[1] বাবা আল্লাহ আর হযরত ইসা মসিহ্র লগে যুক্ত থিষলনিকিয় জামাতর হাছে সিলবান, তিমথিয় আর আঁই ফোল এই সিঢি লেকির।
[2] বাবা আল্লাহ আর হযরত ইসা মসিহ্ তোঁয়ারারে রহমত আর শান্তি দান গরক্।
[3] ভাইঅক্যল, তোঁয়ারার লাই অক্যল সমতই আল্লাহ্রে আঁরার শুকরিয়া জানান উচিত। তোঁয়ারার বিশ্যাস বউত বারের আর তোঁয়ারার একজনর লাই অইন্যজনর মহব্যত বাআই ফরের বুলিয়েনেই আঁরার ফক্যে য়েই শুকরিয়া জানান্ উফযুক্ত।
[4] আর ইয়ানর লাইই আল্লাহ্র জামাতগিনর সাম্নদি তোঁয়ারারে লইয়েনে আঁরা গর্ববোধ গরির্, হারন যে জুলুম আর দুক্য-হষ্টগিন তোঁয়ারা সইজ্য গইত্যা লাইগ্যো য়েগিনর মাঝেঅ তোঁয়ারার ধৈয্য আর ইমান টিগি আছে।
[5] এগিন বেক্যিনই আল্লাহ্র নিয়াইবিচারর ফরমান। আর ইয়ানর উদ্যেশ্য অইল্, তোঁয়ারারে যেন্ আল্লাহ্র রাইজ্যর উফযুক্ত বুলিয়েনে ধরা অঅ। ইয়ানর লাইই তঅ তোঁয়ারা এত হষ্টভোগ গইত্যা লাইগ্যো।
[6] আল্লাহ্র নিয়াইবিচার এই — যারা তোঁয়ারারে হষ্ট দেএ তেঁই য়িতারারে হষ্ট দিবো;
[7] আর তোঁয়ারা যারা হষ্ট ফাইতা লাইগ্যো তেঁই আঁরার লগে তোঁয়ারারেঅ হষ্টর ত্যুন রেহাই দিবো। যহন হযরত ইসা তেঁইর শক্তিশালি ফেরেস্তাঅক্যলরে লইয়েনে জলন্ত আগুনর মাঝে বেহেস্তর ত্যুন ফকাশিত অইবো তহনই এগিন অইবো। যারা আল্লাহ্রে নঅ জানে আর যারা হযরত ইসার বিষয়ে সুহ্যবরর হতা মানি নঅ চলে য়িতারারে তেঁই তহন শাস্তি দিবো।
[9] ফভু যহন আইবো তহন য়িতারারে এন্ শাস্তি দেয়া অইবো যিয়ানর হারনে য়িতারা তেঁইর উফস্থিতি আর মআ কুদরতির বাইরদি ফরিয়েনে চিরদিন ধরি তচনচ অইতো থাকিবো। য়েই দিন তেঁইর নিজর মানুষঅক্যলর মইধ্য দিয়েনে তেঁইর মইমা ফকাশিত অইবো আর যারা ইমান আইন্যে য়িতারার বেক্যিনর মইধ্য দিয়েনে তেঁইর গোরব অইবো। তোঁয়ারাঅ য়েই ইমানদারঅক্যলর মাঝে আছ, হারন তোঁয়ারা আঁরার সাক্যি উনিয়েনে ইমান আইন্যো।
[11] য়িয়ানর লাই আঁরা অক্যল সমত তোঁয়ারার লাই মুনাজাত গরি থাকি যেন্ আঁরার আল্লাহ্ তোঁয়ারারে তেঁইর ডাকর যোইগ্য বুলি মনে গরে, আর যেন্ তেঁইর শক্তির মাইধ্যমে তোঁয়ারার ভালা হাম গরিবার বেক ইছ্যা তেঁই ফুরন গরে ও ইমানর হারনে তোঁয়ারা যে হাম গইত্যা লাইগ্যো তেঁই যেন্ য়েগিনত ফুন্যতা দান গরে।
[12] তইলে আঁরার আল্লাহ্ আর হযরত ইসা মসিহ্র রহমতর হারনে আঁরার হযরত ইসার গোরব তোঁয়ারার মইধ্য দিয়েনে ফকাশিত অইবো, আর তোঁয়ারাঅ তেঁইর মইধ্য দিয়েনে গোরব ফাইবা।