[1] Гижӧ Петра, Кристос Исуслӧн апостол. Гижа Енлӧн бӧрйӧммезлӧ, му пасьта паськалӧм Кристос отирлӧ: Понтӧ, Галатияӧ, Каппадокияӧ, Асияӧ да Вифинияӧ локтӧммезлӧ.
[2] Ен Айным тіянӧс одззасянь ни вӧлі бӧрйӧм. Аслас Лолӧн Сія тіянӧс керис вежа отирӧн, медбы тійӧ кывзісит Кристос Исуссӧ да Сы Вирӧн сӧстӧммит. Еныслӧн бурсетӧмыс да лӧнь оланыс тіян ась содасӧ!
[3] Ошкам Енсӧ, миян Дӧсвидзись Кристос Исуслісь Айсӧ! Еныс Кристоссӧ ловзьӧтіс, сідз Аслас небыт сьӧлӧмсянь козьналіс миянлӧ виль олан. Сійӧн мийӧ олам Сы вылӧ надейтчӧмӧн.
[4] Надейтчам босьтны и Еныслісь миянлӧ лӧсьӧтӧм пайсӧ, кӧда сӧстӧм, оз сісьмы да оз рушмы. Сійӧ тіянлӧ видзӧны енӧжас.
[5] Тійӧ Еныслӧ веритат. Сійӧн Сылӧн выныс тіянӧс видзӧ-дорйӧ, медбы мездыны. Сія мездӧмыс оссяс медбӧрья кадас.
[6] Сідзкӧ, гажмӧ, кӧть быдпӧлӧс сьӧкытыс кузя тіянлӧ ӧні и ковсяс невна пессьыны-мырсьыны.
[7] Зарнисӧ би пырйӧт нуӧтӧны, медбы вӧлі буржык, а и сія эд бырӧ. А тіян пессьӧм-мырсьӧм коста тӧдмалӧм-видзӧтӧм веритӧмныт лоӧ зарниысся донажык. Кристос Исуслӧн локтан Лунӧ тіянӧс ошкасӧ, бурӧ пуктасӧ, югьялӧмас сюрӧтасӧ.
[8] Тійӧ Кристоссӧ эдӧ адззылӧ и ӧнӧдз одӧ адззӧ, но радейтат Сійӧ. Тійӧ Сылӧ веритат да гажӧтчат ыджытся-ыджыт гажӧн. Эта гаж йылісь висьтавны и кыввез озӧ тырмӧ.
[9] Тійӧ эд асланыт веритӧмӧн и локтат мезмӧмӧдззас.
[10] Эта мезмӧм йылісь эд кӧркӧ Енсянь юӧртіссес тӧдмавлӧмась-кошшисьӧмась. Нія одзжык ни висьтавлӧмась тіян понда лӧсьӧтӧм бурсетӧмыс йылісь.
[11] Нія тӧдмавлӧмась, кин вылӧ да кытшӧм кад вылӧ мыччавлӧм ны пытшкын олісь Кристослӧн Лолыс. Лолыс висьтавлӧм одзланьсясӧ: Кристослісь пессьӧм-мырсьӧмсӧ да сы бӧрся югьялӧмсӧ.
[12] Енсянь юӧртіссеслӧ вӧлі осьтӧм: Кристос йылісь юӧртӧм коста нія эзӧ кысъялӧ аслыныс, а тіянлӧ. Ӧні этӧ Бур Юӧрсӧ висьтасисӧ тіянлӧ енӧжсянь ыстӧм Вежа Лов вынӧн. Сійӧ керсьӧмсӧ нельки ангеллэс вежӧртӧны бы.
[13] Сідзкӧ, лоӧ лӧсьӧтчӧмӧсь, медбы уджӧтны вежӧрнытӧ да овны садь юрӧн. Пыр олӧ Енлӧн бурсетӧм вылӧ надейтчӧмӧн. Бурсетӧмсӧ тіянлӧ козьналасӧ Кристос Исуслӧн локтан лунӧ.
[14] Одзжык тійӧ эдӧ тӧдӧ, мый бур, мый умӧль. Сэк умӧльсӧ керны ӧзйӧтчӧмныт ыждаліс тіян вылын. Ӧні лоӧ кывзісь челядь кодьӧсь, эд керӧ умӧльсӧ одззамоз.
[15] Тіянӧс Корисьыс ─ вежа. Быд керӧмнаныт мыччалӧ: тійӧ ─ вежаӧсь.
[16] Вежа Гижӧтас висьталӧм: «Лоӧ вежаӧсь, Ме эд вежа».
[17] Еныс оз видзӧт чужӧм вылӧ, Сія керӧммез сьӧрті веськыта судитӧ. Сійӧ тійӧ шуат Айӧн. Сідзкӧ, эта му вылын олӧм коста кадсӧ чулӧтӧ Сыись полӧмӧн.
[18] Айезныт айезсянь тіянлӧ дӧнзис педзан олан. Тійӧ эд тӧдатӧ, сэтшӧм олансис тійӧ эдӧ вӧлӧ небӧмӧсь эзысь да зарни вылӧ, кӧдна бырӧны.
[19] Тійӧ небӧмӧсь Кристослӧн дона вирӧн, Сія эд вӧлі сӧстӧм бур Дзельыс.
[20] Отирсӧ мездыны Сія вӧлі сувтӧтӧм быдӧс аркмӧтӧмӧдз. Тіян понда Сія локтіс медбӧрья кадас.
[21] Тійӧ Кристосыс пыр пондіт веритны Еныслӧ. Сія Кристоссӧ ловзьӧтіс да сетіс Сылӧ Ассис югьялӧмсӧ, медбы и тійӧ веритіт да надейтчит Еныс вылӧ.
[22] Быльсӧ кывзісьӧмӧн да Лов отсӧтӧн тійӧ сӧстӧммит, медбы воннэзнытӧ быдӧннысӧ радейтны ӧтмоза. Сӧстӧм сьӧлӧмсянь ӧтамӧднытӧ радейтӧмныт ась оз кус.
[23] Тійӧ вились чужит Ен Кывсянь, эдӧ чужӧ сісьман кӧдзыссянь. А Енлӧн Кылыс ловья да пыр олӧ.
[24] Вежа Гижӧтыс эд висьталӧ: ─ Быд мортыс турун кодь, мортлӧн басӧкыс ─ турун вылын дзоридз. Туруныс косьмис, дзоридзыс киссис,
[25] а Дӧсвидзисьлӧн Кылыс пыр олӧ. Сія Кылыс ─ тіянлӧ висьтасьӧм Бур Юӧрыс.