[1] Гижа вичкуын веськӧтліссезлӧ. Ме и ачым тіян кодь веськӧтлісь. Ачым адззылі Кристослісь пессьӧм-мырсьӧмсӧ. Ме лоа Сыкӧт ӧтлаын югьялӧмас, кӧда чожа оссяс. Ме кеймися тіянлӧ:
[2] видзӧтӧ тіян киӧ сетӧм Енлӧн отир сьӧрын, кыдз баля видзӧтісь видзӧтӧ баля чукӧрыс сьӧрын. Эд тӧждісьӧ ны понда дзир тшӧктӧмсянь, ась сія Ен сьӧрті керӧмыс петӧ ассяняныт. Эд лӧсьӧтчӧ сэтісь мыйкӧ аслыныт босьтны, быдӧс керӧ радейтан сьӧлӧмсянь.
[3] Эд ыждалӧ тіян киӧ сетӧм Енлӧн отир вылын. Асьныт мыччалӧ, кыдз колӧ овны.
[4] Кӧр локтас тіян сьӧрын медвылісь Видзӧтісьыс, тійӧ босьтат югьялан юркытш. Сія некӧр оз рушмы.
[5] Сідз и томжыккез, кывзісьӧ вичкуас веськӧтліссезнытӧ. Ӧтамӧдныткӧт лӧсялӧ, ӧтамӧднытӧ кывзісьӧ. Асьнытӧ видзӧ рама. Вежа Гижӧтас висьталӧм: ─ Асьнысӧ вылына лэбтіссеслӧ Еныс паныт сувтӧ, а рам сьӧлӧмаэслӧ козьналӧ бурсетӧмсӧ.
[6] Сідзкӧ, асьнытӧ сетӧ Енлӧн вына кипод увтӧ. Аскадӧ Сія тіянӧс лэбтас.
[7] Ассиныт быдӧс тӧждісьӧмнытӧ сетӧ Сы киӧ. Сія и Ачыс эд тӧждісьӧ тіян понда.
[8] Олӧ садь юрӧн, пыр лоӧ лӧсьӧтчӧмӧсь. Тіян вылӧ лэбтісисьыс ─ куль. Сія эрзісь лев моз ветлӧтӧ, кошшӧ, кинӧс позьӧ ньылыштны.
[9] Кульыслӧ паныт сувтӧ чорыта веритӧмнаныт. Тійӧ эд тӧдат: сэтшӧм пессьӧм-мырсьӧмыс усьӧ и мӧдіклаись воннэзнытлӧ.
[10] Тійӧ ӧні мыйкӧ дырна пессят-мырсят. Но быдӧс бурсетӧмыс локтӧ Енсянь. Сія тіянӧс Кристос Исусыс пыр корис Аслас пырся югьяланінӧ. Ӧні Сія Ачыс керас тіянӧс быдсӧн бурресӧн, лэбтас да вынсьӧтас, велӧтас чорыта видзсьыны.
[11] Сылӧн эд югьялӧмыс да юралӧмыс пырся-пыр! Аминь.
[12] Этӧ дженытик гижӧтсӧ менам висьтавлӧм сьӧрті гижис Силуан, кӧдӧ ме шуа надейнӧй вонӧн. Ме гижи, медбы тіянӧс вынсьӧтны. Менам гижӧмӧ и эм Енлӧн былись бурсетӧмыс. Сы бердӧ чорыта видзсьӧ!
[13] Тіянлӧ юӧр ыстӧны Вавилон вичкуись веритіссез. И нійӧ Еныс бӧрйӧм тіянӧс моз. Юӧр ыстӧ Марк, кӧда меным зон туйӧ.
[14] Ӧтамӧднытӧ радейтан сьӧлӧмсянь окалӧ. Лӧнь олан быдӧннытлӧ, кин олат Кристос Исускӧт ӧтлаасьӧмӧн! Аминь.