[1] Гижӧ Симон-Петра, Кристос Исуслӧн апостол да раб. Гижӧмӧс ыста тіянлӧ, дона веритӧмсӧ миян моз сьӧлӧманыт босьтіссезлӧ. Веритӧмыс миянлӧ вӧлі сетӧм Ен да Мездӧтісь Кристос Исуснымлӧн веськыта керӧмсянь.
[2] Енсӧ да миянлісь Дӧсвидзись Кристос Исуссӧ буржыка тӧдмалӧмсянь бурсетӧмыс да лӧнь оланыс тіян ась содасӧ!
[3] Кристослӧн Ен выныс козьналіс быдӧс коланасӧ, медбы миянлӧ овны да Енлӧ юрбитны. Мийӧ эд тӧдмалім Сійӧ, Кӧда корис миянӧс Аслас югьялӧмӧн да бурсӧ керӧмӧн.
[4] Миянлӧ козьналӧмась ыджыт дона кӧсйӧммез, медбы ны отсӧтӧн тійӧ пондіт вачкисьны Еныс вылӧ да пышшит умӧльсӧ керны ӧзйӧтчӧмись, кӧда отирсӧ изводалӧ.
[5] Сійӧн керӧ быдӧс, медбы веритӧмныт мыччаліс бурсӧ керӧмнытӧ, бурсӧ керӧмныт ─ тӧдӧмнытӧ,
[6] тӧдӧмныт ─ видзсьыны кужӧмнытӧ, видзсьыны кужӧмныт ─ ыджыт мыланытӧ. Ыджыт мыланыт ась мыччалӧ Енлӧ юрбитӧмнытӧ,
[7] Енлӧ юрбитӧмныт ─ воннэзӧс радейтӧмнытӧ, воннэзнытӧ радейтӧмныт ─ быдӧннысӧ радейтӧмнытӧ.
[8] Сія быдӧс кӧ тіян эм да содӧ, сэк миянлісь Дӧсвидзись Кристос Исуссӧ тӧдӧмныт оз ло весись, тійӧ одӧ кольччӧ бур воӧмтӧг.
[9] Кинлӧн эта абу, сія куньӧм синнэсӧ, оз адззы. Мортыс вунӧтіс, кыдз сія одзза умӧль керӧммезісь сӧстӧммис.
[10] Воннэзӧ, быд керӧмнаныт вынсьӧтчӧ мыччавны: тіянӧс былись Еныс бӧрйис да корис. Сідз кӧ пондат керны, сэк некӧр одӧ падмӧ.
[11] Сідз оссяс тіянлӧ пыраніныс миян Мездӧтісь Кристос Исуслӧн пырся Юраланінӧ. Сія эд миян Дӧсвидзисьным.
[12] Тійӧ и тӧдат, и вынсьӧтӧмӧсь эта велӧтӧмын. А ме некӧр ог дугды казьмӧтлыны тіянлӧ эта йылісь.
[13] Эта вывтырись лолӧ петтӧдз ме тіянлӧ ог сет сунасьны, казьмӧтлӧммезнам саймӧта. Ме шуа, меным сідз и колӧ керны.
[14] Тӧда эд, чожа меным ковсяс кольны этӧ му вылісь гортӧс ─ вывтырӧс. Меным сійӧ осьтіс миян Дӧсвидзись Кристос Исусным.
[15] Ме кера быдӧс, медбы тійӧ менам кулӧм бӧрын этӧ быдӧс пыр уськӧтліт тӧдвыланыт.
[16] Мийӧ тіянлӧ юӧртім миян Дӧсвидзись Кристос Исуслӧн вын йылісь да Сы локтӧм йылісь. Мийӧ эгӧ висьтасьӧ кинсянькӧ кылӧм висьттэз, кӧдна морт юрись петісӧ. Мийӧ эд асьным адззылім Сылісь ыджыт вынсӧ.
[17] Ен Айыс вылына лэбтіс Зонсӧ да сетіс Сылӧ югьялан вын. Еныс Аслас югьяланінсянь юӧртіс сэтшӧм кыввезӧн: «Сія Менам дона Зонӧ, сьӧлӧм гажӧ».
[18] Енӧжсянь сійӧ висьталӧмсӧ мийӧ кылім. Сэк эд мийӧ Сыкӧт вӧлім вежа керӧс вылас.
[19] Миян эмӧсь и Енсянь юӧртіссезлӧн былись висьтавлӧммез. Тійӧ бурӧ керат, кывзат кӧ нылісь висьтавлӧммесӧ. Нія эд пемытінас югдӧтаннэз моз югдӧтӧны луныс локтытӧдз да кытчӧдз оз пет асывся кӧдзулыс тіян сьӧлӧммезын.
[20] Тійӧ тӧдӧ: Вежа Гижӧтсис Енсянь юӧртісьлісь висьталӧмсӧ мортыс аслас мывкыдӧн оз вермы вежӧртӧтны.
[21] Енсянь юӧртӧмыс некӧр эз вӧв висьталӧм мортлӧ колӧм сьӧрті. Нійӧ висьтавлісӧ Вежа Лов ӧзйӧтӧмсянь Енлӧн вежа отир.