[1] Akkuma nabiyyoonni kijibaa ummata dur keeysaa ka'anitti, akkasumatti ammaas barsiisonni kijibaa isin jidduttiis ni arkamu. Isaan barsiisa badii, kan hundee amantii dhaa diigu fidanii, Gooftaa gumaa isaanii baasee isaan eewale illee kadda'anii ti jiru; mataa isaanii irrattiis badii hatattamaan fidaa ti jiru.
[2] Namoonni hedduuniis, mufallisummatti jiraachuu isaanii duukaa ni bu'u; sababa isaanii tiif jecha, karaan dhugaa tiis ni arrabfama.
[3] Barsiisonni kanneen bololummaa isaanii tiin, sheekkoo ifii uumanii odeeysaniin, isin irraahi illee ni faaydamu; firdiin isaanii tiis duruun isaan gubbatti rarraafamte, badiin isaanii tiis tan raftee miti.
[4] Rabbi, maleeykoota dilii hojjataniif, odoo irra hin dabriniif, boolla dukkana azaabaa keeysatti isaan darbee, guyyaa firdii tiif akka ol kaayaman isaan godhe.
[5] Ammaas Rabbi, biyya kaafira addunyaa duriif, odoo irra hin dabriniif, wayta galaana bishaanii biyya addunyaa irratti fide, ammoo Nohi, lallabaa qaceelinaa san, namoota biraa nama torba wajjiin isaan eewale.
[6] Inni, magaalota Sodoomii fi Gomoraatti firdii godhee, ibiddaan daaraa isaan godhuun, warra Rabbi-dhablummaan jiraatan irratti, waan dhufuuf taa'uuf, akka fakkeenya isaan irraa arkannu godhee ti jira.
[7] Loox, namticha qaceelaa, kan haala mufallisummaa warra seera-dhablee irratti nahe saniis ni eewale.
[8] Namtichi qaceelaan sun, wayta isaaniin wajiin jiraachaa ture, waan arkuu fi waan dhagayuun, hojii hamtuu isaanii tiif jecha, lubbuun isaa qaceeltuun, guyyuu isa keeysatti ni cinqamti turte.
[9] Eegaa Gooftaan, namoota Rabbiif bulan fitinaa jalaa baasuu fi, ammaas warra hamtuu dalaganiis hanga guyyaa firdiitti adaba jalatti isaan eeguus itti beeka.
[10] Irrattuu ammoo, warra si'oo jasadaa, tan nama najistu duukaa bu'anii Mootummaa Rabbii tuffatan adabaafi ol kaaya. Isaan warra naamusa hin qabne, dhaytaawoo, warra samii keeysatti ulfina qabanuu, arrabsuuf warra hin qaanfanne.
[11] Maleeykoonni Rabbii, warri barsiisota kijiboo kanneen irra, harka meeqa caalaa amrii fi humna qaban illeen, isaan kanneen Rabbi duratti hin kasan.
[12] Jarreen kun, akka uumaa bineensa baa'imaa kanneen gaadamanii hillimaan qabamanii ajjeefamuuf dhalatanitti, waan isaan hubachuu hin dandeenye hundumaa huu baa'imummaani arrabsu; isaan kanneen akkuma bineensa daggalaatti warra dirgim godhamuuf taa'u.
[13] Darara isaan nama dararaniifiis, dararuma akkasii ti, ujuraaf fudhachuuf taa'u. Wanni isaan gammachiisu, waanuma fedha jasada isaanitti tolu guyyuma zaahiritti dalagu. Jarreen kun isiniin wajjiin dhihana nyaachuuf dhihaachuun isaanii qaani, sablinaasi! Maaliif? Eeyye, isaan ammuma illee, shaaxirummaa isaanii san itti furanii waan jiraniif jecha.
[14] Isaan ija zinaan guutamte qabu, dilii dalagu irraa gad hin taa'an. Namoota amantitti bu'ura jabaa hin qabne dogongorsiisuun, hillima isaanitti galfatu; isaan kanneen, warra shakarummatti fullahoo tahan joollee abaaramo.
[15] Karaa qaceelaa gadi dhiisanii badanii ti jiru; karaa Bala'aam ilmi Be'or, kan waan hamtuu hojjachuu dhaan faaydaa horii arkachuu barbaade irraas bu'anii ti jiru.
[16] Ammoo inni balleeysaa isaa tiif jecha lolamee oofamee ti jira; harreen silaa dubbachuu hin dandeenye illeen, sagalee namaa tiin dubbattee, maraatummaa nabiyyichaa keeysatti gadi ittiftee ti turte.
[17] Jarreen kun akka eela bishaan hin qabnee ti, akka biitee bubbeen ooftuu ti; bakka dukkana cilmaa tu isaaniif ol kaayamee jira.
[18] Dubbii isaanii maalaa-yaanii fi sheekko sheekkoo hiikaa hin qabneen if dhaadatu, si'oo fedha jasada isaaniititti mufallisummattiis jiraachuu isaanii tiin, namoota reefu karaa badii irraa amantiitti deebi'aa jiran dogongorsiisanii, hillima isaaniitti galchu.
[19] Ifii warra badiif gabroome tahanii odoo jiranii ti, warra kanneen bilisummaa dha abdachiisu; namni taanaan, gabrichuma waan isa oggolchiisee ti.
[20] Warri Gooftaa keenyaa fi naja-baasoo keenya Yesuus Kiristoos beekuu dhaan, eega najisa biyya addunyaa jalaa bahan booda, ammaas deebi'anii isumatti shakaalamanii yoo moohaman, xumurri jara kanaa, kan duraa irra caalaa dha hammaata.
[21] Karaa qaceelummaa eega beekan booddee, ajaja qulqulluu isaaniif kanname san irraa garagaluu mannaa, durumaanuu odoo hin beekin silaa waan hafan taatee isaaniif irra wayyaa dha ture.
[22] Makmaaksi, “Sareen diddiga isitti deebiti” akkasumatti ammaas, “Booyyeen dhiqattee dhoqqee keeysa gangalachutti deebiti” jedhu sun, haaluma dhugaa jarreen kanaa ti mullisa.