[1] Исусыс пондіс баитны нылӧ велӧтан висьттэзӧн: «Ӧтік морт аслас муӧ сюйыштас винограддэз да нійӧ йӧрьяс. Керас виноград пичканін. Вылына лэбтас виноград йӧр сьӧрын видзӧтланін. Сыбӧрын ассис йӧрсӧ виноград вӧдитіссезлӧ кӧртымӧ сетас. Ачыс мунас.
[2] Виноград ӧктан кадӧ сія иньдас ассис рабсӧ виноград вӧдитіссез дынӧ, медбы воӧм виноградсис босьтны ассис пайсӧ.
[3] Виноград вӧдитіссес рабсӧ кутасӧ, вартласӧ да куш киӧн бӧр ыстасӧ.
[4] Мортыс ыстас мӧдік рабӧс. Нія изӧн поткӧтасӧ сылісь юрсӧ, сераласӧ сы вылын да вашӧтасӧ.
[5] Мортыс ыстас куимӧтӧс, сійӧ виясӧ. Сія унаӧс ыстылас, но ӧтіккесӧ вартласӧ, мӧдіккесӧ виясӧ.
[6] Мортыслӧн вӧлӧм ӧтік дона зон. Медбӧрын мортыс ыстас ассис зонсӧ. Сія висьталас: "Менчим зонӧс нія озӧ лысьтӧ вӧрзьӧтны".
[7] Но виноград вӧдитіссес баитасӧ ӧтамӧд коласын: "Сылӧ быдӧс пажытьыс вуджас. Виям сійӧ. Сэк быдӧс миянлӧ дӧнзяс".
[8] Нія зонсӧ кутасӧ, виясӧ да чапкасӧ виноград йӧр саяс.
[9] Кӧзяиныс локтас да мый керас виноград вӧдитіссескӧт? Сія локтас да виноград вӧдитіссесӧ вияс. Виноград йӧрсӧ сетас мӧдіккезлӧ.
[10] Эдӧ разь тійӧ некӧр лыддьӧтлӧ Вежа Гижӧтсис: ─ Изыс, кӧдӧ керку лэбтіссес пуктісӧ абутӧм туйӧ, лоис пельӧс изӧн.
[11] Сійӧ керис Дӧсвидзисьыс. Миян синнэзлӧ сія диво».
[12] Аркирейес, Туйдӧтӧ велӧтіссес да бӧрйӧм пӧриссес вежӧртісӧ: велӧтан висьтсӧ Сія висьтасис ны йылісь. Нія мӧдісӧ кутны Исуссӧ, но повзисӧ отирсис. Сійӧн Исуссӧ колисӧ да сэтісь мунісӧ.
[13] Исусыс дынӧ нія ыстӧмась кынымкӧ фарисейӧс да Иродлісь отирӧс, медбы кутны Сійӧ баитӧмас.
[14] Нія локтісӧ Исусыс дынӧ да шуисӧ: «Велӧтісь, мийӧ тӧдам, Тэ веськыта баитан, былись Еныс тшӧктӧм сьӧрті велӧтан овны. Тэ он пов и он кошшы, кыдз бы морт сьӧрті керны. Висьтав, колӧ я Римись ӧксулӧ вотсӧ вештыны?»
[15] Исусыс тӧдіс нылісь ылӧтлӧмнысӧ да шуис: «Мый тійӧ Менӧ ылӧтлат? Мыччалӧ меным динарий».
[16] Нія вайисӧ динарий. Исусыс юаліс: «Кинлӧн сы вылын чужӧмыс да гижӧм нимыс?» Мӧддэс Сылӧ висьталісӧ: «Римись ӧксулӧн».
[17] Исусыс шуис: «Ӧксулісь сетӧ ӧксулӧ, а Енлісь ─ Енлӧ». Сы кыввезсянь нійӧ диво кутіс.
[18] Исусыс дынӧ локтісӧ садукейез, кӧдна шуӧны ловзьӧмыс пӧ абу. Нія Сылісь юалісӧ:
[19] «Велӧтісь, Моисей гижис миянлӧ: "Кулас кӧ кинлӧн вон да коляс иньсӧ челядьтӧг, ась мӧд воныс гӧтрасьӧ сы инь вылын, медбы чужис кага кулӧм воныс ним вылӧ".
[20] Вӧлісӧ сизим вон. Медодззаыс гӧтрасис, но кӧр куліс, челядьсӧ эз коль.
[21] Сылісь иньсӧ босьтіс мӧд воныс, но куліс да челядьсӧ эз коль. Сідз жӧ лоис куимӧт воныскӧт.
[22] Инькаыс вылын гӧтрасьлісӧ сизимнан воныс, но челядьсӧ некин эзӧ кольӧ. Медбӧрын куліс и инькаыс.
[23] Сизимнанныс сійӧ видзисӧ иньӧн. Ловзьӧм бӧрас кинлӧн сія лоас иньыс?»
[24] Исусыс нылӧ висьталіс: «Енлісь вынсӧ да Вежа Гижӧттэсӧ тійӧ одӧ тӧдӧ, сійӧн тійӧ мӧдӧрӧ ылалат.
[25] Ловзьӧммес озӧ пондӧ гӧтрасьны да озӧ пондӧ петны жӧник сайӧ. Нія лоасӧ енӧжись ангеллэз кодьӧсь.
[26] А кулӧмись ловзьӧм йылісь эдӧ разь лыддьӧтлӧ Моисей небӧгись. Сотчан жельнӧгыс дынын Моисейыслӧ Еныс висьталӧм: "Ме Авраамлӧн Ен, Исаклӧн Ен да Яковлӧн Ен".
[27] Еныс абу кулӧммезлӧн Ен, Сія Ен ловьяэзлӧн. Тійӧ ӧддьӧн ылаліт мӧдӧрӧ».
[28] Туйдӧтӧ велӧтіссез коласісь ӧтік морт кывзіс етшасьӧмсӧ да кыліс, кытшӧм бура Исусыс нылӧ висьталіс. Сія сибӧтчис Исусыс дынӧ да юаліс: «Кытшӧм медыджыт тшӧктӧмыс?»
[29] Исусыс сылӧ висьталіс: «Тшӧктӧммес коласісь медыджытыс: "Кывзы, Израиль! Миян Дӧсвидзись Енным ─ ӧтнас Дӧсвидзисьыс.
[30] Радейт ассит Дӧсвидзись Ентӧ быдсӧн сьӧлӧмнат, быдсӧн ловнат, быдсӧн мывкыднат да быдсӧн выннат". Эта медодзза тшӧктӧм.
[31] Мӧд тшӧктӧмыс сы кодь: "Матісьтӧ радейт асьтӧ моз". Этна тшӧктӧммезся ыджытжык тшӧктӧмыс абу».
[32] Туйдӧтӧ велӧтісьыс висьталіс Сылӧ: «Бура висьталін, Велӧтісь! Тэ веськыта висьталін ─ эм ӧтік Ен, мӧдік еныс абу.
[33] И колӧ радейтны Енсӧ быдсӧн сьӧлӧмӧн, быдсӧн мывкыдӧн да быдсӧн вынӧн, да колӧ радейтны матісьсӧ асьтӧ моз. Сія быдӧс сотӧммезся да езъялан козиннэзся коланажык».
[34] Исусыс казяліс сылісь мывкыда баитӧмсӧ да шуис: «Тэ абу ылын Енлӧн Юралӧм дынсянь». Сэксянь Исуслісь некин эз лысьт нем юасьны.
[35] Вежа Керкуын велӧтӧм коста Исусыс баитіс: «Туйдӧтӧ велӧтіссес кыдз вермӧны шуны, Кристос-Мездӧтісьыс пӧ Давидлӧн Зон?
[36] Ачыс Давидыс эд висьталіс Лов ӧзйӧтӧмсянь: ─ Дӧсвидзись Еныс висьталіс менам Дӧсвидзисьлӧ: "Пукав Мекӧт веськыт ладорам кытчӧдз ог уськӧт кок увтат Тэ вылӧ лэбтісиссесӧ".
[37] Ачыс Давидыс шуӧ Сійӧ Дӧсвидзисьӧн. Мыля сэк Сія Давидлӧн Зон?» Уна отир бура кывзісӧ Исуссӧ.
[38] Нійӧ велӧтікӧ Сія баитіс: «Ылынжыка видзсьӧ Туйдӧтӧ велӧтіссез дынсянь. Нія радейтӧны ветлӧтны кузь паськӧмӧн. Нылӧ сьӧлӧмви, копыртчӧны кӧ ны одзын отир ӧксяніннэзын.
[39] Синагогаын да сёян дорын радейтӧны пукавны одзас.
[40] Нія куштӧны дӧваэзлісь керкуэсӧ да асьнысӧ мыччалӧм могись дыр кеймӧны. Суд Лунас нія лоасӧ ӧддьӧн сьӧкыта мыжйӧмӧсь».
[41] Исусыс пуксис паныт сьӧм ӧктан дозлӧ да видзӧтіс, кыдз отирыс тэчисӧ сэтчӧ сьӧмсӧ. Бура олісь отир тэчисӧ уна сьӧм.
[42] Сэтчӧ сибӧтчис ӧтік умӧля олісь дӧва да пуктіс кык ыргӧн сьӧм.
[43] Исусыс корис велӧтчиссесӧ да шуис нылӧ: «Былись баита тіянлӧ: эта умӧля олісь дӧваыс пуктіс быдӧннысся унажык.
[44] Быдӧнныс тэчисӧ сьӧмсӧ унасис. А дӧваыслӧн вӧлі етша. Сія пуктіс быдӧс, мый вылӧ сія оліс».