[1] Исусыс бӧра велӧтіс ты дорын. Сы дынӧ ӧксис ӧддьӧн уна отир. Сійӧн сія пуксис пыжӧ, а быдӧс отирыс вӧлісӧ ва дорас.
[2] Исусыс уна велӧтіс нійӧ велӧтан висьттэзӧн. Велӧтікас Сія баитіс:
[3] «Кывзӧ. Кӧдзись петас кӧдзны.
[4] Кӧдзтӧнняс мукӧд кӧдзыс туссес усясӧ туй дорӧ. Сэтчӧ пуксясӧ кайез да нійӧ кокаласӧ.
[5] Мукӧдыс усясӧ изъяинӧ, кытӧн муыс вӧлӧм етша. Лажмыт муас петассэс чожа петаласӧ.
[6] Вуджныс тай нылӧн вӧлӧм жеб. Шондісяняс нія рушмасӧ да чожа мыйись косьмасӧ.
[7] Мукӧд туссес усясӧ йӧн коласӧ. Йӧныс быдмас да петассэсӧ пӧдтас. Ны вылын шеппес озӧ быдмӧ.
[8] Мукӧдыс усясӧ бур муӧ, петаласӧ, быдмасӧ да сетасӧ кӧдзыс: ӧтіккез ─ куимдаспӧв, мӧдіккез ─ кватьдаспӧв, куимӧттэз ─ сёпӧв унажык».
[9] Сэтчӧ висьталіс: «Пеля мортыс ась кылӧ!»
[10] Отирыс мунісӧ. Кольччисӧ Исуслӧн велӧтчиссес да кӧдна пыр вӧлісӧ Сыкӧт. Нія юалісӧ велӧтан висьтыс йылісь.
[11] Исусыс шуис нылӧ: «Енлӧн Юралӧмись тӧдлытӧмсӧ тіянлӧ сетӧм тӧдны, а мӧдіккес кылӧны велӧтан висьттэзісь.
[12] Нія асланыс синнэзӧн видзӧтӧны, да озӧ адззӧ, асланыс пеллезӧн кывзӧны, да озӧ вежӧртӧ. Озӧ бергӧтчӧ Енлань, и Еныс оз простит нылісь умӧль керӧммезнысӧ».
[13] Исусыс юаліс нылісь: «Одӧ вежӧртӧ этӧ велӧтан висьтсӧ? Кыдз нӧ мӧдат вежӧртны быдӧс велӧтан висьттэсӧ?
[14] Кӧдзисьыс кӧдзӧ Енлісь Кыв.
[15] Туй дорӧ усьӧм кӧдзысыс висьталӧ ны йылісь, кӧдна кылӧны Кывсӧ, но сэк жӧ локтӧ сотана да гусялӧ ны сьӧлӧмӧ усьӧм Кывсӧ.
[16] Изъяинӧ усьӧм кӧдзысыс висьталӧ ны йылісь, кӧдна кылӧны Кывсӧ да сэк жӧ гажӧн босьтӧны.
[17] Но нылӧн эд абу вуджныс, сійӧн озӧ дыр веритӧ. Кӧр локтӧ сьӧкыт кад да Кыв понда вашӧтлӧм, нія дугдӧны веритны.
[18] Йӧн коласӧ усьӧм кӧдзысыс висьталӧ ны йылісь, кӧдна кылӧны Кывсӧ,
[19] но нылӧн быд лунся тӧждісьӧмныс да унажык сьӧм шедтӧмныс пӧдтӧны Кывсӧ. Сійӧн сэтӧн абу бур воӧмыс.
[20] А бур муӧ кӧдзӧм кӧдзысыс висьталӧ ны йылісь, кӧдна кывзӧны Кывсӧ, босьтӧны сійӧ. Сэтшӧммес уна воӧмсӧ вайӧны: ӧтіккез ─ сёпӧв, мӧдіккез ─ кватьдаспӧв, куимӧттэз ─ куимдаспӧв унажык».
[21] Исусыс висьталіс нылӧ: «Сы понда разь ӧзтӧны бисӧ, медбы сюйыштны сійӧ гырнич увтӧ али топчан увтӧ? Ӧзтӧм бисӧ сувтӧтӧны бивидзан вылӧ.
[22] Быд гусьӧна керӧмыс оссьӧ. Быдӧс дзебӧмыс петӧ вевдӧрӧ.
[23] Пеля мортыс ась кылӧ!»
[24] Исусыс висьталіс нылӧ: «Мый кылатӧ, босьтӧ тӧдвыланыт. Тіянлӧ меряйтасӧ асланыт меряйтӧм сьӧрті да и содтасӧ.
[25] Кинлӧн эм, сылӧ сетасӧ. Кинлӧн абу ─ сылісь босьтасӧ и сійӧ, мый эм».
[26] Исусыс висьталіс: «Енлӧн Юралӧмыс сэтшӧм: мортыс муӧ кӧдзӧ кӧдзыс.
[27] Сія ойнас узьӧ, луннас кок вылас, а кыдз сюыс петалӧ да быдмӧ, сія оз тӧд.
[28] Муыс ачыс сетӧ петассэз, сэсся шеп, сэсся шепас сюсӧ.
[29] Кӧр сюыс воӧ, мортыс сэк жӧ ыстӧ вундіссезӧс, локтіс эд вундан кад».
[30] Исусыс шуис: «Мый вылӧ вачкисьӧ Енлӧн Юралӧмыс? Кытшӧм велӧтан висьтӧн мыччавны сійӧ?
[31] Сія муӧ кӧдзӧм горчига тусь кодь. Кӧдзысӧн сія медпоснит.
[32] Кӧдзӧм бӧрас мӧдік быдмассэзся вылынжыка быдмӧ, лоӧ пу кодь. Сэтӧн нельки кайез поздісьӧны».
[33] Исусыс уна сэтшӧм висьттэзӧн висьтасис отирлӧ Енлісь Кывсӧ, мымда нія вермисӧ вежӧртны.
[34] Сія пыр баитіс велӧтан висьттэзӧн, а бӧрынжык велӧтчиссеслӧ ӧтнаныслӧ быдӧс вежӧртӧтліс.
[35] Сія рытӧ Исусыс висьталіс велӧтчиссеслӧ: «Вуджам ты мӧдӧрас».
[36] Велӧтчиссес ыстісӧ отирсӧ да пуксисӧ Исусыс дынӧ пыжас. Сэтӧн вӧлісӧ и мӧдік пыжжез.
[37] Лэбтісис вына тӧв, васӧ вайӧтіс, койис ны вылӧ. Пыжсӧ пондіс тыртны ванас.
[38] Исусыс пыж бӧрас мыйкӧ пуктӧм юр увтас да онмӧссьӧм. Велӧтчиссес саймӧтісӧ Сійӧ да шуисӧ: «Велӧтісь! Мый, Тэныт и шог абу, мийӧ эд вӧям?»
[39] Сія чеччис, ӧліс тӧвсӧ да висьталіс тыыслӧ: «Ӧвсьы, дугды!» Сэк жӧ тӧлыс лӧньсис. Лоис шы не тӧв.
[40] Исусыс велӧтчиссеслӧ висьталіс: «Мыля тійӧ сідз полат? Мыля тіян абу веритӧмныт?»
[41] Нія ӧддьӧн повзисӧ да ас коласаныс баитісӧ: «Кин Сія, нельки тӧлыс да тыыс Сійӧ кывзісьӧны?»