[1] Исусыс локтіс аслас карӧ. Сы сьӧрын мунісӧ Сылӧн велӧтчиссес.
[2] Шоччисян лунӧ Исусыс пондіс велӧтны синагогаын. Кывзіссес коласісь унаӧн дивуйтчӧмӧн баитісӧ: «Кысянь Сылӧн эта? Кытшӧм сэтшӧм уна мывкыд Сылӧ сетӧм? Кыдз эттшӧм адззывлытӧммесӧ керӧ Аслас киэзӧн?
[3] Абу разь Сія черӧн уджалісь, Мариялӧн зон? Абу разь Сія Яковлӧн, Иосиялӧн, Иудалӧн да Симонлӧн вон? Озӧ разь олӧ миян коласын Сылӧн сойес?» И нія эзӧ веритӧ Сылӧ.
[4] Исусыс нылӧ висьталіс: «Енсянь юӧртісьӧс быдлаын бурӧ пуктӧны, озӧ дзир аслас карын, ас увтырын да ас гортын».
[5] Сія эз вермы керны сэтчин адззывлытӧммесӧ, дзир кынымкӧ шогалісь вылӧ киэсӧ пуктылӧмӧн веськӧтіс нійӧ.
[6] Исуссӧ диво кутіс, мыля нія эзӧ веритӧ. Исусыс ветлӧтіс матісь посаддэзӧт да велӧтіс.
[7] Сія корис дынас даскык велӧтчисьсӧ. Нылӧ сетіс сэрпӧсь ловвезӧс вашӧтан вын. Сэсся кык мортӧн пондіс ыставны нійӧ велӧтны отирсӧ.
[8] Туйӧ петікӧ ӧтік бедься сьӧраныс нем эз тшӧкты босьтны. Висьталіс: «Нянь, кӧзича, сьӧм,
[9] вежан кӧмкӧт да паськӧм эд босьтӧ».
[10] Исусыс нылӧ висьталіс: «Кытшӧм керкуӧ пырат, одзлань мунтӧдз олӧ сэтӧн.
[11] Кытчӧ тіянӧс озӧ лэдзӧ да кытӧн озӧ кывзӧ, сэтісь петтӧн пыркӧтӧ коккезсиныт буссӧ. Суд Лунас сія лоас ны вылӧ висьталӧм. Ме тіянлӧ быльсӧ висьтала: нылӧ Суд Лунас лоас сьӧкытжык Содом да Гоморра каррезся».
[12] Велӧтчиссес мунісӧ да висьтасисӧ, медбы отирыс асланыс умӧль керӧммез дынісь бергӧтчисӧ Енлань.
[13] Уна сэрпӧсь лолӧс нія вашӧтісӧ отирись да виӧн мавтӧмӧн веськӧтісӧ уна шогалісьӧс.
[14] Исусыс йылісь баитісӧ быдлаын. Кывсьӧм и Ирод ӧксулӧ. Отирыс шуисӧ: «Сія Пыртісь Иоан ловзьӧм. Сійӧн Сія вермӧ керны уна адззывлытӧмсӧ».
[15] Мӧдіккез баитісӧ: «Сія Илля». Мукӧдыс шуисӧ: «Сія кӧркӧся кодь Енсянь юӧртісь».
[16] Иродыс кыліс этӧ да шуис: «Сія Иоаныс ловзьӧм, кӧдалісь ме орӧті юрсӧ».
[17] Иродыс эд кӧркӧ тшӧктӧм вӧлі кутны Иоансӧ да пуксьӧтны Иродиада понда, кӧда вӧлӧм Иродыс Филип вонлӧн инь. Иродыс гӧтрасьӧм сы вылын.
[18] Иоаныс жӧ баитлӧм Иродыслӧ: «Оз позь тэныт овны аслат вонлӧн инькӧт».
[19] Сысянь Иродиадаыс лӧгасьӧм Иоаныс вылӧ и мӧдӧм сійӧ вийны, но абу вермӧм нем керны.
[20] Иродыс тӧдӧм: Иоаныс Ен сьӧрті веськыта олісь да вежа морт. Сія полӧм Иоансис да сійӧ дорйӧм. Сія уна керӧм Иоанлӧн висьталӧм сьӧрті. Иродлӧ гленитчӧм кывзыны сійӧ.
[21] Иродиадалӧ лӧсяліс сэтшӧм луныс, кӧр позис вийны Иоансӧ. Иродыс порйӧтны ассис чужан лунсӧ рочалӧм юраліссесӧ, воиннэзӧн веськӧтліссесӧ да Галилеяись бӧрйӧм пӧриссесӧ.
[22] Иродиадаыслӧн нылыс локтӧм ны дынӧ да йӧктӧм. Йӧктӧмыс гленитчӧм Иродыслӧ да сыкӧт пукаліссезлӧ. Ӧксу нывкаыслӧ висьталӧм: «Кор менчим, мый тэныт колӧ, ме сета тэныт».
[23] Иродыс сетӧм сылӧ кыв: «Сета тэныт быдӧс, мый коран, аслам юраланінісь нельки джын мусӧ».
[24] Нывкаыс петӧм да юалӧм мамыслісь: «Мый корны?» Мӧдыс висьталӧм: «Пыртісь Иоанлісь юрсӧ».
[25] Нывкаыс сэк жӧ перыта мунӧм ӧксуыс дынӧ да корӧм: «Ӧні жӧ вай меным бекӧрын Пыртісь Иоанлісь юрсӧ».
[26] Иродсӧ гажтӧмыс кутӧм, но отир одзын сетӧм кыв кузя абу керсьӧм бӧрлань.
[27] Сэк жӧ ӧксуыс ыстӧм мортӧс да тшӧктӧм вайны Иоанлісь юрсӧ.
[28] Мӧдыс мунӧм да сылісь юрсӧ орӧтӧм, вайӧм сійӧ бекӧрын да сетӧм нывкаыслӧ. Нывкаыс юрсӧ сетӧм аслас мамлӧ.
[29] Иоанлӧн велӧтчиссес кылӧмась лоӧмыс йылісь. Нія локтӧмась, босьтӧмась сылісь шойсӧ да дзебӧмась.
[30] Апостоллэс бертісӧ Исус дынӧ да висьтасисӧ быдӧс, мый керисӧ да мыйӧ велӧтісӧ отирсӧ.
[31] Сія нылӧ висьталіс: «А ӧні мунӧ ӧтнаныт, кытӧн некин абу, да шоччисьыштӧ». Ныкӧт пыр вӧлі уна отир, ӧтіккез мунлісӧ, мӧдіккез вовлісӧ, сійӧн нія эзӧ ештӧ нельки сёйны.
[32] Нія ӧтнаныс уйисӧ пыжын овтӧминӧ.
[33] Уна отир тӧдісӧ нійӧ да казялісӧ нылісь уйӧмсӧ. Быдӧс каррезісь отир котӧртісӧ овтӧминас да локтісӧ сэтчин нысся одзжык.
[34] Исусыс чеччис пыжсис да казяліс отирсӧ. Сылӧ жаль вӧлі отирсӧ, нія эд вӧлісӧ кыдз баля чукӧр, кӧдналӧн абу видзӧтісьныс. Сія нійӧ пондіс унаӧ велӧтны.
[35] Дыр мыйись велӧтчиссес сибӧтчисӧ Исусыс дынӧ да шуисӧ: «Кадыс уна ни, а эстӧн овтӧмин.
[36] Ысты отирсӧ матісь посаддэзӧ да оланіннэзӧ небны аслыныс сёянсӧ».
[37] Сія нылӧ висьталіс: «Тійӧ сетӧ нылӧ сёйны». Велӧтчиссес Сылӧ шуисӧ: «Вермам разь ветлыны да небны няньсӧ сымда отирыслӧ? Сьӧмыс эд колӧ кык сё динарий, медбы вердны быдӧннысӧ!»
[38] Исусыс нылісь юаліс: «Мымда тіян няньныт? Мунӧ видзӧтӧ». Нія видзӧтісӧ да висьталісӧ: «Вит нянь да кык чери».
[39] Исусыс тшӧктіс пуксьӧтны быдӧннысӧ зелёнӧй турун вылас чукӧррезӧн.
[40] Отирыс пуксисӧ лёдззезӧ сёӧн да витдас мортӧн.
[41] Исусыс босьтіс вит няньсӧ кык черинас. Енӧжӧ видзӧтӧмӧн бласлӧвитіс сёянсӧ, чеглаліс няньсӧ да сетіс велӧтчиссеслӧ, а нія ─ отирыслӧ. Кык черисӧ Сія торйӧтіс быдӧнныслӧ.
[42] Отирыс сёйисӧ пӧттӧдз.
[43] Кольӧм нянь торресӧ да чери торресӧ ӧктісӧ даскык куд тырйӧн.
[44] Сёйиссес вӧлісӧ вит сюрс гӧгӧр ай морт.
[45] Сэк жӧ Исусыс тшӧктіс ассис велӧтчиссесӧ пуксьыны пыжӧ да вуджны ты мӧдӧрас Вифсаидаӧ, а Ачыс кольччис лэдзны отирсӧ.
[46] Исусыс лэдзӧм отирсӧ да кайӧм керӧс вылӧ кеймыны.
[47] Рытнас пыжыс вӧлі ты шӧрас, Исусыс му вылас вӧлі ӧтнас.
[48] Сія казялӧм, велӧтчиссеслӧн садьныс бырис сынны тӧв паныт. Асъяпоннас Сія иньдӧтчис подӧн ты вылӧттяс. Исусыс сибаліс велӧтчиссес дынӧ да мӧдіс орддьыны нійӧ.
[49] Велӧтчиссес казялісӧ Сійӧ ва вылас. Нія юраныс пыртісӧ, миянлӧ пӧ мыччасьӧ. Нія пондісӧ горӧтны.
[50] Сійӧ казялӧмсянь быдӧнныс повзисӧ. Сэк жӧ Исусыс пондіс баитны ныкӧт: «Лӧньсьӧ, эд полӧ, этӧ Ме».
[51] Сія пуксис ны дынӧ пыжас, и тӧлыс лӧньсис. Велӧтчиссесӧ ӧддьӧнжык диво кутіс.
[52] Чорзьӧм сьӧлӧмныс кузя эд няньнас адззывлытӧма вердӧмыс нійӧ немӧ эз велӧт.
[53] Исусыс да велӧтчиссес вуджисӧ тысӧ да локтісӧ Генисарет муӧ.
[54] Кӧр нія чеччисӧ пыжсис, отирыс сэк жӧ тӧдісӧ Исуссӧ.
[55] Нія котӧрӧн кытшӧвтісӧ быдӧс матісь оланіннэсӧ да висьталісӧ, кытӧн Исусыс. Сы дынӧ отирыс пондісӧ ольпассез вылын вайӧтны шогаліссесӧ.
[56] Кытчӧ бы Сія эз лок ─ посадӧ, карӧ, быд оланінӧ, ─ быдлаын шогаліссесӧ водтӧтлісӧ ӧтӧрас да корисӧ Сійӧ, медбы лэдзис нылӧ павкӧтчыны кӧть паськӧм подув бердас. Исус бердӧ павкӧтчиссес веськавлісӧ.