[1] Кынымкӧ лун бӧрті Исусыс бӧра локтіс Капернаум карӧ. Отирлӧ кывсис, Сія пӧ гортас.
[2] Сэтчӧ ӧксисӧ уна отир, нельки ыбӧс дорас эз туй сибӧтчыны. Исусыс висьтасис нылӧ Бур Юӧрсӧ.
[3] Сы дынӧ локтісӧ нёльӧн, кӧдна вайӧтісӧ параличӧн личкӧм мортӧс.
[4] Уна чукӧртчӧм отир кузя нія эзӧ вермӧ сибӧтчыны Исусыс дынӧ. Сійӧн разисӧ керку вевттянсӧ да шогалісь мортсӧ ольпасьнас лэдзисӧ керкуас, кытӧн вӧлі Исусыс.
[5] Исусыс казяліс нылісь веритӧмнысӧ да параличнас личкӧм мортлӧ висьталіс: «Зонӧй, тэнат умӧль керӧммет проститӧмӧсь».
[6] Сэтӧн пукалісӧ Туйдӧтӧ велӧтіссез да аскӧттяныс баитісӧ:
[7] «Мый Сія асьсӧ Ен туйӧ пуктӧ? Ӧтік Енся кин вермас проститны умӧль керӧммесӧ?»
[8] Исусыс Аслас лолӧн сэк жӧ пондіс тӧдны нылісь юраныс пыртӧмсӧ да висьталіс: «Мыйлӧ сэтшӧмсӧ юраныт пыртат?
[9] Мый кокнитжык висьтавны параличӧн личкӧм мортлӧ: "Тэнат умӧль керӧммет проститӧмӧсь", а поди висьтавны: "Чеччы, босьт ассит ольпасьтӧ да ветлӧт"?
[10] Ӧні тіянлӧ колӧ тӧдны: Морт Зон вермӧ проститны умӧль керӧммесӧ му вылас». Параличӧн личкӧм мортлӧ Сія шуис:
[11] «Чеччы, босьт ольпасьтӧ да мун гортат».
[12] Мӧдыс чеччис, сэк жӧ босьтіс ольпасьсӧ да быдӧнныс син одзын петіс. Быдӧннысӧ диво кутіс. Нія ошкисӧ Енсӧ да шувлісӧ: «Некӧр эттшӧмсӧ мийӧ эгӧ адззывлӧ».
[13] Исусыс бӧра петіс ты дорӧ. Быдӧс отирыс локтісӧ сы дынӧ, и Сія нійӧ велӧтіс.
[14] Мунтӧнняс Исусыс казяліс Алфейлісь Левий зонсӧ, кӧда пукаліс вот ӧктанінын. Сія шуис Левийыслӧ: «Лок Ме сьӧрӧ». Мӧдыс чеччис да муніс Исусыс сьӧрӧ.
[15] Сыбӧрын Исусыс велӧтчиссескӧт пажнайтіс Левий ордын. Сыкӧт ӧтлаын пажнайтісӧ вот ӧктіссез унаӧн да мӧдік умӧльсӧ керись йӧз. Ны коласісь унаӧн ветлӧтісӧ Исусыс сьӧрын.
[16] Фарисейес Туйдӧтӧ велӧтіссескӧт казялісӧ, Исусыс сёйӧ ӧтлаын вот ӧктіссескӧт да умӧльсӧ кериссескӧт. Нія велӧтчиссеслӧ висьталісӧ: «Мыля Сія сёйӧ ӧтлаын вот ӧктіссезкӧт да умӧльсӧ кериссезкӧт?»
[17] Исусыс кыліс нылісь баитӧмсӧ да висьталіс: «Веськӧтісьыс колӧ шогаліссезлӧ, оз ков шогӧттӧммезлӧ. Ме эг лок корны Ен сьӧрті веськыта оліссесӧ, локті корны умӧльсӧ кериссесӧ».
[18] Иоанлӧн да фарисейезлӧн велӧтчиссес кӧслунавлісӧ. Киннэзкӧ локтісӧ Исусыс дынӧ да юалісӧ: «Иоанлӧн да фарисейезлӧн велӧтчиссес кӧслунавлӧны, а Тэнат велӧтчиссет мыля озӧ?»
[19] Исусыс нылӧ висьталіс: «Вермасӧ я ёрттэс кӧслунавны, кӧр ныкӧт гӧтрасись зон? Кытчӧдз гӧтрасись зон ныкӧт, нія озӧ кӧслуналӧ.
[20] Но локтасӧ луннэз, кӧр гӧтрасись зонсӧ босьтасӧ ны дынісь. Сэк нія пондасӧ кӧслунавны.
[21] Некин оз пукты бырӧм паськӧм вылӧ виль дӧмас. Виль дӧмасыс пуксяс, кыскас важсӧ да осьтасӧ ӧддьӧнжык косялас.
[22] Виль винасӧ некин оз кисьт важ кучик дозӧ. Сідз кӧ керан, кучик дозыс потас, винаыс киссяс. Виль винасӧ кисьтӧны виль кучик дозӧ. Сэк кыкнанныс быдсаӧсь кольччӧны».
[23] Шоччисян лунӧ Исусыс муніс сюа ыббез вылӧт. Сылӧн велӧтчиссес пондісӧ летны шеппесӧ.
[24] Фарисейес висьталісӧ Исусыслӧ: «Видзӧт! Мыля нія керӧны сійӧ, мый оз туй керны шоччисян лунӧ?»
[25] Исусыс нылӧ шуис: «Эдӧ разь тійӧ лыддьӧтлӧ Давидыс йылісь, мый сія керӧм аслас отиркӧт кынӧмныс сималӧм коста, кӧр нылӧн абу вӧлӧм сёянныс?
[26] Сія Авиафар аркирей дырни пырӧм Енлӧн Вежа Керкуӧ. Сэтчин сёйӧм Енлӧ вайӧм няньсӧ да вердӧм ассис отирсӧ. Сійӧ няньсӧ туйис сёйны дзир вежауджаліссезлӧ».
[27] Исусыс содтіс: «Шоччисян лун лӧсьӧтӧм морт понда, а абу морт шоччисян лун понда.
[28] Морт Зоныс эд и шоччисян лун вылын кӧзяин!»