[1] کْرَوُووُࢽِ، کْرْمَ وُوتِیَ کْࢽْیِࢽْدِیٜ أَدَ رُوُࢽْجَغَکِّ؞ تَیِ یِࢽْدِ سَمَّࢽْ کَرْوُࢽْدُوࢽْ تَکْتُ ࢽغْلَ دٜوُورُو ࢽَیِرُو إِسَتَࢽّجَغَکِّ،
[2] مَࢽَ ࢽَوِیَ تَیِرْ کُرٜࢽْ وُلْجَࢽَدْ یٜ، وَدَ کْمَࢽْدٜ ࢽجْکَّیِمَدْ ثِ کْࢽْغَیَمْبَ ࢽَࢽْجُرُو إِسَࢽَیٜࢽْ ثِࢽَدْ یٜیَ تَࢽْغُواْ؞
[3] بُرْوُو سَلَّمِّࢽْ أَدَ ࢽُوࢽُواْ، جَمَࢽْ دَرْیٜىٰࢽْ رُدُ غْࢽَدُوُمَسُو رُدُࢽْجَا إِسَࢽٜ مَࢽْغَرْࢽْجَ دِوِ جَغَیْ؞
[4] تَیِیٜ: «عِیسَى إِسِ ثْࢽٜ وَدُ ࢽغُوجْࢽَدْ، ࢽدَ تِ؟ تْࢽْ کَارِیَࢽْدٜ رُو ثَرْمْبْࢽَیٜࢽْ، أَوُو سَمَّ بَدِدُرَمْ أَلَکْتُ دُࢽِیَیٜࢽْ تْدِ غَیْ ࢻُوُ غْرْجِ،» ثَࢽِ؞
[5] أَمَّ ࢽُوࢽْجِࢽْ أَوُو أَࢽِلَࢽْ سُوَدَیْ: کُرٜࢽْ سَمٜ یٜ مبٜجِ، دُࢽِیَ یٜ مَࢽَ اللَّهیٜࢽْ إِࢽْغِلَࢽْ کِلُوُو یٜ، إِࢽْغِیٜࢽْ تْدُو یٜ،
[6] کُورُو إِࢽْغِ أَدْمَ دُࢽِیَ ثَیٜدَ لْࢻْثٜ سِجُوُو؞
[7] مَࢽَ ࢻَلْدْمَࢽْ کُورُو سَمٜیَ ثِدِیَ کْرْمَیٜدْ کَࢽُّرُو غْࢽَادَ، وُوتّٜ یِمْ شَرَیٜیَ سِدُوُ غَࢽَمْبُوُیٜیَرُو غْࢽَادَ؞
[8] أَمَّ کْرَوُووُࢽِ، بَرٜ أَوُو ࢻَلْ أَدَ ࢽغٜسُّوِّ، یِمْ ࢻَلْ ࢽَ کْمَࢽْدٜىٰࢽْ کْرْوُ دْوُ غَیْ، کُورُو کْرْوُ دْوُ یٜ یِمْ ࢻَلْ غَیْ؞
[9] کْمَࢽْدٜ أَوُو ثْدِ ثْࢽٜ وَدُ ࢽغُوجْࢽَدَ دِیُورُو ࢽَࢽْغْرْغْدِ بَوُووَ، أَمْ لَا ࢽَࢽْغْرْغْدِ ࢽغُوجَیْدْ غَیْ، أَمَّ کَࢽْجِࢽْدُوࢽْ کَࢽَدِیَ، کَمْ ࢻَلْمَ ࢻَثِّییَ، ثْرَاࢽِّ، أَمَّ أَمْ سَمَّ تُوَرُو إِسَیْیَ، کِرَوُو؞
[10] أَدْ یَیٜ یِمْ کْمَࢽْدٜىٰدْ بَرْوُ غَیْ إِسِ، یِمْ أَدْࢽْ ࢽُکْتُ کُرَࢽْ سَمٜ بَوُورُو وَلْجِ، أَوُو دُوُوࢽْ تِلَࢽْ سَمٜیَ ثِدِیَ ثَدَࢽْدْࢽَدْ یٜ کَࢽُّ جَوْ ࢻِتْ وَرْجٜ جُوُیْ، کُورُو ثِدِیَ أَوُو کْلَدْࢽْ تْدْࢽَا سَمَّ بَوُورُو وَلْجَیْ؞
[11] أَوُو أَࢽِ سَمَّ ࢽغَیْ سِدَغَیْدْ، ࢽَࢻْتُ جِرِ ࢻِ غْلٜ وَجِمْࢽْجَاࢽَ وُو؟ کْࢽْدْغَیْ ࢽَࢽْتَیِرّٜ سُو، ࢽَࢽْمُمِࢽّٜ سُو دٜوُو،
[12] کْࢽْدٜ یِمْ اللَّهیٜدَ غُرٜࢽُواْ، یَکُّواْ دُوَࢽْ إِسُو، یِمْ دُوُوࢽْ تِ ࢽَࢽْغَرُو سَمٜ کَࢽُّࢽْ وَرْدِ، کُورُو کَࢽُّ جَوْ ࢻِتْ أَوُو تِلَࢽْ سَمٜیَ ثِدِیَ ثَدَࢽْدْࢽَ سِجِیدْ؞
[13] أَمَّ کْلَ وَدُࢽْجُدْیٜࢽْ سَمٜ بْرِࢽَّ ثِدِ بْرِࢽَّ ࢽَ دُوُوࢽْ ࢽَࢽْجِرٜ دْغَࢽَدَ غُرٜࢽِیٜ؞
[14] أَدْ ࢽَࢽْغَرُو، کْرَوُووُࢽِ، أَوُو أَࢽِیَ غُرٜࢽُوِدْ، اللَّه ࢽَیِیَ کَدَوُ سُو، أَوُو وَادَ سُو بَوُووَ ࢽَࢽْلٜوَࢽْ ࢽجَوَࢽْدُورُو کُواْرِࢽُواْ؞
[15] بُلُسْ کْرَمِࢽْدٜ رَیِیٜࢽَدْ یٜ ࢽَࢽْرَشِدُ تِرُو تِࢽَدْࢽْ ࢽَیِرُو رُوُࢽْجَاࢽَدْ غَیْ، کَࢽَدِ کْمَࢽْدٜىٰدَ ࢽجْکَّوُورُو ࢽغُوࢽُواْ؞
[16] ثُرُو وُوتِیَࢽْجُ سَمَّ کْلَ لَمَرَّ أَࢽِیٜࢽْ مَࢽَجِدْیٜࢽْ ࢽغَیْ وُلْجِ؞ ثُرُودْࢽْ أَوُووَ لَا أَسُدُ جَوْوَ مبٜجِ؞ أَمْ أَلَمْدَࢽِّ دُࢽُووَرُو دَجَࢽِّدْ کِتَوُوَ غَدٜدَ ࢻَلْجَیْدْ غَیْ، مَࢽَࢽْجُ یٜیَ ࢻَلْجَࢽٜ سِدُوُࢽْجَ کْلَࢽْجَرُو غْرْجَغَیْ؞
[17] تُو، کْرَوُووُࢽِ، أَوُو أَدَ ثَمَࢽْ ࢽُوࢽُوَّدْ، حَࢽْغَلْ غْࢽَࢽُواْ، بَرٜ جَوَلَّࢽْ لُوُو تُرُوُیٜ ࢽَیِیَ لٜࢽْجَࢽٜ دُࢽُوࢽْ دَدُࢽْدُودْلَࢽْ یُرُوِّ،
[18] أَمَّ سٜرَّ ࢽُودُوَ عِیسَى أَلْمَسِیوُ کْمَࢽْدٜ یٜ، ࢽجْکَّیِمَࢽْدٜ یٜىٰࢽْ وُرَࢽُواْ؞ تِرُو کْرْمَ یٜ، حَرْ أَبَدَ أَبَدِࢽْ یٜرُو دَرَجَ تِیُو! أَمِࢽْ؞