[1] Hizkiya jumenneng rato Yehuda e bakto yuswana sagame' taon, ban marenta e Yerusalim sanga lekor taon abidda. Ebuna iya areya Abiya pottrana Zakhariya.
[2] Hizkiya nerowe Rato Daud, bangatowana, alampa'agi pa-apa se masenneng PANGERAN.
[3] E bulan settong e taon se kapeng settong e dhalem pamarenta'anna, Hizkiya mokka' bang-labangnga Padalemman Socce pas makon sopaja epateppa'.
[4] Mam-imam ban oreng Lewi epakompol e taneyan bagiyan temorra Padalemman Socce jareya;
[5] e jadhiya Hizkiya abu-dhabu bi' reng-oreng jareya. Dhabuna, “Ba'na, reng-oreng Lewi, kodu alako malolo ngabdi ka PANGERAN ban masocce Padalemman Socce, Allahna bangatowana ba'na. Sabarang se manajjis padalemman reya kodu epanyengla.
[6] Bangatowana sengko' ban ba'na ta' esto ka PANGERAN, Guste Allahna, sarta ngalakone se ta' ekasokane Pangeran. Bangatowana sengko' ban ba'na ta' eparduli ka Pangeran, bariya keya Padalemmanna.
[7] Bang-labangnga Padalemman Socce etotop, mar-damarra epate'e. Ta' ngobbar dupa e Padalemman Socce, ban ta' ngatorragi kurban obbaran ka Allah se esemba oreng Isra'il.
[8] PANGERAN se duka laju ngokom Yehuda ban Yerusalim. Ban ba'na padha tao kabbi kantha apa okoman se elampa'agi bi' Pangeran, se andaddiyagi oreng padha tako' ban marenges.
[9] Eppa'na sengko' ban ba'na kabbi padha seda e dhalem paperrangan, ban ana' binena sengko' ban ba'na eangko' egabay tawanan.
[10] Sateya sengko' agabaya parjanjiyan ban PANGERAN, Allahna Isra'il, me' olle Pangeran ta' duka pole ka sengko' ban ba'na kabbi.
[11] Mara, na', ja' rot-panyorot pole, sabab ba'na se epele PANGERAN esoro abakte ban ngabdi ka salerana sarta ngobbar dupa ban mimpin ra'yat sopaja padha'a ajalannagi kabakteyan.”
[12] Reng-oreng Lewi se badha e jadhiya bakto jareya iya areya: Dhari kaom Kehat: Mahat ana'na Amasai, ban Yowël ana'na Azarya Dhari kaom Merari: Kis ana'na Abdi ban Azarya ana'na Yehalele'el Dhari kaom Gerson: Yowah ana'na Zima, ban Eden ana'na Yowah Dhari kaom Elisafan: Simri ban Yeiyel Dhari kaom Asaf: Zakhariya ban Matanya Dhari kaom Heman: Yehiyel ban Simei Dhari kaom Yedutun: Semaya ban Uziyel.
[15] Saellana jareya reng-oreng Lewi laenna pas epakompol keya, ban reng-oreng jareya laju padha nyocce'e aba'na. Saellana jareya, menorot dhabuna rato, para imam maso' ka dhalem Padalemman Socce, sarta laju molae nyocce'e Padalemman jareya menorot kom-hokomma PANGERAN. Sabarang se najjis epakalowar ka palataran Padalemman Socce. Dhari jadhiya rang-barang buru bi' reng-oreng Lewi egiba ka Cora Kidron se badha e lowar kottha.
[17] Lalakon jareya emolae tanggal settong bulan settong. E tanggal ballu' taneyanna Padalemman Socce sampe' ka balay adha'anna la padha mare esocce'e kabbi. Saellana jareya reng-oreng jareya nyocce'e sakabbinna bangonan jareya abidda ballung are aggi', sampe' mare kabbi e tanggal nem bellas bulan jareya.
[18] Reng-oreng Lewi jareya laju ngatore oneng ka Rato Hizkiya, atorra, “Padalemman Socce ampon lastare esocce'e sadaja, tamaso' mezbaepon kurban obbaran, mejana roti sasajin, sareng sadajana pakakassa.
[19] Kas-pakakas se epanyengla sareng Rato Ahas e bakto salerana ta' marduli PANGERAN e dhalem jaman pamarenta'annepon, jugan ampon epabali sadaja. Sadaja pakakas gapaneka ampon eteptebbagi pole malolo kaangguy PANGERAN, samangken ampon badha e adha'epon mezba.”
[20] Rato Hizkiya ta' anante' bit-abit, reng-oreng se tamaso' pamimpinna masarakat epakompol, saellana jareya rato ban reng-oreng jareya laju meyos ka Padalemman Socce areng-sareng.
[21] Menangka kurban pangamponanna dusa kaangguy kalowargana rato ban ra'yat Yehuda, sarta kaangguy nyocce'e Padalemman Socce, reng-oreng jareya ngeba sape lake' papetto', dumba lake' papetto', budhu'na dumba papetto', ban embi' lake' papetto'. Rato makon mam-imam toronanna Harun ngatorragi ban-keban jareya e attassa mezba menangka kurban obbaran.
[22] Pe-sape jareya esambelli, dharana laju eserammagi ka mezba bi' mam-imam jareya. Samarena jareya dumba se papetto' ban budhu'na dumba se papetto' gella' laju epakantha jareya keya.
[23] Dhi-budhina mam-imam jareya mondhut embi' se papetto' gella', laju ebakta ka rato ban ra'yat se teppa'na ngalakone kabakteyan e jadhiya; rato jareya laju nompangngagi astana e attassa bi'-embi' jareya, bariya keya ra'yadda kabbi.
[24] Saellana jareya, bi'-embi' jareya esambelli bi' mam-imam gella', dineng dharana etotta' ka mezba menangka kurban pangamponanna dusana ra'yat kabbi, sabab rato makon sopaja ebadha'agi kurban obbaran ban kurban pangamponanna dusana ra'yat Isra'il kabbi.
[25] Menorot du-petoduna PANGERAN ka Daud se eparengngagi kalaban parantara'anna Nabbi Gad se alako kaangguy rato, sarta kalaban parantara'anna Nabbi Natan, rato nyaba' reng-oreng Lewi e Padalemman Socce, se epanabbu calempong ban gambus,
[26] akantha se elampa'agi Rato Daud. Bariya keya para imam se esaba' e jadhiya epanope tarompet.
[27] Hizkiya apareng tandha sopaja opacara ngatorragi kurban emolae. Sabatara kurban eatorragi, reng-oreng molae anyanye pojiyan ka PANGERAN, ban tokang tabbuna mosik mamonye tarompet ban pakakas mosik laenna.
[28] Rato Hizkiya ban reng-oreng se badha e jadhiya padha asojud abakte ka PANGERAN, sabatara para tokang nyanyena terros anyanye, ban tokang tabbuna mosik terros mamonye mosigga sampe' sakabbinna kurban jareya la ekenneng obbar kabbi sampe' tadha' karena.
[30] Rato ban para pamimpinna masarakat makon reng-oreng Lewi anyanye kaangguy PANGERAN gu-lagu pojiyan karanganna Daud ban Nabbi Asaf. Reng-oreng padha anyanye ce' gumbirana kabbi sambi adekkong ban nyemba ka Allah.
[31] Saellana jareya Hizkiya adhabu, “Sarrena sateya ba'na la etantowagi malolo kaangguy ka PANGERAN, daddi menangka kurban sokkorra ba'na, ba'na kodu ngeba kurban ka Padalemman Socce.” Reng-oreng se badha e jadhiya laju padha ngeba sakabbinna tor-ator jareya, la'-mala' badha se sokalella padha ngeba ban-keban se eatorragiya menangka kurban obbaran.
[32] Reng-oreng jareya ngeba sape lake' pettong polo, dumba saratos, budhu'na dumba dhu ratos, se padha eatorragi menangka kurban obbaran ka PANGERAN.
[33] Laen dhari jareya reng-oreng jareya gi' ngeba sape lake' nem atos ban dumba tello ebu se ekagabaya tor-ator ka Pangeran, se ekakana areng-bareng bi' reng-oreng se padha hadir e jadhiya.
[34] Mam-imam se la nyocce'e aba'na ta' cokop bannya'na kaangguy ngolet sakabbinna keban jareya. Daddi laju ebanto bi' reng-oreng Lewi, sabab oreng Lewi aestowan dhari mam-imam e dhalem neggu'i atoran panyocceyanna aba'. Reng-oreng Lewi jareya teptep nolonge sampe' dhi-budhina la cokop bannya'na imam se nyocce'e aba'na.
[35] Salaenna kurban obbaran, para imam ngatorragi keya gajina kurban sokkoran se ekakan ra'yat. Mam-imam jareya ngatorragi anggur se eselen epabareng ban kurban obbaran jareya. Daddi kabakteyan e Padalemman Socce ebadha'agi pole.
[36] Daddi Rato Hizkiya ban ra'yadda padha senneng sabab e dhalem bakto se ta' abit Pangeran abanto sampe' jareya kabbi kalakon.