[1] Yosiya yuswana ballung taon e bakto jumenneng rato Yehuda, ban marenta e Yerusalim tello polo settong taon abidda.
[2] Salerana alampa'agi se masenneng panggaliyanna PANGERAN, sarta nerowe Rato Daud, bangatowana, ban atoro' ka sakabbinna hokomma Allah kalaban gu-onggu.
[3] Saellana olle ballung taon se jumenneng rato, e bakto gi' ce' ngodhana, Yosiya molae abakte ka Allah se esemba bi' Rato Daud bangatowana. Pa' taon saellana jareya sakabbinna kennengnganna panyemba'anna brahala, ca-arcana Dewi Asyera, ban la-brahala laenna epaancor.
[4] Ca-arca ban la-brahala jareya epalejjar bi' reng-orengnga Yosiya, dineng serbuk jar-lejjaranna etabur e attassa koburanna reng-oreng se nyemba ka la-brahala jareya. Ba-mezba Ba'al ban ba-mezbana dupa se badha e jadhiya epagujur.
[5] Lang-tolangnga mam-imam se aladine la-brahala jareya eobbar e attassa ba-mezba jareya. Kalaban cara se kantha jareya Yerusalim ban Yehuda epapantes pole kaangguy abakte ka PANGERAN.
[6] Se kantha jareya elampa'agi keya e tha-kottha ban e ra-dhaera se la ancor e dhaerana Manasye, Efraim, ban Simeyon, sampe' ka Naftali e bagiyan dhaja.
[7] Ba-mezba ban ca-arcana Asyera e saantero Karaja'an Dhaja epagujur bi' Yosiya, ca-arcana ban ba-mezbana dupa epaancor kabbi. Saellana jareya Yosiya laju gubar ka Yerusalim.
[8] E taon se kapeng ballu bellas pamarenta'anna Yosiya, saellana panyemba'anna brahala e Padalemman Socce ban e saanterona nagara jareya la epatadha' kabbi, Yosiya ngerem oreng katello, epakon mateppa' Padalemman Soccena Allah. Oreng se katello jareya iya areya: Safan ana'na Azaliya, Ma'aseya gubennor Yerusalim, ban Yowah ana'na Yowahas, oreng se apangkat tenggi.
[9] Reng-oreng Lewi se ajaga Labangnga Padalemman Socce, massra'agi ka Imam Agung Hilkiya pesse ollena makompol. Pesse jareya dhari oreng Efraim ban Manasye, ban dhari ra'yat laenna e Karaja'an Dhaja, sarta dhari ra'yat Yehuda, Benyamin ban Yerusalim.
[10] Pesse jareya bi' Iman Agung Hilkiya epassra'agi ka oreng se katello se epassrae ajaga lalakon mateppa' Padalemman Socce jareya. Saellana jareya pesse gella' bi' oreng se katello jareya ebagi
[11] ka para tokang kaju ban tokang bato se kodu melle bato ban kaju se eangguya mateppa' ngon-bangonan se bi' to-rato Yehuda epanneng sampe' rosak.
[12] Reng-oreng se mateppa' Padalemman Socce jareya ce' jujurra; se ngapalae iya areya oreng Lewi kaempa: Yahat ban Obaja dhari kaom Merari, sarta Zakhariya ban Mesulam dhari kaom Kehat. Reng-oreng Lewi, se padha penter nabbu mosik,
[13] epassrae lalakon ngawase pangangko'anna han-bahan, ngapalae koli se alako e bagiyan lalakon se acem-macem, ngalakone orosan administrasi, ban ajaga labang.
[14] E bakto pesse sombangan gella' epakalowar dhari panyempennanna, Hilkiya manggi'i ketab Hokomma PANGERAN, iya areya kom-hokom se eparengngagi PANGERAN ka Mosa.
[15] Dhabuna Hilkiya ka Safan, “Kaula nemmo ketab Hokomma PANGERAN e Padalemman Socce,” ban ketab jareya laju eparengngagi ka Safan.
[16] Safan narema ketab jareya, laju nyabis ka rato pas mator, “Sadajana papakon ampon elampa'agi sadaja.
[17] Pesse se esempen e Padalemman Socce ampon epondhut, sareng ampon epassra'agi ka reng-oreng se alako sareng ka dhur-mandhurra.”
[18] Saellana jareya Safan mator pole, “Hilkiya ngatorragi ka'dhinto ka abdidalem.” Ketab jareya bi' Safan laju ebaca'agi ka rato.
[19] Meyarsa essena ketab jareya, rato laju nyebbit rasoganna lantaran sossa.
[20] Rato laju apareng papakon reya ka Hilkiya, Ahikam ana'na Safan, Abdon ana'na Mikha, Safan sekettaris nagara, ban ka Asaya ajudanna rato,
[21] “Kassa' atanya ka PANGERAN kaangguy sengko' ban reng-oreng se gi' badha e Isra'il ban Yehuda parkara essena ketab reya. PANGERAN duka ka sengko' ban ba'na lantaran bangatowana sengko' ban ba'na ta' ajalannagi kon-papakon se etoles e dhalem ketab reya.”
[22] Daddi Hilkiya, Ahikam, Abdon, Safan ban Asaya menta petodu ka oreng babine' se anyama Hulda. Hulda jareya nabbi se alenggi e kampong se anyar e Yerusalim. Rakana anyama Salum pottrana Tikwa, kompoyya Harhas. Hulda jareya se ngoros pangangguyya kabakteyan e Padalemman Socce. Saellana meyarsa katerranganna otosanna rato gella',
[23] Hulda makon reng-oreng jareya abali ka rato, manapa' pessen areya, “PANGERAN, Allah se esemba oreng Isra'il, adhabu,
[24] ‘Sengko' ngokoma Yerusalim ban pandhudhu' se badha e jadhiya kalaban babaston se esebbuttagi e dhalem ketab jareya se ebaca'agi ka rato.
[25] Reng-oreng jareya la mongkore Sengko' ban ngeba kurban ka ba-diba. Sabarang se elakone reng-oreng jareya mapeggel Tang ate. Sengko' peggel ka Yerusalim, ban peggella Tang ate ta' ekenneng paelang.
[26] Tape parkara Rato Yosiya, areya' Tang pessen, pessenna PANGERAN, Allahna Isra'il: Saellana ba'na ngedhing apa se esebbuttagi e dhalem ketab jareya,
[27] ba'na atobat ban marendha e adha'na Sengko'. Sengko' la ngoca' ngokoma Yerusalim ban pandhudhu' se badha e jadhiya, tape e bakto ba'na ngedhing ja' Sengko' madhatengnga okoman jareya, ba'na nanges ban bit-nyebbit kalambina menangka tandha ja' ba'na sossa. Sengko' la ngedhing du'ana ba'na,
[28] daddi okoman ka Yerusalim bi' Sengko' ta' ejalannagiya saabidda ba'na gi' odhi'. Bi' Sengko' ba'na eedinana mate kalaban taremtem.’ ” Reng-oreng otosan jareya laju abali ka rato ban ngatorragi sen-pessen gella'.
[29] Rato Yosiya nembali para pamimpin Yehuda ban Yerusalim,
[30] laju meyos abareng ban reng-oreng jareya ka Padalemman Socce. Para imam, oreng Lewi ban sakabbinna ra'yat, se mesken ban se sogi padha noro' ka Padalemman Socce. E adha'na reng-oreng jareya kabbi, e seddi'na pelar se malolo esadhiya'agi kaangguy rato, rato ngadek, laju maossagi epakaja sakabbinna ketab parjanjiyan se etemmo e Padalemman Socce jareya. Saellana jareya rato abadhi parjanjiyan ban PANGERAN se anyata'agi ja' salerana ta'ada ka Pangeran sarta alampa'agiya sakabbinna papakon ban hokomma kalaban gu-onggu ate ban sokmana, sarta alampa'agiya rat-saradda parjanjiyan e antarana PANGERAN ban ommadda se kasebbut e dhalem ketab jareya.
[32] Reng-oreng Benyamin ban sakabbinna oreng laen se badha e Yerusalim epakon ajanji ta'ada ka parjanjiyan jareya. Daddi reng-oreng Yerusalim ta'at ka atoran-atoran e dhalem parjanjiyan jareya, iya areya parjanjiyan e antarana bangsa jareya ban Allahna bangatowana.
[33] Rato Yosiya maancor la-brahala se majitjit, se badha e man-dhimman, e kennengngan se tamaso' dhaerana oreng Isra'il. Saellana jareya ra'yat ewajibbagi abakte ka PANGERAN, Allahna bangatowana. Daddi saabidda Yosiya gi' odhi', ra'yat paggun esto ka PANGERAN.