[1] E bakto la sogi tor kasohor, Yosafat rato Yehuda ajudhuwagi sala settong e antarana anggota kalowargana ban sala settong e antarana anggota kalowargana Ahab rato Isra'il.
[2] Saellana olle pan-barampan taon dhari jareya, Yosafat namoy ka Ahab e kottha Samaria. Menangka panghormadan ka Yosafat ban rombonganna Ahab mabadha pesta sarta makon nyambelli dumba ban sape sabannya'na. E dhalem kasempadan jareya Ahab ngajak Yosafat alorok ka kottha Ramot e Gileyad.
[3] Dhabuna Ahab, “Panjennengngan ponapa kasokan asareng kaula alorok kottha Ramot?” Saodda Yosafat, “Sae, tantara kaula epakompola sareng tantarana panjennengngan. Ngereng aperrang areng-sareng.
[4] Namong se sae ngereng samangken nyo'on petodu ka PANGERAN dhimen.”
[5] Daddi Ahab laju makompol bi-nabbi se bannya'na ra-kera pa' ratos oreng. Dhabuna Ahab ka bi-nabbi jareya, “Sengko' ba' olleya alorok kottha Ramot?” “Kengeng!” atorra bi-nabbi jareya. “Allah badhi marengngagi kottha gapaneka ka junandalem.”
[6] Tape Yosafat mareksane pole, “Ponapa e ka'dhinto tadha' nabbi laenna se kengeng nyo'onnagi petodu ka PANGERAN?”
[7] Dhabuna Ahab, “Gi' badha settong, Mikha pottrana Yimla. Namong kaula baji' ka nabbi gapaneka, sabab ta' oneng aramal barang se sae kaangguy kaula; ramalanna juba' ros-terrosan.” “Ampon ja' adhabu sapaneka!” dhabuna Yosafat.
[8] Daddi Ahab nembali ponggaba karaton kasorang, epakon duli'i ngone'e Mikha.
[9] E bakto jareya Ahab ban Yosafat ngagem pangangguy kabessaran, alenggi e korse karaja'an e kennengnganna pagebba'anna gandum e adha'na labang saketheng Samaria, sabatara para nabbi padha ngadhep sarta padha ngatorragi ramalanna.
[10] Badha settong e antarana, se anyama Zedekiya pottrana Kena'ana, abadhi dhu'-tandhu' dhari besse, laju mator ka Ahab, “Ka'dhinto dhabuna PANGERAN, ‘Ba'na bakal mokola ban makala'a Siria ngangguy dhu'-tandhu' kantha reya.’ ”
[11] Bi-nabbi se laen padha abendherragi jareya laju padha mator, “Ampon, eatore junandalem alorok Ramot, junandalem tanto ahasel. PANGERAN badhi apareng kamennangan ka junandalem.”
[12] Sabatara jareya, otosan se ngone'e Mikha rowa, ngoca' ka Mikha, “Sadajana nabbi laenna aramal ja' rato badhi mennang. Tantona panjennengngan aramal se sae jugan akadi se laen.”
[13] Tape Mikha adhabu, “Bit asmana PANGERAN se odhi', kaula pera' ngoca'agiya ponapa se edhabuwagi Allah ka kaula!”
[14] Sanapa'na Mikha ka ajunanna Rato Ahab, rato jareya laju mareksane, “Apa sengko' ban Rato Yosafat olle alorok Ramot, apa enja'?” “Eatore!” atorra Mikha. “Junandalem tanto mennang. PANGERAN aparenga kamennangan ka junandalem.”
[15] Dhabuna Ahab, “Mon ba'na acaca ban sengko' bit asmana PANGERAN, ngoca' sabendherra. Barampa kale sengko' kodu maenga' ba'na parkara jareya?”
[16] Atorra Mikha, “Abdidalem nengale tantara Isra'il car-kalacer e nong-gunong, akadi dumba se tadha' tokang ngowanna. PANGERAN laju adhabu, ‘Reng-oreng reya tadha' pamimpinna. Dina me' olle mole sampe' salamet napa' ka bengkona.’ ”
[17] Ahab laju adhabu ka Yosafat, “Gu ta' lerres ca'na kaula? Mikha manabi aramal kaula ta' oneng sae. Ramalanna juba' malolo!”
[18] Mikha mator pole, “Samangken ngereng peyarsa'agi ponapa dhabuepon PANGERAN! Abdidalem nengale PANGERAN alenggi e tahtana e sowarga, dineng sadajana malaekadda padha ngadek e seddi'anna.
[19] PANGERAN adhabu, ‘Sapa se nyaca'ana Ahab me' olle endha' entar aperrang ban mate e Ramot e Gileyad?’ Saodda kat-malaekat gapaneka acem-macem.
[20] Dhi-budhina badha settong erroh se maju. Erroh gapaneka nyander ka seddi'na PANGERAN, laju mator, ‘Abdidalem se nyaca'ana.’ ‘Baramma carana?’ dhabuna Pangeran.
[21] Saodda erroh gapaneka, ‘Sareng abdidalem bi-nabbina Ahab epacaca'a lecek.’ Dhabuna PANGERAN, ‘Iya mara, kassa'. Ba'na tanto ahasel nyacae Ahab jareya.’ ”
[22] Mikha laju adhabu pole, “Daddi kadi ka'dhinto se salerressa. Sareng PANGERAN bi-nabbiepon junandalem epalecek ka junandalem sabab PANGERAN ampon neptebbagi madhatengnga balai ka junandalem!”
[23] Nabbi Zedekiya laju nyander nyemma'e Mikha; Mikha laju etamper mowana, sambi ngoca', “Ta' kera Errohepon PANGERAN adinggallagi sengko' ban adhabu ka ba'na.”
[24] Dhabuna Mikha, “Sampeyan bakal onenga dibi' buktena mon sampeyan maso' ka settong kamar ngetegga.”
[25] “Tangkep oreng jareya!” dhabuna Rato Ahab, “giba ka Amon, walikota, ban ka Pangeran Yowas.
[26] Soro maso'agi ka penjara. Pakane ban enome sakone' bai, sampe' sengko' mole salamet dhari perrang.”
[27] Dhabuna Mikha, “Manabi junandalem abali salamet, arteepon PANGERAN ta' adhabu ka abdidalem. Sadaja se badha e ka'dhinto daddi saksena.”
[28] Saellana jareya Ahab rato Isra'il ban Yosafat rato Yehuda mangkat alorok kottha Ramot e Gileyad.
[29] Dhabuna Ahab ka Yosafat, “Kaula nyamara, noro'a aperrang, panjennengngan paggun ngagem pangangguy kabessaranna.” Daddi rato Isra'il nyamar e bakto meyos aperrang.
[30] E bakto jareya para panglimana pasukan kareta perrangnga Siria bi' ratona eparenge parenta sopaja ta' nyerrang oreng laen kajabana rato Isra'il malolo.
[31] Daddi, e bakto ma-panglima jareya nangale'e Rato Yosafat, kabbi padha nyangka jareya rato Isra'il. Daddi reng-oreng jareya laju nyerrang Yosafat. Tape Yosafat acerreng, laju etolong bi' GUSTE Allah se pas mabiluk serrangan jareya ka laenna.
[32] E bakto para panglimana pasukan kareta perrangnga Siria apangrasa ja' jareya banne rato Isra'il, laju padha ambu se nyerrang.
[33] Kabendherran badha parjurit Siria se ngocol panana ta' kalaban badha se etojju. Tape pana jareya ngenneng ka Ahab, terbas ka pangangguy perrangnga e bagiyan sambunganna. “Sengko' ekenneng!” cerrengnga Ahab ka kusirra kareta perrangnga. “Mara abiluk, sengko' giba kalowar dhari paperrangan reya!”
[34] Tape lantaran perrang gi' ta' terep Rato Ahab paggun ngadek sambi nyandhar e dhalem karetana, addhep ka tantara Siria. E bakto are compet, Ahab seda.