[1] أَمّْمْبُو إِسَتَکّْࢽٜ مَیْیَا ࢻُوُوُوَرُو دَوْ کُولْجَا مَࢽَࢽْجَ ࢽغُوجَ، کُورُو کْࢽْدُو ࢽغْلَ ࢻِ یَیٜیَ دِیُورُو دَبَّرْغَدَرُو وَلْجَ؞
[2] بَرٜ کْلَ وُࢽْدُمَیٜࢽْ دِوِ وُلْجَࢽِّ، ࢽَࢽْلٜوَࢽْ دَسَا، أَمْ رُوکُرَ بَوُووَرُو وَلْجَ، کُورُو وُࢽْدُ یَیٜرُو سَوِسُو حَلْ ࢽغْلَ ࢻْلٜجَا؞
[3] أَوُووَ أَࢽْدِ کْلَࢽْدٜ ثَلَࢽْ حَࢽْغَلْ بَوُووَ، مَࢽَ اللَّهیٜ ࢽغُوࢽِیٜࢽْدٜ، ࢻَتِّییٜࢽَ، کَرٜیَوَ مَࢽْغَرْ دِوِ سُو، دُࢽِیَارَمْ سُویٜ، ࢽَࢽْکْلَدُووَ مَࢽْدْࢽَالَࢽْ کْرْغَیْیٜ، حَرْ أَمْ أَࢽْدِیَ وَسَࢽَ، أَࢽْدِ یٜ تَیِیَ وَࢽِیٜࢽَ؞
[4] أَمَّ اللَّه ࢽجْکَّیِمَࢽْدٜ سٜرْࢽْجُوَ کْرَوُوࢽْجُوَ أَدَمْغْࢽَرُو ࢻْلٜیٜىٰࢽِّیَ،
[5] أَࢽْدِیَ سَکَّوُو، کْࢽْدُو لَا ࢽَࢽْجِرٜىٰ دِیٜࢽَرُو غْࢽِ، کَࢽْجِمَرِࢽْجُ ࢽَࢽْغَرُو؞ کْࢽْدُوُو رُحُࢽْجُیٜࢽْ أَࢽْدِیَ تُلْسَࢽٜ تَمْبُو بْرِࢽَّ کْࢽْدْغَیْ بْرِࢽَّا أَࢽْدِرُو سٜدُو؞
[6] رُحُ أَدْمَا عِیسَى أَلْمَسِیوُ ࢽجْکَّیِمَࢽْدٜىٰࢽْ أَࢽْدِرُو تَیْ دَجٜ ࢻِسٜىٰرَ؞
[7] أَدَ دِیُوࢽْجُدْ، سٜرْࢽْجُیٜࢽْ أَࢽْدِیَ جِرٜوُرُو سَدْࢽَ دُوُوࢽْ، کْلَ تْمَ رُو سَوِسُویٜࢽْ وَرَسَوُرُو وَلِّیُورُو؞
[8] مَࢽَ أَدْ جَوْرُو کِبُّ، کُورُو أَوُو أَࢽِیَ تَبَّتْکْمِیَ، رَاکُّو، أَمْ اللَّهَ مْرْسَجَࢽَمَدْ کْࢽْدُو ࢽغْلَ دِیُورُو کْلَࢽْجَ ثَدُورُو؞ أَوُو أَࢽِ جَوْمَرُو ࢽغْلَ یٜ، أَمْسُورُو ࢻَیْدَا یٜ؞
[9] أَمَّ کَمْبِوُ بُووُیٜ سُو، تَیٜ کَاࢽْ کَارِࢽّٜ سُو، غَسِࢻْتُ سُو، لَوَلَ کْلَ وَدَوَ أَتَّوْرَیٜࢽْ سُورُو کَدْࢽٜ، أَوُو أَࢽِ بُووُ ࢻَتْ ࢻَیْدَ بَوُو ࢽَࢽْغَرُو؞
[10] کَمْ أَمْ غَدٜیَ ࢻِرْجِمَدْ، تِرُو سْمُو کَسْتَ حَرْ یِࢽْدِرُو یِدّٜ، دَجِ تِیَ ࢻَیْدُࢽُواْ؞
[11] ࢽُوࢽٜ، کَمْ جِرِ أَدْغَیْدْ جَوَلْ اللَّهیٜࢽْ ثُلُوُࢽَ یٜ، کُورُو بِوُوَࢽْجُࢽْ وُواْمْ اللَّهیٜدَ کْلَࢽْجُرُو ثُوُدْࢽَ یٜ؞
[12] سَ أَرْتِمَسَّ بِ تِکِکُسَّ ࢽَࢽْمْبُو ࢽُودْکِّیَ، کُواْرِࢽٜ ࢽَغَتُّو ࢽَࢽِرُو بْرْࢽِ ࢽِکَࢻُولِسّٜرُو أَرٜ، ࢽِیَ سَ کَکُیٜیَ ࢽَدْࢽْ ࢽَࢻْتُیٜ ࢽغُوکّْࢽَ ࢽَࢽْغَرُو؞
[13] کُواْرِࢽٜ جِࢽَسْ غُوࢽِ أَتَّوْرَیٜیَ أَࢻُولُسَّا بَࢽَغْࢽٜ، أَوِمَ تَیِیَ مَوْجْࢽِّࢽْ بْلَوُرُو ثَدُو؞
[14] أَمْࢽْدٜ یٜ کْࢽْدُو ࢽغْلَ دِیُو ثَرُو، ࢽغَیْࢽِࢽْ رَکْثَࢽٜ مْرَدُ جْکَّدَ ࢻِ یَیٜیَ غَلْجَیْ، کُورُو کْࢽْدْغَیْࢽْجَدْ دُࢽِیَࢽْ ࢻَیْدَ بَوُورُو وَلْجِوَوُو؞
[15] أَمْ وُوَ رُوکُّو سَمَّ لٜوَࢽْجَیْ؞ ࢽِ یٜ أَمْ دُوُوࢽْ کَمْبْرْسٜࢽْجَ ࢽَࢽْغَرُو أَࢽْدِیَ سَرَاࢽَدَ لٜوَࢽٜ؞ سٜرْ اللَّهیٜ ࢽَیِ سَمَّلَࢽْ دْغَ!