[1] أَمَّ ࢽِدْ، أَوُو کْلَ أَلَمْدُ جِرٜىٰࢽْ کَلْکَلْدَ أَلَمّٜ!
[2] کِیَرِیَسُو کْلَ رِوُووُوَ دَرَجَآ کْلَࢽْجَرُو کِسْتُوُوُوَرُو وَلْجَ، کُورُو کَمْبْرْسٜیَ کْرَوُووَ ࢽٜتُّوَلَࢽْ دُࢽُووَرُو وَلْجَ؞
[3] جِرِ أَدْغَیْࢽِࢽْ کْمُرْجُووَسُو یٜ ࢽَࢻْتُ دَرَجَا جِرِ اللَّه ثْرَاࢽَدَ ثَدُو، بَرٜ دِوِ أَمْبٜ وُلْجَࢽِّ بِ کَرٜیَ دِبٜࢽْ ࢽغْوُیٜرُو وَلْجَࢽِّ؞ أَوُو ࢽغْلَدَ أَلَمْجَ،
[4] ࢽغَیْࢽِࢽْ أَمِدَوَسُورُو کوَوَࢽْجَا یَلَّࢽْجَا رَوُو ثَسَکَّرَیْ؞
[5] تَیِدْ یٜ کْلَ رِوُووُ، تَیِرْ، ࢻَدُورُو کِسْتُوُوُ، ࢽغْلَ، کوَوَࢽْجَا غَوُرُو وَلْجَ، بَرٜ أَمْسُو مَࢽَ اللَّهیٜرُو رُدُ غْࢽَجَغَࢽِّرُو؞
[6] جِرِ أَدْغَیْࢽِࢽْ جَیْرُووَسُو یٜ کَرْوُࢽْجَرُو دُࢽُو یَکّٜ کْلَ رِوُووُرُو وَلْجَ؞
[7] ࢽِ کْلَࢽْمْ أَوُو سَمَّࢽْ مِسَلْ کْࢽْدُو ࢽغْلَ دِیُویٜرُو وَلّٜ، کُورُو أَلَمْدُࢽْمْ یٜ جِرٜىٰیَ دَرَجَآرُو وَلْجُو،
[8] أَلَمْدُ جِرٜىٰ دُوُوࢽْ رَکْثَࢽٜ تِرُو ثَکَّدِوَوُودْ؞ دَجِ وَدُمَدْ ࢽَࢽْغُ تِیَ ثْدَࢽٜ، کْلَࢽْدٜࢽْ رَکْثٜ دِوِ ࢻِمَا وُلْجِوَوُو؞
[9] کَرٜیَوَسُو یٜ أَوِࢽْ یَیٜ کْمَوَࢽْجَا جَا، أَوُو کَرْوُࢽْجَیٜ ثْرَاࢽَا ثَدُّو، بَرٜ مَࢽَࢽْجَا کَمْبِوُجَࢽِّ،
[10] بَرٜ ࢽدَلْجَࢽِّ، أَمَّ أَمَࢽَّرُو وَلْجَ، أَوِࢽْ یَیٜ أَلَمْدُ اللَّه ࢽجْکَّیِمَࢽْدٜىٰدْرُو دَرَجَ ثَدُو؞
[11] أَوُووَ سٜرْ اللَّهیٜ أَمْ سَمَّرُو ࢽجْکَّوُو ثُکُّدِدْ بَیِࢽْدْࢽَ،
[12] سٜرْ دُوُوࢽْ أَوُو ࢽَࢽْمُمِࢽّٜ غْࢽِیَ مَࢽْغَرْ دُࢽِیَ أَدْیٜیَا کُولِّیُو جَمَࢽْ أَدْࢽْ کْلَرِوُووَ ࢽَࢽْجِرٜیَ ࢽَࢽْمُمِࢽَّلَࢽْ دْغَیْیُورُو أَࢽْدِیَ أَلَمْسَغَیْدْ؞
[13] ࢽغَیْࢽِࢽْ تْمَ بَرْغَا یٜ، ࢻْلٜدُوُ دَرَجَا اللَّهࢽْدٜ مَیْ کُرَا ࢽجْکَّیِمَࢽْدٜیَدْ عِیسَى أَلْمَسِیوُیٜ یٜیَ غُرٜࢽِیٜ؞
[14] تِدْ أَࢽْدِیَ دِوِ ࢻِࢽْ یَیٜ مٜرُسَ جَمَ کَاࢽجُرُو سَدُو جَمَ دُوُوࢽْ کْࢽْدُو ࢽغْلَ دِیُو رَوُووُدَ تَیِرُّو کَلَکْثُورُو أَࢽْدِ ࢽَࢽْغَرُو کْلَࢽْجُوَ کَیْࢽُو؞
[15] أَوُو أَࢽِیَ أَلَمّٜ، کَرْوُ أَمْبٜرُو دُࢽُو یٜ، کْࢽْدُوُووَرُو تَیِرُو یِکَّدٜ؞ بَرٜ کُولّْمٜ وُࢽْدُمَ ࢽِیَ رُࢽْجْࢽِّ؞