[1] Ummanni, warra biyya bulchuuf amrii qaban jalatti ajajamanii akka bulan, ammaas waan gaarii tahe godhuufiis qophee akka tahan yaadachiisi!
[2] Isaan nama tokko illee odoo maqaa hin balleeysin, nagayaan jiraachaa, gaarummaa fi damboobummaa dhugaa namoota hundumaa akka agarsiisan qaraasisi!
[3] Nutiis wayta takka gowwoota, kordiida, warra karaa irraa maqan, ammaas kajeellaa si'oo jasadaa tii fi hawwa bashannana adda addaa tiif araadnee, jireenya keenyaas waan hamaa fi hinaaffaa irratti dabarsine; namootaan jibbamnee ifiifiis wal jibbaa ti turre.
[4] Ammoo wayta gaarummaanii fi jaalalti Rabbi, naja-baasoon keenya, namaaf qabu mullatu,
[5] Rabbi, hojii gaarii nuti hojjanneef jecha odoo hin tahin, rahamatuma isaa tiif jecha, dhiqannaa lammeeysaa dhalachuuf godhamuunii fi haareeysaa Ruuhal Qudusiin, najaa nu baasee ti jira.
[6] Ruuhal Qudus kan Rabbi arjummaa isaa tiin karaa Yesuus Kiristoos naja-baasoo keenyaa tiin nu irratti dhangalaasee dha.
[7] Kuniis, ni'imaa isaa tiin nuti Rabbi biratti akka qaceelootatti lakkaawamnee, abdii jireenya bara baraa qabaachuun warra dhalatu akka taanuufi.
[8] Kun jecha amanamaa dha; dubbii kanneeniis akka ati fardeeyfattuun barbaada; irrattuu warri Rabbitti amanan keeyraata hojjachuuf akka dhugaan if kannan haa tahu; kuniis waanuma nama hundumaa huu fayyaduu dha.
[9] Seera laalchisuun wal morkii gowwummaa tan akka lakkaawuu abaabuu dhalootaa, falamaa fi wal loluun, humaatuu faaydaa waan hin qabneef jecha, irraa fagaadhu!
[10] Nama amantoota gargar fottoysuu barbaadu wayta takka gorsaan dinniini, wayta lammeeysaa gorsitee yoo dide ammoo waldaya keeysaa baasi!
[11] Namni akkasii kun micciiramaa dilaawaa nama mataa ifiitti yakka mure tahuu isaa tiis sirriitti hubadhu!
[12] Ganna kana Niqopholiisitti bahuuf waaniin murteeyfadheef jecha, hogguun Arxemaas yookiin Xiqiqoos gara keetitti ergu, hatattamaan achitti ana bira dhufuuf tattaafadhu!
[13] Zenaas namticha abukaatoo sanii fi Apholos, waan godhuuf dandeeysu hundumaanuu isaan gargaari; amna isaanii tiifiis waan isaan barbaachise akka arkatan godhi!
[14] Ummanni keenya, kashlabummaa dhiisanii, waan guyyuu nama barbaachisuun nama gargaaruu akka dandayaniif, waan gaarii tahe dalaguuf if kannuu barachuu dha qaban!
[15] Warri anaa wajjiin jiran hundinuu nagaya siif dhaamu; warra amantiitti nu jaalataniif nagaya nuuf himi! Ni'imaan Rabbii hunduma keeysanii wajjiin haa taatu.