[1] کْرَمِیَ، کْلَ کْࢽْدٜ کْمَࢽْدٜ عِیسَى أَلْمَسِیوُیٜیَ ࢽَࢽْجُࢽْ ثَࢻْتُࢽْدٜیَیٜࢽْ ࢽَیِیَ ࢽجَوُورِیٜ،
[2] بَرٜ کْلَ رُحُ، بِ مَࢽَ، بِ وُوتِیَ لَا ࢽَࢽْدٜࢽْ غَیْرُو إِسٜ یِمْ کْمَࢽْدٜىٰدْ ثْدْࢽَ ثَࢽِدْیٜࢽْ حَࢽْغَلْࢽْدُو ثِجْࢽِّ، بَرٜ کَرْوُࢽْدُو یٜ کَمْدْࢽِّ؞
[3] بَرٜ وُࢽْدُمَ جَوَلْ ࢻِمَࢽْ ࢽَیِیَ جَمْبَࢽْجَࢽِّ؞ یِمْدْ إِسِوَوُو، سَیْ تُرُ دَرْیٜىٰدْ إِسٜ مَیْ تُرُمَ سِدُوُ کُدُومَدْ یٜ دُࢽِیَرُو ࢻْلٜدِییَ دُوُوࢽْ؞
[4] تِدْ أَوِ دُوُوࢽْ أَمْ تِرُو اللَّه ثَࢽِ بِ سُجَدَ ثَدِّدَ وَجٜ تَیِ سَمَّا کُوجْࢽَرُو کْلَࢽْجُ جَجَکْثِ، حَرْ ثُرُو ࢻَدُو اللَّهیٜࢽْ ࢽَࢻْثٜ تِ کْلَࢽْجُمَ اللَّهدْ وُو ثْࢽِ؞
[5] سَ وُ ࢽَیِیَ رُوکُّو أَوُو أَࢽِیَ وُلْࢽْجَغَکّْࢽَدَ ࢽغٜسُّوَّ وَ؟
[6] تُو، أَوُو کْرْمَ تِیَ رُوجْࢽَدَ ࢽُوࢽُوَّ؞ سَیْ سَࢽْجُ کَدَرْدْࢽَ ثْدِیَ دُوُوࢽْ، دُࢽِیَرُو ࢻْلٜدِیے؞
[7] کْࢽْدُوُو أَسْرْ تُرُیٜ أَدْ کْرْمَ کِدَࢽْجُ ثْدِ، أَمَّ تِ کْرْمَ تِیَ رُوجْࢽَدْ رُوجِ ࢽغَیْ دُوُوࢽْ، حَرْ سَیْ تِیَ سْࢽَکْثَیْیَ؞
[8] دَجِ مَیْ تُرُمَدْ دُࢽِیَرُو ࢻْلٜدِیے، تِ دُوُوࢽْ کْمَ عِیسَى ࢻُدُ ثِࢽْجُیٜࢽْ تِیَ سِجِیٜ دَرَجَ کْࢽْدٜࢽْجُیٜࢽْ تِیَ بَوُورُو ثْدِدْ؞
[9] مَیْ تُرُمَ کْلَ جِرِ إِوُلِیسْ کِدَ ثْدِیٜࢽْ دُࢽِیَرُو إِسٜ کْࢽْدُوُو سُو، أَلَمَ سُو، أَوُو أَجَبَّ کَتُّوُیٜ سُو
[10] جَمْبَ دِوِ جِرِ جِرِ سُو سَمَّ دَوُ أَمْ ࢽُو ثَدِسُویٜࢽْ ࢻَیْدَدِ، دَلِلْࢽْجُدْ تَیِ جِرٜ دُوُوࢽْ ࢽجْکَّوُو ثُوُدِدَ رَوُو وَجَࢽَ ࢽَࢽْغَرُو؞
[11] أَدْمَ ࢽَࢽْغَرُو اللَّه تَیِرُو جَمْبَ کْࢽْدُوُووَ لَا جُوَجِیٜ کَتُّوُدَ کَسَثَّیْ،
[12] ࢽغَیْࢽِࢽْ أَمْ دُوُوࢽْ جِرٜدَ کَسَتُّرُو وَجَࢽٜ أَوُو جِرٜ غْࢽِدَ جَاࢽَمَسُو سَمَّرُو وُواْمْ غْࢽَجِیے؞
[13] کْرَمِیَ کْمَ جَوْرُو ࢽجَرَاࢽَسُو، سَوِ یَیٜ ࢽَیِ ࢽَࢽْغَرُو اللَّهَ وُسٜدُرُو أَࢽْدِرُو وَجِمْسَاࢽَ، دَلِلْࢽْجُدْ اللَّه ࢽَیِیَ تْࢽْ بَدِدُرَمْࢽِࢽْ ࢽجْکَّوُو ࢻَࢽْدُورُو کْرٜࢽْجَࢽَ، ࢽجْکَّوُو دُوُوࢽْ کِدَ رُحُࢽْجُ إِسَتَیِرْدُوُیٜیَ جِرٜ کَسَتُّیٜیَیٜࢽْ تُوَࢽْدِدْ؞
[14] کُورُو أَوُو أَࢽِرُو دَرَجَ کْمَࢽْدٜ عِیسَى أَلْمَسِیوُیٜ ࢻَࢽْدُورُو اللَّه ࢽَیِیَ کَوُرِࢽْدٜ کْجِیٜࢽْ بُواْࢽْغٜرَ؞
[15] أَدْ ࢽَࢽْغَرُو، کْرَمِیَ، دُࢽُووَرُو دَࢽُواْ، أَوُو ࢽَیِرُو أَلَمْࢽْجَغَیْیٜࢽَدَ مَࢽَ ثِیٜ یٜࢽْ کَلْ، وُوتِیَࢽْدٜىٰ یٜࢽْ کَلْ، ࢽغْلَرُو رُوࢽُواْ!
[16] کْمَࢽْدٜ عِیسَى أَلْمَسِیوُ کْلَࢽْجُوَ اللَّه بَوَࢽْدٜ تِ دُوُوࢽْ سٜرْࢽْجُیٜࢽْ أَࢽْدِیَ سَرَیٜ کَرْوُࢽْدٜرُو حَرْ أَبَدَرُو دُࢽُو سُو، تْمَ ࢽغْلَ سُو ثَدْࢽَدَ
[17] کَرْوُࢽْدُو یٜرُو دُࢽُو ثَدُو کْࢽْدُو ࢽغْلَا مَࢽَ ࢽغْلَا ࢽغَسُوࢽْ ࢽَیِیَ دُࢽُووَرُو ࢽجَدُو!