[1] Oi chiông ngì ke liòng-sṳ̍t ve chhai súi-mien, yîn-vi chiông-lòi voi sû chón-lòi.
[2] Oi chiông ngì ke ngiak fûn-cho chhit-fun, ya-he pat-fun, yîn-vi ngì m̀-tî chhai liá sṳ-song voi tù-tó má-ke châi-fo.
[3] Su-é mò-lun hiong-nàm hiong-pet vang-hâ, vang-to nai-vi, chhiu piong chhai ke-vi. Yùn ke súi-hi chhûng-chiuk, yí chhiu lo̍k hâ-lòi.
[4] Na-he ngì oi tén fûng-thiàu yí-sun chang lòi kâng-chung, ngì chhiu m̀-sṳ́ ve-chúng, ngì ya m̀-voi yû-hó sû-kot.
[5] Fûng-chhôi ke lu-sien ngì m̀-tî; ngì ya mò phan-fap tî ô-nga ngióng-pân chhai fu-ngìn-kâ ke tú-sṳ́ sṳ̀n-hìn; ngì hàn-kha mò phan-fap mìn-pha̍k chhóng-chho van-vu̍t ke Song-ti ngióng-pân kûng-chok.
[6] Ngì chêu-sṳ̀n am-pû chhiòn-phu oi hi ve-chúng; yîn-vi ngì m̀-tî só ve ke chúng he m̀-he chhiòn-phu voi sâng, ya m̀-tî chêu-sṳ̀n-thèu ve ke voi pí am-pû-thèu ve ke kha-hó, ya-he khiung-yong.
[7] Kông he chhin hó, khon tet-tó ngit-kông he ngióng-pân khoai-lo̍k â!
[8] Ngìn sṳ̍t kí-tô se, chhiu cho-tet hióng-su kí-tô ngièn. Chúng-he oi ki-tet, sí-heu ke vû-am hàn-kha chhòng. Chiông-voi lòi ke sṳ chhiòn-phu he khûng-hî.
[9] Heu-sâng ngìn nâ, khoai-lo̍k ko ngì ke chhiâng-chhûn! Kón hàn heu-sâng fôn-hí khoai-lo̍k â! Cheu ngì sîm só-sióng lâu muk-chû só-khon ke hi cho ngì fôn-hí ke sṳ! Chúng-he oi ki-tet, Song-ti oi cheu ngì só-yû ke hàng-vì sṳ́m-phan ngì.
[10] Só-yî ngì oi tui sîm-tú chhù-thet fàn-lò, tui ngiuk-thí chhù-thet thung-khú, yîn-vi heu-sâng lâu chhiâng-chhûn he khûng-hî ke.