[1] کُرٜࢽْ دَوُ جَمَ إِسْرَاءِیلَیٜدْیٜࢽْ ࢽَوِیَ کَتُّوُیٜ یٜ ثَلُوُࢽَ، مَلْمْبَ کَتُّوُیٜ دَوُࢽْدُوࢽْ ثَلُوِدْ غَیْ؞ مَلْمْبَ أَࢽِ أَسْرْلَࢽْ أَلَمْدُ سِدُوُ کُدُومَ ثَوُدِ، حَرْ کْمَ تَیِیَ مٜرُجْࢽَدَ أَࢽْغْرْجَࢽٜ دُوَࢽْ کْلَࢽْجَرُو سِدُوُ غْرْجَغَیْ؞
[2] أَمْ ࢽغْوُ ࢽَࢽْجَࢽٜࢽْجَا جَاࢽٜ تَیِ ࢽَࢽْغَرُو جَوَلْ جِرٜىٰدَ بَسَّیْ؞
[3] مَࢽْغَرْࢽْجَࢽْ مَࢽَ کْجِࢽْ جَمْبَࢽْجَیْ؞ تْࢽْ کُرٜࢽْ وُواْمْࢽْجَ لَوُ غْࢽِ، سِدُوُࢽْجَ یٜ تُسِّوَوُو؞
[4] تُو، اللَّه مَلَیْیَوَ بِوُ ثَدْࢽَا کُولْجْࢽِّ، تَیِیَ کَࢽُّ جَاࢽَمَیٜرُو غْࢻْثِیٜ کَوُ یِمْ شَرَیٜرُو سَرْغَلَࢽْ تُجٜ دُوُرُو کٜکُّو؞
[5] کُورُو دُࢽِیَ کُرٜىٰ یٜیَ کُولْجْࢽِّ، سَ إِࢽْغِ تُࢻَࢽَیٜ جَمَࢽْ غَࢽَمْبُوُیٜدْرُو ثُوُدْࢽَدْࢽْ ࢽَوِ نُوحُ ࢽَࢽْجِرٜ مَوُودُمَدَ کَمْ تُلُرَّ رُوکُّو کِرِوُو؞
[6] کُورُو بْرْࢽِ سُودُومْبٜیَ غُومُورّٜیَدْ یٜیَ بُوُرُو کَلَکْثٜ شَرَ سِدُوُیٜ ثْدّٜ أَوُو غَࢽَمْبُوُرُو ࢻُوُࢽْ وَکَّجِیدَ مِسَلُّو کِدُّو،
[7] أَمَّ ࢽَوِ لُتُ جِرٜمَ دُوُوࢽْ کْلَ کْࢽْدْغَیْ ࢽَࢽْجَࢽٜ تُرُمَسُویٜࢽْ کَرْوُࢽْجُ بَࢽَّدْࢽَدَ کِکَّوُو؞
[8] أَیْ، جِرٜمَ أَدْ دَوُࢽْجَࢽْ دْغَࢽٜ یِمْ ࢽغُسُوࢽْ کْلَ کْࢽْدُوࢽْجَ دِوِ ثُرُࢽَ یٜ، ࢻَࢽْجْࢽَ یٜدْیٜࢽْ کَرْوُࢽْجُ جِرٜمَدَ بَسَرْجِ کْرْغَ؞
[9] تُو، ࢽغَیْرُو وَلْیٜࢽُووَ، کْمَࢽْدٜ مُمِࢽَّا ثُرُو جَرَࢻْتَیٜࢽْ ࢽجْکَّوُو یٜ ࢽُوجْࢽَ، أَمْ دِوِیَ یِمْ کِیَمَا شَرَدُرُو رُودُ یٜ ࢽُوجْࢽَ،
[10] مَسَمَّࢽُّو أَمْ مْرَدُࢽْجَ کَدَوُوَلَࢽْ ثُرُو کْࢽْجْࢽَیٜࢽْ دَسَاࢽَ یٜ، کْࢽْدُوُووُرُو رُدُ غْࢽَجَغَیْ یٜ؞ رُوکُرَوُ کْلَ کِبُّوَ أَࢽِ رِدُ بَوُووَلَࢽْ دَرَجَمَسُووَ بَسَّیْ،
[11] أَمَّ مَلَیْیَوَدْ، تَیِیَ دُࢽُووَ کْࢽْدُوُووَلَࢽْ کُوجَࢽَ یَیٜ، ࢻُوُ کْمَࢽْدٜىٰࢽْ وُواْمْ بَسْتُیٜ تَیِرُو غْࢽَجَغَیْوَوُو؞
[12] أَمَّ أَمْ أَࢽِ لْمَࢽَّ حَࢽْغَلْ بَوُووَ تَمٜ سِدُوُرُو تَسَمْبْࢽَا ثَمُࢽْ، أَوُو أَسُجَࢽِّ بَسَّیْ؞ کُورُو تَیِ یٜ لْمَࢽَّدْ غَیْ سِدَغَیْ،
[13] جِرِ أَمْ غَدٜیَ بَسَرْجَࢽَدْ غَیْ، تَیِ یٜیَ بَسَرْجَیْ؞ کْلَرِوُوࢽَمْبُ کَوْسُلَࢽْ دِیُودْ کُرُوࢽْجَࢽْ أَوُو کْجِ ࢻَࢽْدَیٜ؞ تَیِدْ تُرْࢽُو سُو، أَوُو وَادَ سُو، ࢽَیِیَ رُوکُّو جَوُࢽٜ ثَسَیْیَ، جَمْبَࢽْجَدْیٜ کْجِࢽْجُ ࢻَࢽْجَیْ؞
[14] سِمْࢽْجَ سَوِسُو کْلَ کْࢽْجْࢽَیٜࢽْ، بِوُ کُولْجَیْوَوُو، أَمْ کَمْبْرْسٜࢽْجَ دُࢽُو بَوُووَا ثَدَیْ، کَرْوُࢽْجَ مَࢽْغَرْلَࢽْ أَلَمْغَدَ؞ تَیِدْ تَدَوَ بَسْکُوَدَ!
[15] جَوَلْ جِرٜىٰࢽْ ثَلُوٜ ࢻَثَّغَࢽٜ جَوَلْ بَلَامْ تَدَ بٜیُورّٜیَ جَاࢽَ؞ بَلَامْدْ أَلْوَسِ جِرٜࢽَمْبُیٜ ثْرَاࢽَ،
[16] أَمَّ أَیَوْࢽْجُدْرُو تِرُو ثَکَّدْࢽَ، کُورُوࢽْجُ مَࢽَ ثْدِوَوُو کُواْ کَمْبٜࢽْ مَࢽَجٜ ࢽَࢽْجُورِ ࢽَوِدْیٜرُو دَࢻْکٜىٰࢽُو؞
[17] أَمْ أَࢽِ سِمْ إِࢽْغِیٜ ࢽغَمْغَدَ غَیْ، تَیِدْ ࢻُوࢻُووْ کَرُوَیٜ ثَدْࢽَ غَیْ، دُوُ ثْلْمْ ࢻْتْ تَیِرُو غْࢽَادَ؞
[18] مَࢽَ بُووُ رُوکُرَیٜ ثَدٜ أَمْ دُوُوࢽْ کْࢽْدْغَیْ جَمْبَیٜࢽِࢽْ کِیَدِّࢽْ ࢻْرْسْتَغَیْدَ مَࢽْغَرْ تِییٜ سُو، ࢽَࢽْجَࢽٜ سُویٜࢽْ ثَدَیْ؞
[19] تَیِرُو وَدُ ࢽَࢽْکَمْ کْلَیٜ ࢻَࢽْدُویٜ ࢽغُوجَاࢽَ، أَمَّ تَیِ کْلَࢽْجَمَ کَرٜیَوَ سِدُوُیٜ، أَوُووَ کَمْ أَوُو تِیَ ࢽَسَرْجِدْیٜ کَرٜیَࢽْجُ وُو؞
[20] کُورُو ࢽُودُ عِیسَى أَلْمَسِیوُ کْمَࢽْدٜ یٜ، ࢽجْکَّیِمَ یٜدْیٜࢽْ کَدَوُ دُࢽِیَیٜرُو کَجَࢽَ دُوُوࢽْ، وَلْدَࢽٜ کَدَوُ دُࢽِیَیٜ أَدْرُو کْلَࢽْجَ ثَسَکِّیَ، تَیِلَࢽْ ࢽَسَرْدَیْیَ، ࢽَࢻْتُࢽْجَدْ ثَیٜمَا کُوجْࢽَرُو کُتَّجِ؞
[21] جَوَلْ جِرٜىٰدَ ࢽُوجَࢽَلَࢽْ وَدَ تَیِرْ تَیِرُو ثَدّْࢽَدَ غَ وَدُدْرُووَ، جَوَلْدَ ࢽغَلْتٜمَ ࢽُوجَࢽِّمَ تَیِرُو ࢽغَلْوُو؞
[22] أَیْ، أَوُو کَرَوْ جِرٜىٰ وُلْجْࢽَدْ تَیِرُو وَکَّجْغْࢽَ: «کْرِ یٜ جُسْتُࢽْجُرُو وَلْدْࢽَ، أَلَدٜ کَسَلْجَࢽَ یٜ وَلْدٜ ثُرُو غَجَوَیٜࢽْ ࢻْرْوْرْدْࢽَ؞»