[1] Кристосыс миян понда Аслас вывтырӧн уна пессис-мырсис. Сідзкӧ, и тійӧ лоӧ лӧсьӧтчӧмӧсь пессьыны-мырсьыны. Вывтырнас пессись-мырсись мортыс дугдӧ керны умӧльсӧ.
[2] Кольччӧм оланнытӧ овтӧн эдӧ ни керӧ вывтырныт ӧзйӧтчӧм сьӧрті. Олӧ сідз, кыдз Енлӧ колӧ.
[3] Тійӧ и сідз одзжык оліканыт керит Енсӧ тӧдтӧммес моз: оліт лэдзчисьӧмӧн, ӧзйӧтчӧмӧн керит умӧльсӧ (мужик мужиккӧт гозйӧн моз оліт, нельки подакӧт сідз оліт, ковтӧмсӧ юрӧ пыртліт), кодаліт, быд моз гажӧтчит, пӧтлытӧммез моз уна сёйит-юит, нылӧн ас керӧм еннэз одзын ковтӧмсӧ да сэрпӧсьсӧ керит.
[4] Ӧні отирыс озӧ вермӧ вежӧртны, мыля тіянӧс оз кыскы ӧтлаын ныкӧт лэдзчисьӧмӧн умӧльсӧ керны. Сійӧн нія тіянӧс и видӧны.
[5] Судитісьыс одзын нылӧ ковсяс ас понданыс кыв видзны. Ловьяэсӧ кулӧммескӧт судитны Сылӧн быдӧс лӧсьӧтӧм ни.
[6] Мыйлӧ вӧлі Бур Юӧрыс висьтасьӧм кулӧммеслӧ? Нія вӧлісӧ мӧдік отир моз мыжйӧмӧсь вывтырнаныс. А ӧні ловнаныс ась олӧны Еныс сьӧрті.
[7] Чожа эстӧн быдӧс чулалас-ӧшас. Сідзкӧ, олӧ бур мывкыдӧн да садь юрӧн, медбы пыр вермит кеймыны.
[8] Сьӧлӧмсянь радейтӧ ӧтамӧднытӧ. Радейтӧмыс эд медколана, сія уна умӧль керӧм вевттьӧ.
[9] Ӧтамӧднытӧ кокнит сьӧлӧмӧн норасьтӧг рочалӧ горттэзаныт.
[10] Отсалӧ ӧтамӧднытлӧ сія верман-кужан козинӧн, мый быдӧннытлӧ вӧлі сетӧм. Кыдз керкуын бур веськӧтліссез Енлісь быдпӧлӧс бурсетӧммесӧ видзӧ кужӧмӧн.
[11] Кин баитӧ, ась баитӧ Енлӧн сетӧм кыввезӧн. Кин мый керӧ, ась керӧ Енсянь сетӧм вынӧн. Кристос Исус пыр быдӧсісь ась петӧ ошкӧмыс Енлӧ. Сылӧн эд югьялӧмыс да юралӧмыс пырся-пыр. Аминь.
[12] Донаэзӧ, тійӧ сьӧкыта пессят-мырсят, кыдз би пырйӧт мунат. Сысянь ась диво тіянӧс оз кут. Сія сьӧкыта пессьӧм-мырсьӧмыс локтӧ тіянӧс тӧдмавны-видзӧтны.
[13] Тіян вылӧ усьӧ Кристосыслӧн пессьӧм-мырсьӧмыс, сысянь гажмӧ. Тійӧ эд ёна пондат гажӧтчыны, кӧр мыччисяс Сылӧн югьялӧмыс.
[14] Кристос ним понда тіянӧс видӧны кӧ, тійӧ шудаӧсь. Еныслӧн югьялан Лолыс эд тіянкӧт. Отирыс Сійӧ видӧны, а тійӧ Сійӧ ошкат.
[15] Тіян коласісь некин ась оз пессьы-мырсьы вийӧм понда, гусясьӧм понда, лёк керӧм понда да мырддьӧм понда.
[16] Ковсяс кӧ тіянлӧ пессьыны-мырсьыны кыдз Кристос отирлӧ, то эдӧ гӧрдӧтӧ, а ошкӧ Енсӧ.
[17] Судыслӧн кадыс сибаліс. Еныс медодз пондас бӧрйисьны Аслас отиркӧт. Миянсянь кӧ пондӧтчас, мый сэк видзчисьны нылӧ, кӧдна озӧ кывзӧ Еныслісь Бур Юӧрсӧ?
[18] ─ Ен сьӧрті веськыта олісьлӧ кӧ сьӧкыт мезмыны, кытчӧ сэк сюрасӧ умӧльсӧ кериссес, Ентӧг оліссес?
[19] Енлӧ колӧм сьӧрті кӧ мортыс пессьӧ-мырсьӧ, сія ась сетӧ асьсӧ Сы киэзӧ да одзлань керӧ бурсӧ. Аркмӧтісьыс эд оз веж Ассис кывсӧ.