[1] Ta' saapa abidda dhari jareya tantara Mo'ab ban Amon, abareng ban sakutuna iya areya tantara Meunim, nyerrang Yehuda.
[2] Pas badha oreng se manapa' kabar jareya ka Rato Yosafat, “Ce' bannya'na tantara Edom dhari temorra Tase' Mate aloroga junandalem, Guste. Hazezon-Tamar ampon ekobasae moso gapaneka.” (Hazezon-Tamar reya nyama laenna se eangguy ka En-Gedi.)
[3] Yosafat pas tako', sarta laju adu'a nyo'on petodu ka PANGERAN. Saellana jareya ra'yadda eparenge parenta sopaja padha apowasa kabbi.
[4] Dhari saneyap kottha e Yehuda oreng entar ka Yerusalim kaangguy menta tolong ka PANGERAN.
[5] Reng-oreng jareya abareng ban reng-oreng Yerusalim akompol e palataran se anyar e Padalemman Socce. Rato Yosafat ngadek e adha'na reng-oreng jareya,
[6] sarta adu'a epakaja, “Adhu, GUSTE Allah, Pangeranna bangatowa abdidalem sadaja! Junandalem Allah e sowarga sareng marenta sadajana bangsa e bume. Junandalem kobasa sareng kowat; tadha' oreng settonga se bisa alaban ka Junandalem.
[7] Junandalem Allah abdidalem. E bakto ommattepon Junandalem, bangsa Isra'il, dhateng ka nagara ka'dhinto, Junandalem ngojuk reng-oreng se e bakto gapaneka badha e ka'dhinto. Nagara ka'dhinto sareng Junandalem laju eparengngagi ka toronanna Ibrahim, sahabattepon Junandalem, epadaddi gadhuwannepon kantos salanjangnga.
[8] Toronannepon Ibrahim gapaneka ampon enneng e ka'dhinto sareng maddek padalemman se ebadhi kennengnganna oreng abakte ka Junandalem. Reng-oreng gapaneka oneng
[9] ja' manabi narema okoman lantaran sa-dusana, sareng ekenneng paperrangan, panyaket otaba kalaparan, reng-oreng gapaneka kengeng nyabis ka Junandalem sareng manjeng e adha'epon padalemman kennengnganna kabakteyan ka'dhinto. Manabi ngadhebbi karekongan, reng-oreng gapaneka kengeng adu'a ka Junandalem, dineng Junandalem tanto meyarsa'agi sareng apareng partolongan.
[10] Samangken bangsa Amon, Mo'ab sareng Edom alorok bangsa ka'dhinto. E bakto bangatowa abdidalem sadaja dhateng dhari Messer, sareng Junandalem ta' eedine ngennengnge nagarana sa-bangsa gapaneka. Daddi bangatowa abdidalem sadaja lebat jalan se moter. Bangsa Amon ta' epaancor, jugan bangsa Mo'ab sareng Edom.
[11] Samangken, kadi ka'dhinto se ejalannagi sa-bangsa gapaneka ka bangsa abdidalem, ngojuga bangsa abdidalem dhari nagara paparengngepon Junandalem ka'dhinto.
[12] Junandalem Allah abdidalem! Okommagi sa-bangsa ka'issa', sabab abdidalem ta' kobasa ngadhebbi tantarana moso se saka'dhinto bannya'epon se nyerranga abdidalem sadaja. Abdidalem ta' oneng kodu kadi ponapa, daddi abdidalem sadaja nyander ka Junandalem nyo'ona tolong.”
[13] Sabatara jareya reng-oreng lalake'an Yehuda ban binena sarta na'-ana'na padha manjeng e adha'na Padalemman Socce.
[14] E antarana oreng se bannya' jareya badha oreng Lewi se anyama Yahaziyel, ana'na Zakhariya dhari kaom Asaf e dhalem garis toronanna Benaya, Yeiyel, Matanya. E bakto jareya Yahaziyel ekobasae Errohna PANGERAN,
[15] laju adhabu, “Guste Rato Se Molja sareng tan-taretan sadajana. PANGERAN adhabu sopaja junandalem sareng sadajana ra'yat ja' sampe' kaelangan pangarep otabana tako' ngadhebbi tantarana moso se bannya' ka'dhissa'. Sabab se aperrang Allah, banne junandalem sareng ra'yat.
[16] Lagguepon, e bakto moso lebat e lorong ga'-ongga'an e Zis, pas serrang. Junandalem badhi tapapaga sareng moso ka'dhinto e konco'na cora se nojju ka sagara beddhi e seddi'na Yeruwel.
[17] Junandalem sareng ra'yat ta' mabi aperrang e dhalem paperrangan ka'dhinto. Meyos saos sadajana ka kennengngan se ampon etantowagi, pas nante' e kennengngan gapaneka. Junandalem sareng ra'yat bakal ngoladana PANGERAN apareng kamennangan ka junandalem. He reng-oreng Yehuda ban Yerusalim, ba'na ta' osa kene' ate otaba tako'. Mara maso' ka dhalem paperrangan jareya, PANGERAN tanto nolonge ba'na!”
[18] Rato Yosafat laju asojud. Ra'yadda padha noro' asojud kabbi nyemba ka PANGERAN.
[19] Reng-oreng Lewi dhari kaom Kehat ban Korah manjeng, laju asorak moji PANGERAN, Allahna Isra'il.
[20] Kalagguwanna gi' petteng, ra'yat kalowar terros ka sagara beddhi e seddi'na Tekowa. E bakto mangkada, Yosafat apessen kantha reya, “Ra'yat Yehuda ban Yerusalim! Paparcaja ka GUSTE Allahna ba'na, tanto ba'na kellar aperrang. Payakin ka sabarang se edhabuwagi bi-nabbina ba'na, tanto ba'na ahasel!”
[21] Saellana arembak ban ra'yat, rato laju makon reng-oreng se tamaso' padhuwa sowara ngangguy saragamma se biyasana eangguy e dhalem ra-opacara kusus e dhalem agama. Padhuwa sowara jareya kodu abaris epabagus ban epalebur e adha'na barisanna tantara, sambi anyanye, “Molja'agi PANGERAN! Kataresna'anna tadha' pegga'na!”
[22] E bakto padhuwa sowara jareya molae asorak anyanye, tantarana moso se teppa'na nyerrang bi' PANGERAN epasalbut.
[23] Tantara Amon ban Mo'ab nyerrang tantara Edom sampe' tadha' karena. Saellana jareya tantara Amon ban Mo'ab padha saleng serrang dibi', aperrang amba' pate.
[24] E bakto tantara Yehuda napa' ka manara panjaga'an e sagara beddhi ban ngabassagi kennengnganna mosona, reng-oreng Yehuda jareya nangale'e mayyidda mosona ajalamperran e tana. Tadha' settonga dhari mosona jareya se gi' odhi'.
[25] Yosafat ban reng-orengnga pas padha entar arampas barangnga moso. Se ekenneng rampas ce' bannya'na; ebin, parlengkaban, kalambi, ban rang-barang laenna se padha arga. Saellana makompol rang-barang jareya tello are abidda, rang-barang laenna gi' bannya', daddi tapaksa edina.
[26] E are se kapeng empa' kabbi padha akompol e Cora Pojiyan, laju moji PANGERAN polana sabarang se la elampa'agi Salerana. Lantaran jareya cora jareya enyamae “Pojiyan”.
[27] Yosafat laju mimpin sakabbinna pasukanna abali ka Yerusalim kalaban gumbira, sabab PANGERAN la makala'agi mosona.
[28] Sanapa'na ka kottha, reng-oreng jareya abaris ka Padalemman Socce eerenge calempong ban tarompet.
[29] Ra-nagara laenna padha tako' kabbi e bakto ngedhing baramma PANGERAN se la makala so-mosona Isra'il jareya.
[30] Daddi Yosafat bisa marenta nagarana kalaban taremtem, ban PANGERAN marenge rato jareya kataremtemman e saantero nagarana.
[31] Yosafat jumenneng rato e bakto yuswana tello polo lema' taon, ban marenta e Yerusalim sagame' taon abidda. Ebuna iya areya Azuba pottrana Silhi.
[32] Yosafat padha ban Asa, ramana, alampa'agi sabarang se bagus e dhalem pangoladanna PANGERAN.
[33] Tape kennengnganna panyemba'anna brahala se badha neng e man-dhimman ta' epaancor. Ra'yat gi' ta' mantep onggu atena se abakte ka Allahna bangatowana.
[34] Careta laenna parkara Yosafat, dhari awwal sampe' ka aherra pamarenta'anna, ecathet e dhalem Caretana Yehu Pottrana Hanani se badha e dhalem ketab Sajarana To-rato Isra'il.
[35] E settong bakto Yosafat rato Yehuda akanca ban Ahaziya rato Isra'il, se bannya' alampa'agi kajahadan.
[36] E palabbuwan Ezion-Geber rato se kadhuwa jareya abadhi pal-kapal eangguy alajar ka Tarsis.
[37] Tape Nabbi Eliyezer pottrana Dodawa dhari kottha Maresa ngatore parengeddan ka Yosafat, atorra, “Sarrena junandalem akanca sareng Ahaziya, PANGERAN badhi ngancora pa-ponapa se elampa'agi junandalem.” Daddi pal-kapal gella' laju ancor kabbi, sampe' padha ta' bisa alajar sakale.