[1] Yî-chhièn, Yî-fap-lièn kî-chhu̍k kóng-fa ke sṳ̀, Yî-set-lie̍t khì-thâ ke kî-chhu̍k chhiòn-phu pi̍t-pi̍t-chhat; kì-têu chhiòn-phu kin-chhung Yî-fap-lièn. Chúng-he Yî-fap-lièn pai Pâ-li̍t, fam-liáu chhui, chhiu me̍t-mòng lé.
[2] Liá-ha, kì-têu ki-siu̍k fam-chhui, cheu chhṳ-kâ ke sióng-fap lâu kî-su̍t, yung ngiùn-è chu-chho ngiéu-siong, yèn-heu kóng: “Hiong kì-têu hien-chi â!” Kì-têu kin-yèn lâu ngiù-siong chîm-choi!
[3] Só-yî, liá-têu ngìn chhiòn-phu oi chhiong tá-chó ke mùng-sâ-yên lâu lu-súi, ngit-thèu yit chhut-lòi chhiu mò-thet. Kì-têu oi chhiong vò-thàng ke phang-é, yu chhiong fó-yên pûn fûng kién-chéu.
[4] Song-chú kóng: “Ngài he Song-chú, he thu ngì-têu chhut Âi-khi̍p ke Song-ti. Chhù-liáu Ngài, ngì-têu mò phe̍t ke Song-ti; chṳ́-yû Ngài he ngì-têu ke kiu-chú.
[5] Chhai tông-châu ke khóng-yâ, Ngài chhîn-sṳ̂n khon-ku ngì-têu;
[6] chúng-he ngì-têu yit ngi̍p-to liá chhin-phì ke thú-thi, yîn-vi mò sèu-sṳ̍t mò sèu-chok chhiu chhṳ-mân kiêu-ngau. Yèn-heu, ngì-têu chhiu m̀ ki-tet Ngài lé.
[7] Só-yî, Ngài oi chhiong sṳ̂-é kûng-kit ngì-têu, chhiong pau-é mài-fu̍k chhai lu-sùn tén-tén ngì-têu.
[8] Ngài oi chhiong sṳt-lo̍k se yùng-chṳ́ ke yùng-mà kûng-kit ngì-têu, chhá-lie̍t ngì-têu. Ngài oi chhiong hiûng-ok ke sṳ̂-é tông-chhòng thûn-sṳ̍t ngì-têu, chhiong yâ-chhu chiông ngì-têu chhá-to lan-lan.
[9] “Yî-set-lie̍t-ngìn â, Ngài oi fí-me̍t ngì-têu! Yîn-vi ngì-têu fán-tui Ngài, chhiu-he fán-tui ngì-têu ke pông-chhu-chá.
[10] Ngì-têu sṳt hiong Ngài yêu-khiù sat-li̍p kiûn-vòng lâu tak sàng-sṳ ke kôn-chóng. Kì-têu yû kiu-ko ngì-têu mò? Liá-ha ngì-têu ke kiûn-vòng lâu kôn-chóng chhai nai-vi nè?
[11] Ngài chhai fat-khién ke tông-chûng pûn ngì-têu kiûn-vòng, ya chhai thai fat-khién chûng chiông kì-têu fi-thet.
[12] “Yî-set-lie̍t-ngìn ke chhui-ok, ko-fam chhiòn-phu yû ki-liu̍k, he fûng-tén khong hí-lòi ke.
[13] Yî-set-lie̍t-ngìn hàn-yû kî-fi, chúng-he kì-têu mò chṳ-fi, kin-yèn mò pá-ak liá kî-fi. Kì-têu chhiong sán-khì to ke ô-nga-é, m̀-hén chhut mû-thôi.
[14] Ngài kám oi tui yîm-kiên chiông Yî-set-lie̍t-ngìn kiu chhut-lòi? Ngài kám oi tui sí ke khièn-sṳ chṳ̂-ha chiông kì-têu piong chhut-lòi? Sí-mòng â, ngì ke châi-hoi chhai nai-vi? Yîm-kiên â, ngì ke fí-me̍t chhai nai-vi? Ngài mò-oi chai lìn-mén liá-têu ngìn-mìn lé.
[15] Sûi-yèn Yî-set-lie̍t chhiong yâ-chhó chhe-to mân-phien he, Ngài oi ham tûng-fûng tui khóng-yâ chhôi-lòi, chiông súi-ngièn lâu chiáng-súi chhôi-châu; Ngài oi chhióng-chéu kì-têu só-yû ke chhòi-pó.
[16] Sat-mâ-li-â oi yîn-vi phoi-ngia̍k Ngài su chit-fa̍t. Ke-vi ke ngìn oi yîn-vi chan-chên sí-thet; ô-nga-é oi pûn-ngìn te̍p-sí; yû sṳ̂n-hong ke fu-ńg ya oi pûn-ngìn pho tú-sṳ́.”