[1] “Chi-sṳ̂ â, ngì-têu oi thâng! Yî-set-lie̍t-ngìn â, ngì-têu oi chu-yi! Vòng-chhîn koet-chhu̍k â, ngì-têu ya oi chet-ngí lòi-thâng! Liá-ha ngì-têu oi su sṳ́m-phan lé; yîn-vi ngì-têu yí-kîn sàng-cho ôn chhai Mí-sṳ̂-pâ ke kî-koân, khièm chhai Thâ-phok-sân ke lò-mióng,
[2] yet chhai Sṳ̍p-thìn chhṳ̂m-chhṳ̂m ke ham-chiáng. Ngài yit-thin oi chit-fa̍t ngì-têu thai-kâ.
[3] Ngài tông liáu-kié Yî-set-lie̍t-ngìn; kì-têu màn m̀-tó Ngài. Kì-têu liá-ha hàng kiên-yìm, tui Ngài mò chûng-sîm, mò chṳ̂-kiet kin-pai Ngài.”
[4] Yî-set-lie̍t-ngìn ke fái hàng-vì hoi kì-têu mò fap-thu kûi-hiong Song-ti. Yìm-lon ke sîm-lìn hoi kì-têu pai ngiéu-siong, án-ngiòng chhiu m̀ ngin-sṳt Song-chú.
[5] Yî-set-lie̍t-ngìn ke kiêu-ngau sàng-cho kì-têu fam-chhui ke chṳn-kí. Kì-têu ke chhui-ok hoi kì-têu tiet-tó; Yù-thai-ngìn ya thèn-tén kì-têu tiet-tó.
[6] Kì-têu hiong Song-chú hien ngiù-yòng, chúng-he liá tui kì-têu mò má-ke hó-chhu. Kì-têu chhìm m̀-tó Song-chú, yîn-vi Song-chú yí-kîn lì-khôi kì-têu.
[7] Kì-têu tui Song-chú tông mò sṳ̀n-sṳ̍t; kì-têu só-kiung ke he sṳ̂-sên-chṳ́. Só-yî, to ngie̍t-chhû, kì-têu lâu kì-têu ke thú-thi voi pûn-ngìn thûn-me̍t.
[8] Ngì-têu oi chhai Kî-pí-â phùn yòng-kok, chhai Lâ-mâ fat-chhut kín-po, chhai Pak-Â-vùn thai-sâng hêm. Phien-ngâ-mén-ngìn â, ngì-têu ke sù-thi̍t chhai ngì heu-poi lé!
[9] Chit-fa̍t ke ngit-è to-liáu; Yî-set-lie̍t oi me̍t-mòng lé. Yî-set-lie̍t-ngìn â, liá-sṳ yit-thin voi fat-sên.
[10] Song-chú kóng: “Ngài oi hiong Yù-thai ke liâng-chhiu fat-khién, chhiong cho thai-súi án-ngiòng chit-fa̍t kì-têu, yîn-vi kì-têu chhîm-cham Yî-set-lie̍t ke thú-thi.
[11] Yî-set-lie̍t pûn-ngìn khî-fu, su-chhin thung-khú, sṳt-thet Ngài só-su ke thú-thi, yîn-vi kì yit-pái yu yit-pái hiong ke mò má-ke yung ke lìn-koet khiù pông-chhu.
[12] Só-yî, Ngài oi fí-fái Yî-set-lie̍t, chhiong pûn chhùng chu-thet yit-yong, ya oi sêu-me̍t Yù-thai, chhiong mut-thet ke su-thèu!
[13] “Tông Yî-set-lie̍t fat-kok chhṳ-kâ ke phiang án ngiàm-chhung, Yù-thai khon-tó chhṳ-kâ ke sông án li-hoi, Yî-set-lie̍t-ngìn chhiu hi kien Â-sut ke thai-vòng, khiù kì pông-chhu; chúng-he kì mò fap-thu yî-hó kì-têu, ya mò fap-thu pâu kì-têu ke sông-héu.
[14] Ngài oi chhiong sṳ̂-é kûng-kit Yî-set-lie̍t-ngìn, chhiong tông-ok ke sṳ̂-é chhá-lie̍t Yù-thai-ngìn. Ngài oi chhîn-chhṳ chhá-lan kì-têu, chiông kì-têu thô-chéu, mò-ngìn yû khó-nèn kiu kì-têu.
[15] “Ngài oi lì-khôi Ngài ke chṳ́-mìn, tén kì-têu sṳ̀n-ngin chhṳ-kâ yû-chhui, chón-to Ngài mien-chhièn lòi; chhai fam-nan chûng, kì-têu chhiu voi pet-chhiet chhìm-khiù Ngài.”