[1] Ati ammoo, waan barsiisa sirrii tahe saniin wajjiin wal fudhatu qaraasisi!
[2] Manguddoota dhiiraa warra saaliha, warra kabajaman, warra if qabuu dandayan, warra amantii sirriitti fudhatan, jaalalaa fi obsaas warra qaban akka tahan qaraasisi!
[3] Akkasumatti ammaas manguddoota dubartii tiis, haala dubartiin qaceeloon jireenya kabajaa qabu itti jiraatan isaan qaraasisi! Warra maqaa namaa balleeysuu fi ammaas dhugaa tiif araadu odoo hin tahin, warra waan gaarii nama barsiisan tahuu dha qaban.
[4] Akkasitti dubartii baranoottan jaarsa isaanii tii fi joollee isaanii akka jaalatan haa gorsanii!
[5] Qoowliin Rabbii akka hin sakkabamneef, warra if qabuu dandayan, warra ejjummaa irraa xaliilaa, warra mana isaanii akka gaaritti qaban, jaarsa isaanii tiif raaziyaa akka tahaniis haa gorsanii!
[6] Akkasumatti ammaas, dargaggoota dhiiraa akka obsaan if qabuu dandayan gorsii jajjabeeysi!
[7] Ati waanuma hundumattuu gaarii dalaguu dhaan isaaniif fakkeenya tahi! Barsiisa kee keeysatti aaminummaa fi garaa fudhattee itti amanuu kee agarsiisi!
[8] Dubbii fayyaa dhaa tan namni waa itti baanu hin dandeenyetti fayyadamii, adawwii tee, tan silaa waan hamtuu quba ittiin nutti qabuu dandeeysu, waan jettu dhoorkii qaanfachiisi!
[9] Gabroonni waanuma hundumatti ajaja warra isaan bulchuu gammachuun akka fudhatan, akka jawaabaas jala hin deebifanne itti himi!
[10] Waa isaan jalaa hatuu mannaa, isaan guutummatti amanamoo tahuu dha qaban; akkasitti karaa hundumaanuu barsiisni waa'ee Rabbii naja-baasoo keenyaa akka nama ifitti harkisu ni godhama.
[11] Rabbi ni'imaa isaa, tan Banii Aadam hundumaaf najaata kannitu mullisee ti jira.
[12] Ni'imaan Rabbii tuniis, nuti Rabbi wallaalummaa dhiifnee, kajeellaa hamtuu biyya addunyaa tanaa jalaa baanee, if qabuun naamusattii fi qaceelinatti jiraannee, ibaadaa Rabbii tiin bara ammaa kana keeysatti akka jiraannu nu qaraasifti.
[13] Guyyaa eeybifamaa keenya san afachaa, mullachuu durrii ulfina Rabbii keenya guddaa dhaa, ammaas Yesuus Kiristoos naja-baasoo dha eegganna.
[14] Badii teenya hundumaa jalaa nu eewaluu fi ummata tokko kan matuma isaa qofaaf tahe, ammaas kan hojii gaarii hojjachutti mirqaanu qulqulleeysuuf, nuuf jecha dabarsee ti if kanne.
[15] Waan kanneen hundumaa qaraasisi, gorsaaniis jajjabeeysi badii isaanii tiis amrii tee guutuun itti himi; namni tokko illeenuu si hin tuffatin!