[1] Yî-set-lie̍t-ngìn kóng: “Lòi â, ngài-têu oi kûi-hiong Song-chú! Kì chhá-lan ngài-têu, Kì ya voi yî-hó ngài-têu; Kì tá-sông ngài-têu, Kì ya voi pâu ngài-têu ke sông-héu.
[2] Lióng-ngit heu, Kì voi su-pûn ngài-têu sîn li̍t-liong, thi-sâm ngit, Kì voi sṳ́ ngài-têu hong hí-lòi, ngài-têu chhiu cho-tet sòng-sòng chhai Kì mien-chhièn.
[3] Ngài-têu oi ngie̍t-sîm chûi-khiù, lòi ngin-sṳt Song-chú. Kì thin-chho̍k voi lòi, chhiong chêu-sṳ̀n-thèu ke ngit-thèu chhut-lòi, chhiong chhûn-thiên ke yí-súi chṳ̂-yun thai-thi.”
[4] Chúng-he Song-chú kóng: “Yî-set-lie̍t-ngìn â, Yù-thai-ngìn â, Ngài yin-kôi oi ngióng-pân tui-thai ngì-têu nè? Ngì-têu tui Ngài ke chûng-sîm chhiu-chhiong chêu-sṳ̀n-thèu ke mùng-yên, yit-ha-é chhiu san-thet, chhiong lu-súi, thiên yit-kông chhiu mò-thet.
[5] Só-yî, Ngài phai chung siên-tî lâu ngì-têu kóng, Ngài oi chám-thet ngì-têu, fí-me̍t ngì-têu, Ngài ke sṳ́m-phan voi chhiong ngiap-lang án-kiak lìm-to ngì-têu.
[6] Ngài só oi ke he chhṳ̀-pî, m̀-he hien-chi; oi ngì-têu ngin-sṳt Ngài — Song-ti, yàng-ko hien sêu-fa-chi.
[7] “Chúng-he liá-têu ngìn chhiong Â-tông án-ngiòng phoi-ngia̍k Ngài, vì-poi Ngài lâu kì-têu só-li̍p ke yok.
[8] Kî-lie̍t he chhûng-mân sià-ok ke sàng-sṳ, mân-phien he hiet.
[9] Chi-sṳ̂ lâu khiòng-tho khiung-yong, sṳ̀n-khiùn kiet-tóng, mài-fu̍k tá-kiap, chhai oi hi Sṳ-kiam ke-thiàu lu-hong mèu-chhòi hoi-miang.
[10] Ngài chhai Yî-set-lie̍t khon-tó chhin sià-ok ke sṳ: Ngài ke chṳ́-mìn chhai ke-vi hàng kiên-yìm, pai ngiéu-siong, tá-lá-sap chhṳ-kâ.
[11] “Kóng-tó ngì liá-têu Yù-thai-ngìn, Ngài ya yí-kîn ôn-phài chit-fa̍t ngì-têu ke ngit-khì.”