[1] येह यीसू मसीह के बंसावली अय—यीसू ह दाऊद के बंस के रिहिस अऊ दाऊद ह अब्राहम के बंस के रिहिस।
[2] अब्राहम के बेटा इसहाक रिहिस; इसहाक के बेटा याकूब रिहिस; याकूब ह यहूदा अऊ ओकर भाईमन के ददा रिहिस;
[3] यहूदा के बेटा पेरेस अऊ जेरह रिहिन; जेमन के दाई के नांव तामार रिहिस; पेरेस के बेटा हेसरोन रिहिस, अऊ हेसरोन के बेटा एराम रिहिस;
[4] एराम के बेटा अम्मीनादाब रिहिस; अम्मीनादाब के बेटा नहसोन, नहसोन के बेटा सलमोन रिहिस;
[5] सलमोन के बेटा बोअज रिहिस; बोअज के दाई के नांव राहाब रिहिस; बोअज के बेटा ओबेद रिहिस; अऊ ओबेद के दाई के नांव रूत रिहिस; ओबेद के बेटा यिसै रिहिस;
[6] यिसै के बेटा राजा दाऊद रिहिस। दाऊद के बेटा सुलेमान रिहिस; सुलेमान ह ओ माईलोगन ले जनमिस, जऊन ह पहिली उरियाह के घरवाली रिहिस;
[7] सुलेमान के बेटा रहूबियाम रिहिस; रहूबियाम के बेटा अबियाह रिहिस; अऊ अबियाह के बेटा आसा रिहिस;
[8] आसा के बेटा यहोसापात रिहिस; यहोसापात के बेटा योराम रिहिस; अऊ योराम के बेटा उजियाह रिहिस;
[9] उजियाह के बेटा योताम रिहिस; योताम के बेटा आहाज रिहिस; अऊ आहाज के बेटा हिजकियाह रिहिस;
[10] हिजकियाह के बेटा मनस्से रिहिस; मनस्से के बेटा आमोन रिहिस; अऊ आमोन के बेटा योसियाह रिहिस;
[11] बंधुवा होके बेबिलोन देस ले जाय के बेरा म योसियाह के बेटा यकुन्याह, अऊ ओकर भाईमन रिहिन।
[12] बंधुवा होके बेबिलोन जाय के पाछू: यकुन्याह के बेटा सालतीएल रिहिस; अऊ सालतीएल के बेटा जरूब्बाबेल रिहिस;
[13] जरूब्बाबेल के बेटा अबीहूद रिहिस; अबीहूद के बेटा एलयाकीम रिहिस; अऊ एलयाकीम के बेटा आजोर रिहिस;
[14] आजोर के बेटा सादोक रिहिस; सादोक के बेटा अखीम रिहिस; अऊ अखीम के बेटा इलीहूद रिहिस;
[15] इलीहूद के बेटा एलिआजर रिहिस; एलिआजर के बेटा मतान रिहिस; अऊ मतान के बेटा याकूब रिहिस;
[16] याकूब के बेटा यूसुफ रिहिस; यूसुफ ह मरियम के घरवाला रिहिस, अऊ मरियम ले यीसू जनमिस, जऊन ला मसीह कहे जाथे।
[17] ये किसम ले अब्राहम ले लेके दाऊद तक जम्मो चौदह पीढ़ी होईस, अऊ दाऊद ले लेके बेबिलोन म बंधुवई म जावत तक चौदह पीढ़ी, अऊ बंधुवई ले लेके मसीह तक चौदह पीढ़ी होईस।
[18] यीसू मसीह के जनम ये किसम ले होईस। यीसू के दाई मरियम के मंगनी यूसुफ के संग होय रिहिस, पर एकर पहिली कि ओमन दूनों घरवाला-घरवाली के रूप म एक संग होतिन, मरियम ह पबितर आतमा के जरिये पेट म पाय गीस।
[19] काबरकि मरियम के होवइया घरवाला यूसुफ ह एक धरमी मनखे रिहिस अऊ ओह मरियम ला मनखेमन के आघू म बदनाम करे नइं चाहत रिहिस, एकर खातिर ओह ओला चुपेचाप छोंड़ देय के बिचार करिस।
[20] पर ओकर ये बिचार करे के पाछू, परभू के एक स्वरगदूत ह ओला सपना म दिखिस अऊ ओ स्वरगदूत ह ओला कहिस, “हे यूसुफ, दाऊद के संतान, तेंह मरियम ला अपन घरवाली के रूप म घर लाय बर झन डर, काबरकि जऊन ह ओकर गरभ म हवय, ओह पबितर आतमा के तरफ ले अय।
[21] ओह एक बेटा ला जनम दीही अऊ तें ओकर नांव यीसू रखबे, काबरकि ओह अपन मनखेमन ला ओमन के पाप ले छुटकारा दीही।”
[22] ये जम्मो बात एकर खातिर होईस कि जऊन बात, परभू ह अगमजानी के जरिये कहे रिहिस, ओह पूरा होवय:
[23] “देखव, एक कुंवारी ह गरभवती होही, अऊ ओह एक बेटा जनमही, अऊ ओकर नांव इमानुएल रखे जाही” (जेकर मतलब होथे “परमेसर हमर संग”)।
[24] जब यूसुफ ह नींद ले जागिस, त ओह वइसनेच करिस जइसने परभू के स्वरगदूत ह ओला हुकूम दे रिहिस अऊ ओह मरियम ला अपन घरवाली के रूप म अपन घर ले गीस।
[25] पर जब तक मरियम ह बेटा ला जनम नइं दीस, तब तक यूसुफ ह ओकर करा नइं गीस। अऊ ओह ओकर नांव यीसू रखिस।