[1] Ammaas yaa obboleeyyan keenya, waa'ee dhufa Gooftaa keenyaa Yesuus Kiristoosii fi waa'ee isaa wajjiin walitti qabamuu keenyaa tiis, akka beeytaniif waan isin kadhannu qabna.
[2] “Guyyaan Gooftaa ammuma illee dhufee ti jira” jedhamee oduu akka waan nuti raajii keeysatti dubbannee, yookiin akka gabaasatti, yookiin akka waan katabbiin nu biraa bahee fakkeeysaniin, qalbiin teeysan isin hin raafamin, niis hin naahinaa!
[3] Guyyaan sun, hanga Rabbitti kafruun booda zaahir baatee, ammaas mujrimtichi hamaan, ilmi badii sun mullifamutti, waan hin dhufneef jecha, nam tokko illee nuu karuma fedhe hundumaan isin hin gowwoomsin!
[4] Inni zaahir baafamuuf jiru sun, waanuma waaqa jedhamee namni ibaadu hundumaan morkuu dhaan, isaan gararraa dha if kaaya; inumaatuu tana biraas dabree, beeytel maqdas Rabbii seenee taa'uu dhaan “Anumaatu Rabbi!” ifiin jechuuf taa'a.
[5] Waytaan isin bira ture san dubbii kanneen akkaan isinitti himaa ture ni yaadattuu mitii?
[6] Wayta isaaf herregametti haa mullifamuuf jecha, waan ammaan tana isa boodatti ittisu isin ni beeytu.
[7] Hiccitiin seera-dhablummaa, ammuma illee hojjataa ti jirti; haa tahu malee, hanga inni amma isa ittisu karaa irraa fuudhamutti, wanni ammatti tahaa hin jirtu.
[8] Tana booddees inni seer-dhableen ni mullifama; Yesuus Gooftaan ammoo hafuuruma afaan isaa keeysaa bahuuni isa kombolcha; walaqqisa deebi'ee dhufuu isaa tiiniis isa ni dhabamsiisa.
[9] Inni seer-dhableen suniis humna Sheeyxaanaa tiin milikkitoota kijibaa fi baasa fakkaataniin dhufa.
[10] Warra baduuf taa'u ammoo, najaa bahuuf dhugaa jaalatanii fudhachuu waan didaniif, gowwoomsa hamoo hundumaani isaan irratti hojjata.
[11] Kanaaf Rabbi, waan kijiba tahe haa amananiif, humna dogongoraa, tan isaan keeysatti hojjattu itti erge.
[12] Akkasitti warra dhugaadhatti hin amanin, kanneen ammoo mujrimummatti gammadan hunda, akka itti faradamu godha.
[13] Yaa obboleeyyan keenya, warra Gooftaan jaalatamtan, sababa karaa Ruuhaa kan nama qulqulleeysuu fi, ammaas karaa dhugaatti amanuun akka najaa baataniif Rabbi kan duraan dursee isin fileef, nuti wayta hundumaa isiniif jecha isaaf hamdii galchuu tu nu irra jira.
[14] Durrii ulfina Gooftaa keenyaa Yesuus Kiristoos keeysaa akka hirmaattaniif, inni karaa Wangeela keenyaa tiin, itti isin yaame.
[15] Eegasuu yaa obboleeyyan keenya, jabaadhaa, barsiisa afaaniin isinitti himne yookiin kan xalayatti katabamee nu biraa isinitti dabrees jabeeysaa qabadhaa!
[16] Ammaas, Gooftaan keenya Yesuus Kiristoos mataan isaa, Rabbi Abbaan keenyaas kan nu jaalate, ni'imaa isaa tiiniis jajjabina abadii fi abdii gaariis nuuf kanne.
[17] Innummaan keeysa keeysan isin jajjabeeysee, gaarii dalaydanii gaariis akka dubbattan isin haa cimsu.