[1] हे अकास, तेंह सुन अऊ मेंह गोठियाहूं; हे धरती, तेंह मोर मुहूं के बातमन ला सुन।
[2] मोर सिकछा ह बारिस के सहीं गिरय अऊ मोर बचन ह ओस के सहीं पड़य, नवां कांदी ऊपर पानी के बौछार सहीं, अऊ कोमल पऊधामन ऊपर बारिस के झड़ी सहीं गिरय।
[3] मेंह यहोवा के नांव के घोसना करहूं। जम्मो मनखेमन हमर परमेसर के महानता के परसंसा करव!
[4] ओह चट्टान अय, ओकर काममन एकदम सही अंय, अऊ ओकर जम्मो रसता नियाय के अंय। ओह एक बिसवासयोग्य परमेसर अय, जऊन ह गलत काम नइं करय, ओह ईमानदार अऊ नियायी अय।
[5] इसरायलीमन बिगड़ गे हवंय अऊ ओमन ओकर लइका नो हंय; अपन बेसरमी म, ओमन बेईमान अऊ दुस्ट पीढ़ी के मनखे अंय।
[6] हे मुरूख अऊ निरबुद्धि मनखेमन, का तुमन ये किसम ले यहोवा ला बदला देवत हव? का ओह तुम्हर ददा, तुम्हर सिरजनहार नो हय, जऊन ह तुमन ला बनाईस अऊ तुमन ला आकार दीस?
[7] पुराना जमाना ला सुरता करव; बहुंत पहिले के पीढ़ीमन ऊपर बिचार करव। अपन ददा ले पुछव अऊ ओह तुमन ला बताही, अपन अगुवामन ले पुछव, अऊ ओमन तुमन ला समझाहीं।
[8] जब सर्वोच्च परमेसर ह जाति-जाति के मनखेमन ला ओमन के उत्तराधिकार दीस, जब ओह मनखे-जात ला अलग-अलग करिस, ओह इसरायल के बेटामन के गनती के मुताबिक मनखेमन बर सीमना बांधिस।
[9] काबरकि यहोवा के बांटा ओकर मनखेमन अंय, याकूब ह उत्तराधिकार म मिले ओकर भाग ए।
[10] एक मरू-भुइयां, एक बंजर अऊ सांय-सांय करत भुइयां म ओला याकूब ह मिलिस। ओह ओला सुरकछा दीस अऊ ओकर खियाल रखिस; अपन आंखी के पुतली के सहीं ओकर देखरेख करिस,
[11] जइसे एक गिधवा ह अपन खोंधरा ला हलाथे अऊ अपन पीलामन ऊपर मंडराथे, ताकि अपन डेना ला फईलाके ओमन ला पकड़य अऊ उठाके ऊपर ले जावय।
[12] यहोवा ह एके झन ओकर अगुवई करिस; कोनो पराय देवता ओकर संग नइं रिहिस।
[13] ओह ओला धरती के ऊंच-ऊंच जगह म ले गीस अऊ खेतमन के फसल ओला खवाईस। ओह ओकर पालन-पोसन चट्टान के मंधरस, अऊ कठोर खड़े चट्टान के तेल म ले करिस
[14] ओह ओला पसुमन के झुंड के दूध-दही अऊ बासान के छंटे मेढ़ामन के संग मोटा-ताजा भेड़ अऊ बोकरा के मांस अऊ उत्तम किसम के गहूं के जेवन कराईस। तेंह अंगूर के झागवाला लाल रस पीयय।
[15] पर यसूरून ह मोटा होके लात मारिस; बहुंत खाके, ओमन भारी अऊ चिकना हो गीन। ओमन ओ परमेसर ला तियाग दीन, जऊन ह ओमन ला बनाईस अऊ ओ चट्टान अपन उद्धारकर्ता ला अस्वीकार करिन।
[16] ओमन पराय देवतामन ला मानके ओला जलन रखनेवाला बना दीन अऊ अपन घिनौना मूरतीमन के दुवारा ओला रिस देवाईन।
[17] ओमन झूठ-मूठ के देवतामन ला बलिदान चघाईन, जेमन परमेसर नो हंय; ओ देवतामन, जेमन ला ओमन नइं जानत रिहिन, ओ देवतामन, जेमन कुछू समय पहिले परगट होय रिहिन, ओ देवतामन, जेमन के भय तुम्हर पुरखामन म नइं रिहिस।
[18] तुमन ओ चट्टान ला छोंड़ देव, जऊन ह तुमन ला पालिस-पोसिस; तुमन ओ परमेसर ला भुला गेव, जऊन ह तुमन ला पईदा करिस।
[19] यहोवा ह येला देखिस अऊ ओमन ला अस्वीकार कर दीस काबरकि ओमन के बेटा-बेटीमन ओला गुस्सा देवाईन।
[20] तब यहोवा ह कहिस, “मेंह ओमन ले अपन मुहूं छुपा लूहूं, अऊ देखहूं कि ओमन के अन्त कइसे होही; काबरकि ओमन एक बिगड़े पीढ़ी के मनखे अंय, अइसे संतान अंय, जेमन बिसवासयोग्य नो हंय।
[21] ओमन मोर म ओकर दुवारा जलन पईदा करिन, जऊन ह ईस्वर नो हय अऊ अपन बेकार के मूरतीमन के दुवारा मोला गुस्सा देवाईन। मेंह ओमन म ओमन के दुवारा जलन पईदा करहूं, जेमन एक जाति नो हंय; मेंह ओमन ला एक अइसे जाति के दुवारा कोरोध दिलवाहूं, जेमन म समझ नइं ए।
[22] काबरकि मोर कोप के आगी ह बरही, अइसन आगी, जऊन ह खाल्हे तक मिरतू-लोक ला जला देथे। येह धरती अऊ येकर ऊपज ला भसम कर दीही अऊ पहाड़मन के नीव म आगी लगा दीही।
[23] “मेंह ओमन ऊपर बहुंत बिपत्ति लानहूं अऊ ओमन ऊपर अपन तीर चलाहूं।
[24] मेंह ओमन ऊपर नास करइया अकाल, बिनास करइया अऊ मिरतू देवइया महामारी लानहूं; मेंह ओमन ऊपर जंगली पसु पठोहूं, जेमन ओमन ला काट खाहीं, अऊ मेंह ओमन ऊपर धुर्रा म रेंगइया करैत सांप के जहर पठोहूं।
[25] घर के बाहिर गली म ओमन तलवार ले मारे जाहीं; ओमन के घर म आतंक छा जाही। जवान छोकरा अऊ छोकरी दूध पीयत लइका अऊ डोकरामन नास हो जाहीं।
[26] मेंह कहेंव कि मेंह ओमन ला तितिर-बितिर कर दूहूं अऊ मनखेमन के सुरता ले ओमन के नांव तक मिटा दूहूं,
[27] पर मोला बईरीमन के ताना मारे के भय रिहिस, अइसे झन होवय कि बिरोधीमन गलत समझंय अऊ ये कहंय, ‘हमन अपन बाहुबल ले जय पाय हन; यहोवा ह ये जम्मो काम नइं करे हवय।’ ”
[28] ओमन एक अइसन जाति के मनखे अंय, जेमन करा गियान नइं ए, ओमन म कुछू समझ नइं ए।
[29] कास ओमन म बुद्धि होतिस अऊ ओमन ये बात ला समझतिन अऊ जानतिन कि ओमन के का अन्त होही!
[30] एक मनखे ह हजार मनखे ला कइसे भगा सकही, या दू झन दस हजार के संग कइसे लड़ सकत हें, जब तक कि ओमन के चट्टान ह ओमन ला बेच नइं देवय, अऊ यहोवा ह ओमन ला आने मन के हांथ म नइं कर देवय?
[31] काबरकि ओमन के चट्टान ह हमर चट्टान सहीं नो हय, इहां तक कि हमर बईरीमन घलो ये बात ला स्वीकार करथें।
[32] ओमन के अंगूर के नार ह सदोम के अंगूर के नार अऊ अमोरा के खेतमन ले आथे। ओमन के अंगूरमन जहर ले, अऊ ओमन के गुच्छामन करूवाहट ले भरे हवंय।
[33] ओमन के अंगूर के मंद ह सांप के जहर, नाग सांप के घातक जहर अय।
[34] “का मेंह येला जमा करके अऊ मोर गुफा म मुहर लगाके नइं रखे हंव?
[35] बदला लेवई मोर काम ए; मेंह बदला लूहूं। सही समय म ओमन के पांव ह फिसलही; ओमन के बिपत्ति के दिन ह लकठा म हवय अऊ बिनास ह ओमन ऊपर जल्दी अवइया हे।”
[36] जब यहोवा ह देखही कि ओकर मनखेमन के सक्ति खतम हो गे हवय अऊ कोनो नइं बचे हवंय, न गुलाम न सुतंतर मनखे, त ओह अपन मनखेमन के बचाव करही अऊ अपन सेवकमन के ऊपर दया देखाही।
[37] अऊ यहोवा ह कहिही, “ओमन के देवतामन कहां हवंय, ओ चट्टान, जिहां ओमन सरन ले रिहिन,
[38] ओ देवता, जेमन ओमन के चघाय बलिदान के चरबी ला खाईन अऊ ओमन के पेय-बलिदान के अंगूर के मंद ला पीईन? ओमन तुम्हर मदद करे बर उठंय! ओमन तुमन ला सरन देवंय!
[39] “तुमन अब देख लव कि मेंह खुद ओ अंव! मोर छोंड़ अऊ कोनो देवता नइं एं। मेंह मिरतू देथंव अऊ मेंह जिनगी देथंव, मेंह चोट लगाय हंव अऊ मेंह चंगा करहूं, अऊ कोनो मोर हांथ ले बचा नइं सकंय।
[40] मेंह स्वरग कोति हांथ उठाके कसम खावत हंव: मोर जिनगी के सपथ,
[41] जब मेंह अपन चमकत तलवार म धार लगाहूं अऊ मोर हांथ ह नियाय बर येला धरही, त मेंह अपन बईरीमन ले बदला लूहूं अऊ ओमन ला बदला चुकाहूं, जेमन मोर ले घिन करथें।
[42] मोर तीरमन खून ले भर जाहीं, अऊ मोर तलवार ह मांस ला चीर-फार दीही: मारे गय मनखे अऊ बंधुवामन के खून ले लाल हो जाही, अऊ बईरीमन के अगुवामन के मुड़मन ला चीर-फार दीही।”
[43] हे जाति-जाति के मनखेमन ओकर मनखेमन के संग आनंद मनावव, काबरकि ओह अपन सेवकमन के खून के बदला लीही; ओह अपन बईरीमन ले बदला लीही अऊ अपन देस अऊ अपन मनखेमन बर प्रायस्चित ला पूरा करही।
[44] मूसा ह नून के बेटा यहोसू के संग आईस अऊ ये गीत के जम्मो बचन ला मनखेमन ला सुनाईस।
[45] जब मूसा ह जम्मो इसरायलीमन ला ये जम्मो बचन पढ़के सुना दीस,
[46] त ओह ओमन ला कहिस, “जऊन बचन मेंह आज तुमन ला गंभीरता से सुनाय हंव, ओ जम्मो ला अपन मन म रख लव, ताकि तुमन अपन लइकामन ला हुकूम दे सकव कि ओमन धियान देके ये कानून के जम्मो बचन के पालन करंय।
[47] येमन तुम्हर बर बेमतलब के बचन नो हंय—येमन तुम्हर जिनगी अंय। येमन के दुवारा ओ देस म लम्बा समय तक जीयत रहिहू, जेकर ऊपर अधिकार करे बर तुमन यरदन नदी के ओ पार जावत हव।”
[48] ओहीच दिन यहोवा ह मूसा ला कहिस,
[49] “तेंह नबो पहाड़ के अबारीम छेत्र के ऊपर जा, जऊन ह मोआब देस म यरीहो सहर के ओ पार हवय, अऊ कनान देस ला देख, जेला मेंह इसरायलीमन ला ओमन के अधिकार म देवत हंव।
[50] ओ पहाड़ जिहां तेंह चढ़बे, उहां तेंह मर जाबे अऊ अपन मरे मनखेमन संग मिल जाबे, जइसे कि तोर भाई हारून ह होर पहाड़ ऊपर मरिस अऊ अपन मरे पुरखामन संग मिल गीस।
[51] येकर कारन ये अय कि सीन के निरजन जगह म, मरीबा-कादेस के पानी के सोता करा, तुमन दूनों मोर बिसवास ला टोर देव अऊ इसरायलीमन के बीच म मोर पबितरता ला बनाय नइं रखेव।
[52] एकरसेति, तेंह ओ देस ला दूरिहा ले सिरिप देख सकबे; तेंह ओ देस म नइं जा सकबे, जेला मेंह इसरायल के मनखेमन ला देवत हंव।”