[1] Isin yaa saahibban koo! Ani amma xalayaa lammeeysaa tana isiniif barreeysuun kiyya, xalayoottan kanneen keeysatti yaaduma xaliila isin keeysatti kakaasee, waan kanneen isin yaadachiisuun barbaade.
[2] Waan nabiyyoonni qulqulluun durumaanuu dubbatan, ajaja Gooftaa keenyaa tii fi naja-baasoo keenyaa, kan warra ergamoota isin kaadaman irraa arkattan san yaadadhaa!
[3] Zamaan-aakir hanjamtuun warri akka kajeellaa si'oo jasada isaaniititti jiraachuu fedhan ka'uuf akka taa'an, durumaan beekaa! Isaan warra isinitti hanjamaa godhuu dhaan,
[4] “Gooftaan deebi'ee dhufuun, eega abdachiifame turee ti jiraa mitii? Meerre, eeysa jira? Eega abbootiin teenya du'an illee, kunoo wanni hundinuu, akkuma gaafa biiyti addunyaa uumamtetti hafee ti jiraata” jedhu.
[5] Jarri kun bantiiwwan samii, durii jalqabanii Qoowlii Rabbii tiin akka uumaman, lafti niis bishaan keeysaa akka baate, bishaan irraas akka qubatte oduma beekanii fudhachuuf warra diddaa qabu.
[6] Biiyti addunyaa tan zamana sun turtees, galaana bishaanii tiin turaab taate.
[7] Bantiiwwan samii tii fi dachiin, kanneen amma jiran kuniis Qoowluma Rabbii saniin ibiddaan dam godhamuuf qopheeyfamanii, hanga guyyaa firdii kan warra Rabbi jalaa didan dhabamsiisu saniif ol kaayamanii ti jiru.
[8] Yaa saahibban koo! Gooftaa biratti guyyaan tokko akka bara kuma tokkoo ti, barri kumni niis akka guyyaa tokkoo tahuu isaa hubadhaa!
[9] Gooftaan waan abdachiise raawwachuuf hin dhibaa'u; akka namoonni tokko tokko dhibaawatti isa lakkaawanii miti. Inni, namoonni hundinuu akka toowbataniif malee, namni tokko illeen akka badu waan hin barbaanneef jecha isiniif obsa.
[10] Guyyaan Gooftaa ammoo, akkuma hattuun dhuftutti dhufa; guyyaa san bantiiwwan samii dhaa sagalee guddoo didichituuni dhabamu; uumamni hundinuu oowwa ibiddaa tiin wal gadi dhiisa; dachii fi wanni isii irratti hojjatamee jiru hundumaan wajji gubatanii ti badu.
[11] Wanni hundinuu haala akkasitti kan wal gadi dhiisan eega taate, irrattuu isin, namoota akkam tahuu tu isin irraa eegama ree? Jireenyi keeysaniis qulqulluu tahee, kan Rabbiif kanname tahuu dha qaba.
[12] Isin, dhufa guyyaa Rabbii eeggachaa, akka dafee dhufuufiis jerjersaa! Guyyaa san bantiiwwan samii akka ibiddaan gubatanii wal gadi dhiisu, qaamni hawaa keeysaa hundi niis oowwan gubatanii baqanii ti yaa'u.
[13] Nuti ammoo, abdii inni nuuf kanne irra dhaabbannee, bantiiwwan samii haarayaa fi dachii haaraya, tan qaceellummaan keeysa qubattu eegganna.
[14] Eegaa yaa saahibban koo jaalatamoo! Isin warra guyyaa san eeggachaa jirtan waan taataniif, aybii takkaan maleetti warra waa itti hin baanamne taatanii arkamuuf, ammaas Rabbi wajjiiniis nagaya qabaachuuf tattaafadhaa!
[15] Akkuma obboleeysi keenya Phaawulos jaalatamaan, hikmaa Rabbi isaaf kanneen waa'ee isaa isiniif katabetti, obsi Gooftaa keenyaa, najaatuma keeysaniif tahuu yaadadhaa!
[16] Phaawulos, xalayaa isaa hunduma keeysattuu, waa'ee dubbii kanneen laalchisuun wayta katabu haaluma tokkotti dhiheeysa. Xalayoota isaa keeysaa, wanni hubachuun nama dhibu ni jiru; warri wallaaloon ejjennoo hin qabne, akkuma Barreeyfama Qulqulluu tahan kaaniis hiikaa kijibaa tiin jallisanitti, kanneeniis akkasumatti jallisu; akka kanatti badii mataa isaanii irratti fidu.
[17] Isin yaa saahibban kiyya, kana durumaanuu waan beeytaniif jecha, dogongora warra hamoo tiin hayyifamtanii fudhatamtanii, ejjennoo amanamaa qabdan tana irraa akka hin kufne if eeggadhaa!
[18] Ni'imaan Gooftaa keenyaa tii fi naja-baasoo keenya Yesuus Kiristoos beekutti guddadhaa! Ammaa fi bara baraafiis ulfinni isumaaf haa tahu! Aammiin.