petto' bulan settong e taon se kapeng sabellas bakto sengko' ban reng-oreng Isra'il laenna badha e pambuwangan, PANGERAN adhabu ka sengko',
[21] “He, manossa se ta' langgeng, lengngenna rato Messer bi' Sengko' la epotel epapotong. Tadha' oreng se abetbet otabana mecet lengngen jareya sopaja barasa pole ban sopaja kowada neggu' peddhang pole.
[22] Sengko' GUSTE Allah Se Mahatenggi ngoca'. Sengko' reya mosona rato Messer. Lengngenna dhu kalaja bi' Sengko' epapotonga, iya reya lengngenna se gi' kowat ban se la potong; peddhangnga bakal gaggara dhari tanangnga.
[23] Oreng Messer bi' Sengko' epabalessadana daddi sadunnya.
[24] Saellana jareya Sengko' makowada lengngenna Rato Babil; tanangnga epaneggu'a Tang peddhang. Tape lengngenna rato Messer bi' Sengko' epotella sampe' rato jareya ngadhudhu ban mate e adha'na rato Babil, mosona.
[25] Onggu, rato Messer bi' Sengko' epata'andhi'a kakowadan, dineng rato Babil epakowada. Mon Tang peddhang bi' Sengko' la ebagi ka rato Babil, ban rato Babil jareya ngacongngagi peddhang jareya ka Messer, reng-oreng bakal taowa ja' Sengko' reya PANGERAN.
[26] Oreng Messer bi' Sengko' epabalessadana daddi sadunnya. Daddi reng-oreng tao ja' Sengko' reya PANGERAN.”