[1] ᐁᑯᓯ ᑭ ᒫᒪᐃᐧ ᓇᑐᒣᐤ ᒥᑖᑕᐟ ᓂᓱᓵᑊ, ᐁ ᑭ ᒥᔮᐟ ᒫᑲ ᑲᐢᑭᐦᐁᐃᐧᓯᐃᐧᐣ ᒥᓇ ᑎᐯᔨᐦᒋᑫᐃᐧᐣ ᑭᑕ ᑎᐯᔨᒪᒋᐠ ᑲᐦᑭᔭᐤ ᒪᒋ ᐊᐦᒑᐦᑲᐧ, ᒥᓇ ᑭᑕ ᒥᓈᐧᒋᑖᔨᐟ ᐋᑯᓯᐃᐧᓇ,
[2] ᐁ ᑭ ᓯᐯᐧᑎᓴᐋᐧᐟ ᒫᑲ ᑭᑕ ᑲᑫᐢᑳᐧᑕᒥᔨᐟ ᐅᐟ ᐅᑌᓇᐃᐧᐃᐧᓂᔨᐤ ᑭᓭᒪᓂᑐᐊᐧ, ᒥᓇ ᑭᑕ ᐃᔨᓂᑲᐦᐋᔨᐟ ᐅᑖᐦᑯᓯᐊᐧ.
[3] ᐁᑯᓯ ᑭ ᐃᑌᐤ, ᐁᑳᐃᐧᔭ ᑫᑲᐧᐩ ᐅᑎᓇᒧᐠ ᑭ ᐱᒧᐦᑌᐅᐃᐧᓂᐋᐧᐤ ᐅᐦᒋ, ᓇᒪᐃᐧᔭ ᓴᐢᑲᐅᐣ, ᐊᐦᐳ ᒪᐢᑭᒧᐟ, ᓇᒪᐃᐧᔭ ᐸᑫᐧᓯᑲᐣ, ᐊᐦᐳ ᓱᓂᔮᐤ; ᒥᓇ ᐁᑳᐃᐧᔭ ᐊᐃᐧᔭᐠ ᓂᓱ ᒥᐢᑯᑖᑳᔭ ᑭᑕ ᐊᔮᐤ.
[4] ᐁᑯᓯ ᐱᑯ ᐊᓂᒪ ᐋᐧᐢᑳᐦᐃᑲᐣ ᑫ ᐱᐦᑐᑫᔦᐠ, ᐁᑯᑕ ᐊᔮᐠ, ᒥᓇ ᐁᑯᑕ ᐅᐦᒋ ᓯᐯᐧᑌᐧᐠ.
[5] ᑕᐦᑐ ᒫᑲ ᐁᑳ ᑫ ᐅᑎᓂᑯᔦᑯᐠ, ᐃᐢᐱ ᓯᐯᐧᑌᔦᑯ ᐁᑯᑕ ᐅᑌᓈᕽ ᐅᐦᒋ, ᐸᐸᐊᐧᐊᒧᐠ ᐋᓯᐢᑭ ᑭᓯᑎᐊᐧᕽ ᐅᐦᒋ ᑭᑕ ᐋᒋᒥᑯᒋᐠ.
[6] ᐁᑯᓯ ᑭ ᓯᐯᐧᑌᐊᐧᐠ, ᒥᓇ ᐁ ᑭ ᐱᒥ ᓴᐳᐢᑲᑭᐠ ᐅᑌᓇᐊᐧ ᐁ ᑲᑫᐢᑳᐧᑕᑭᐠ ᒥᔪ ᐊᒋᒧᐃᐧᐣ, ᒥᓇ ᒥᓯᐁᐧ ᐃᑌ ᐁ ᐃᔨᓂᑲᐃᐁᐧᒋᐠ.
[7] ᐁᕒᐊᐟ ᒫᑲ ᑭᐦᒋ ᐅᑭᒫᐤ ᑭ ᐯᑕᑦ ᑲᐦᑭᔭᐤ ᑫᑲᐧᐩ ᑳ ᑭ ᑐᑕᒧᐟ: ᐁᑯᓯ ᒥᐢᑕᐦᐃ ᑭ ᒥᑯᐢᑳᑌᔨᑕᑦ, ᒋᑫᒪ ᐋᑎᐦᐟ ᐁ ᑭ ᐃᑌᐧᒋᐠ, ᒑᐣ ᐁ ᑭ ᐊᐧᓂᐢᑳᐟ ᓂᐳᐃᐧᓂᕽ ᐅᐦᒋ;
[8] ᒥᓇ ᐋᑎᐦᐟ ᐃᓬᐊᐃᒐᐊᐧ ᐁ ᑭ ᓄᑯᓯᔨᐟ; ᐁᑯᓯ ᒥᓇ ᐊᑎᐟ, ᐯᔭᐠ ᑲᔮᓯ ᐅᑭᐢᑭᐁᐧᐦᐃᑫᐊᐧ ᐁ ᑭ ᐊᐧᓂᐢᑳᔨᐟ.
[9] ᐁᑯᓯ ᐁᕒᐊᐟ ᑭ ᐃᑌᐧᐤ, ᒑᐣ ᓂ ᑭ ᑭᐢᑭᑫᐧᑕᐋᐧᐤ; ᒫᑲ ᐊᐁᐧᓈᐊᐧ ᑳ ᐯᑕᒫᐣ ᐅᒪ ᑳ ᐃᑖᒋᒥᐦᐟ? ᐁᑯᓯ ᑭ ᐊᑳᐋᐧᑕᑦ ᑭᑕ ᐋᐧᐸᒫᐟ.
[10] ᐁᑯᓯ ᐃᓯᑎᓴᐋᐧᑲᓇ, ᐃᐢᐱ ᐁ ᑭ ᐯ ᑭᐁᐧᔨᐟ, ᑭ ᐋᒋᒧᐢᑖᐠ ᑲᐦᑭᔭᐤ ᐊᓂᒪ ᑳ ᑭ ᑐᑕᒥᔨᐟ. ᐁᑯᓯ ᑭ ᐅᑎᓀᐤ, ᐅᐱᒣ ᒫᑲ ᐁ ᑭ ᐃᑐᐦᑌᒋᐠ, ᐱᑲᐧᑕᐢᑭᕽ ᐃᑌᑫ ᐅᑌᓇᐤ ᐯᐟᓭᑕ ᑭᓯᐊᐧᐠ ᐃᑕ ᐁ ᐊᔮᔨᐠ.
[11] ᒫᑲ ᐊᔨᓯᔨᓂᐊᐧ ᐃᐢᐱ ᐁ ᑭᐢᑫᔨᑕᒥᔨᐟ, ᑭ ᐱᒥᑎᓴᐦᐅᐠ; ᑭ ᐊᑕᒥᐢᑲᐁᐧᐤ ᒫᑲ, ᒥᓇ ᐁ ᑭ ᑕᓯᑕᒪᐋᐧᐟ ᐅᑐᑌᓇᐃᐧᐃᐧᓂᔨᐤ ᑭᓭᒪᓂᑐᐊᐧ, ᒥᓇ ᐁ ᑭ ᐃᔨᓂᑲᐦᐋᐟ ᐊᓂᐦᐃ ᐁᑯᓯ ᑳ ᐃᓯ ᑭᐧᑕᒫᔨᐟ.
[12] ᐃᐢᐱ ᒫᑲ ᑭᓯᑳᐤ ᐁ ᐊᑎ ᒣᒋᐸᔨᐠ; ᑭ ᐯ ᓈᑎᐠ ᐊᓂᐦᐃ ᒥᑖᑕᐟ ᓂᓱᓵᑊ, ᐁ ᑭ ᐃᑎᑯᐟ, ᓯᐯᐧᑎᓯᐅᐠ ᑳ ᒥᐦᒉᑎᒋᐠ ᐊᔨᓯᔨᓂᐊᐧᐠ, ᐅᑌᓈᕽ ᑭᑕ ᐃᑐᐦᑌᒋᐠ ᒥᓇ ᐊᐧᐢᑲ ᐊᐢᑭᕽ, ᑭᑕ ᑳᐯᓯᒋᐠ, ᒥᓇ ᑭᑕ ᐊᔮᒋᐠ ᒥᒋᐃᐧᐣ; ᒋᑫᒪ ᐱᑲᐧᑕᐢᑭᕽ ᐅᑕ ᑳ ᐊᔮᔭᕽ.
[13] ᒫᑲ ᑭ ᐃᑌᐤ, ᑭᔭᐋᐧᐤ ᒥᔨᑯᐠ ᑭᑕ ᒥᒋᒋᐠ, ᐁᑯᓯ ᑭ ᐃᑌᐧᐊᐧᐠ, ᓇᒪᐃᐧᔭ ᐊᐊᐧᓯᒣ ᓂᐟ ᐊᔮᓈᐣ ᐱᑯ ᓂᔮᓇᐣ ᐱᓭᐧ ᐊᔭᑯᓈᐊᐧᐠ ᒥᓇ ᓂᓱ ᑭᓄᓭᐊᐧᐠ; ᐱᑯ ᑭᐢᐱᐣ ᐃᑐᐦᑌᔮᕽ ᑭᑕ ᐊᑕᐁᐧᔮᕽ ᒥᒋᐃᐧᑦ ᑲᐦᑭᔭᐤ ᐅᑭ ᐊᔨᓯᔨᓂᐊᐧᐠ ᑭᑕ ᒥᒋᒋᐠ.
[14] ᐃᐧᔭ ᓈᓂᑕᐤ ᓂᔮᓇᓈᐤ ᑭᐦᒋ ᒥᑖᑕᐦᑐᒥᑕᓇᐤ ᐁ ᑭ ᐃᐦᑕᓯᒋᐠ. ᑭ ᐃᑌᐤ ᒫᑲ ᐅ ᑭᐢᑭᓄᐦᐊᒪᐋᐧᑲᓇ, ᐸᐯᐢᑭᐨ ᓇᐦᐊᐱᐃᑯᐠ ᓈᓂᔮᓇᓄᒥᑕᓇᐤ ᓈᐣᑕᐤ.
[15] ᐁᑯᓯ ᒫᑲ ᐁ ᑭ ᐃᑐᑕᐦᑭᐠ, ᑲᐦᑭᔭᐤ ᒫᑲ ᐁ ᑭ ᓇᐦᐊᐱᐋᒋᐠ.
[16] ᑭ ᐅᑎᓀᐤ ᒫᑲ ᐊᓂᐦᐃ ᓂᔮᓇᐣ ᐱᓭᐧ ᐊᔭᑯᓈᐊᐧ ᐊᓯᒋ ᐊᓂᐦᐃ ᓂᓱ ᑭᓄᓭᐊᐧ, ᑭᐦᒋ ᑭᓯᑯᕽ ᒫᑲ ᐁ ᐃᓯ ᑕᐢᑕᓵᐱᐟ, ᑭ ᒥᔭᐧᑭᒣᐤ; ᐁ ᑭ ᐸᐹᑫᐧᓈᐟ ᒫᑲ ᐁ ᑭ ᒥᔮᐟ ᐅ ᑭᐢᑭᓄᐦᐊᒪᐋᐧᑲᓇ ᑭᑕ ᐊᐢᑕᒪᐊᐧᔨᐟ ᐊᔨᓯᔨᓂᐊᐧ.
[17] ᐁᑯᓯ ᑭ ᒥᒋᓱᐊᐧᐠ, ᒥᓇ ᑲᐦᑭᔭᐤ ᐁ ᑭ ᑭᐢᐳᒋᐠ; ᑭ ᐅᑎᓂᑳᑌᐊᐧ ᒫᑲ ᑳ ᐊᐊᐧᓯᒣᐸᔨᑭ ᐱᐊᐧᒋᑲᓇ, ᒥᑖᑕᐟ ᓂᓱᓵᑊ ᐃᐧᑯᐱᐊᐧᑕ.
[18] ᑭ ᐊᔨᑭᐣ ᒫᑲ, ᒣᑳᐧᐨ ᐁ ᐯᔭᑯ ᐊᔭᒥᐦᐋᐟ ᐅ ᑭᐢᑭᓄᐦᐊᒪᐋᐧᑲᓇ ᐁ ᐃᐧᒉᐃᐧᑯᐟ: ᑭ ᑲᑫᐧᒋᒣᐤ, ᐁ ᐃᑌᐧᐟ, ᐊᐁᐧᓇ ᐊᔨᓯᔨᓂᐊᐧᐠ ᐁᑌᐧᒋᐠ ᓂᔭ ᐁ ᐋᐃᐧᔮᐣ,
[19] ᐁᑯᓯ ᑭ ᓇᐢᑫᐧᐊᐧᓯᒣᐊᐧᐠ ᐁ ᐃᑖᒋᐠ, ᒑᐣ ᐅᐹᑊᑕᐃᓯᐃᐧᐃᐁᐧᐤ; ᒫᑲ ᑯᑕᑲᐠ ᐃᑌᐧᐊᐧᐠ, ᐃᓬᐊᐃᒐ: ᒥᓇ ᐋᑎᐦᐟ, ᐯᔭᐠ ᑲᔮᓯ ᐅᑭᐢᑭᐁᐧᐦᐃᑫᐤ ᑭ ᐊᐧᓂᐢᑳᐤ.
[20] ᐁᑯᓯ ᑭ ᐃᑌᐤ, ᑭᔭᐋᐧᐤ ᒫᑲ ᐊᐁᐧᓇ ᐁᑌᐧᔦᐠ ᐁ ᐋᐃᐧᔮᐣ? ᐱᑕᕒ ᐁ ᓇᐢᑫᐧᐊᐧᓯᒫᐟ ᑭ ᐃᑌᐧᐤ, ᐅ ᙭ᐃᒪ ᑭᓭᒪᓂᑐ.
[21] ᑭ ᐊᔮᑳᐧᒥᒣᐤ ᒫᑲ, ᒥᓇ ᐁ ᑭ ᐃᑕᓱᐋᐧᑖᐟ ᐁᑳ ᐊᐃᐧᔭ ᐁᐊᐧᑲᐧᓂᒪ ᑭᑕ ᐃᐧᐦᑕᒪᐊᐧᔨᐟ;
[22] ᐁ ᐃᑌᐧᐟ ᐃᔨᓂᐃᐧᑯᓯᓵᐣ ᐃᑕᐢᑌᔨᐤ ᒥᒉᑕᐧᔭᐠ ᑭᑕ ᐃᓯ ᑲᑳᐧᑕᑭᑖᐟ, ᒥᓇ ᑭᑕ ᐋᑕᐁᐧᔨᒥᑯᐟ ᑭᐦᒋ ᐊᔭᒥᐁᐃᔨᓂᐊᐧ ᐊᓯᒋ ᒪᓯᓇᐦᐃᑫᐃᐧᔨᓂᐊᐧ, ᒥᓇ ᑳ ᓂᑳᓀᔨᑖᑯᓯᔨᐟ, ᑭᑕ ᓂᐸᐃᐟ ᒫᑲ, ᒥᓇ ᑭᑕ ᐊᐧᓂᐢᑳᓂᐦᐟ ᑭ ᓂᐢᑐ ᑭᓯᑳᔨᑭ.
[23] ᐁᑯᓯ ᑲᐦᑭᔭᐤ ᑭ ᐃᑌᐤ, ᑭᐢᐱᐣ ᐊᐃᐧᔭᐠ ᐊᔨᓯᔨᓂᐤ ᐃᐧ ᐱᒥᑎᓴᐅᒋ, ᑭᔮᑦ ᑭᑕ ᐊᓀᐧᑕᓱ, ᒥᓇ ᑭᑕ ᐅᑎᓇᑦ ᐅ ᐱᒥᑖᐢᑲᐧᐃᑲᐣ ᑕᐦᑐ ᑭᓯᑳᐤ, ᐁᑯᓯ ᓂ ᑲ ᐃᓯ ᐱᒥᑎᓴᐦᐅᐠ.
[24] ᒋᑫᒪ ᐱᑯ ᐊᐃᐧᔭᐠ ᑫ ᐃᐧ ᑲᑫᐧ ᐱᒫᒋᑖᑫᐧ ᐅ ᐱᒫᑎᓯᐃᐧᐣ ᑭᑕ ᐊᐧᓂᑕᐤ; ᒫᑲ ᐱᑯ ᐊᐃᐧᔭᐠ ᑫ ᐊᐧᓂᑖᑫᐧ ᐅ ᐱᒫᑎᓯᐃᐧᐣ ᓂᔭ ᐅᐦᒋ, ᐁᐊᐧᑲᐧᓇ ᑫ ᐱᒪᒋᑖᐟ.
[25] ᒋᑫᒪ ᑖᓂᓯ ᑫ ᐃᑖᐸᒋᐦᐃᑯᐟ ᐊᔨᓯᔨᓂᐤ, ᐋᑕ ᑭᐢᐱᓇᑕᑭ ᑲᐦᑭᔭᐤ ᐊᐢᑭ, ᐁᑯᓯ ᓂᓯᐊᐧᓈᒋᐅᒋ, ᐊᐦᐳ ᐊᐧᓂᐦᐅᒋ?
[26] ᒋᑫᒪ ᐱᑯ ᐊᐃᐧᔭᐠ ᑫ ᓀᐯᐃᐧᓯᑫᐧ ᓂᔭ, ᒥᓇ ᓂᐟ ᐊᔭᒥᐃᐧᓇ ᐅᐦᒋ, ᐁᐊᐧᑲᐧᓂ ᐃᔨᓂᐃᐧᑯᓯᓵᐣ ᑫ ᓀᐯᐊᐧᑫᔨᒫᐟ, ᐃᐢᐱ ᑕᑯᓯᑭ ᑭᑭ ᐅ ᑭᐢᑌᔨᑖᑯᓯᐃᐧᐣ, ᐊᓯᒋ ᐅᑖᐃᐧᔭ ᐅ ᑭᐢᑌᔨᑖᑯᓯᐃᐧᓂᔨᐤ ᒥᓇ ᐊᓂᐦᐃ ᑲᓇᒋ ᐅᑭᓯᑯᐊᐧ.
[27] ᒫᑲ ᑭ ᐃᐧᐦᑕᒫᑎᓈᐋᐧᐤ ᐁ ᑖᐯᐧᔮᐣ, ᐋᑎᐦᐟ ᐅᑕ ᓂᐸᐃᐧᐊᐧᐠ, ᐁᑳ ᑫ ᑯᒋᐢᑕᑭᐠ ᓂᐳᐃᐧᐣ, ᐹᑎᒫ ᑭ ᐋᐧᐸᐦᑕᑳᐧᐃᐧ ᐅᐟ ᐅᑌᓇᐃᐧᐃᐧᓂᔨᐤ ᑭᓭᒪᓂᑐᐊᐧ.
[28] ᑭ ᐊᔨᐢᐸᔨᐤ ᒫᑲ ᓈᓂᑕᐤ ᐊᔨᓈᓀᐤ ᑭᓯᑳᐤ ᐃᔨᑯᕽ, ᐃᐢᐱ ᐅᒪ ᐁ ᑭ ᐃᑌᐧᐟ, ᑭ ᐅᑎᓀᐤ ᐱᑕᕒ ᒥᓇ ᒑᐣ ᐊᓯᒋ ᒉᒥᐢ, ᐊᐧᒋᕽ ᒫᑲ ᐁ ᑭ ᐃᓯ ᐋᒪᒋᐁᐧᐟ ᑭᑕ ᐊᔭᒥᐦᐋᐟ.
[29] ᒣᑳᐧᐨ ᒫᑲ ᐁ ᐊᔭᒥᐦᐋᐟ, ᐱᑐᐢ ᑭ ᐃᓯᓈᑯᓯᐤ ᐅᑳᐧᑲᓂᕽ, ᐁᑯᓯ ᐅ ᑭᑭᐢᑭᑲᓇ ᑭ ᐊᐧᐱᐢᑭᐸᔨᔨᐊᐧ ᒥᓇ ᐁ ᑭᐦᑳᐋᐧᓯᑌᔨᑭ.
[30] ᒫᑎᑲ ᒫᑲ, ᑭ ᐃᐧᒋ ᐱᑭᐢᑫᐧᒥᐠ ᓂᓱ ᐊᔨᓯᔨᓂᐊᐧ ᐁᐊᐧᑲᐧᓂ ᒧᓯᓴ ᒥᓇ ᐃᓬᐊᐃᒐᐊᐧ;
[31] ᐁᐊᐧᑲᐧᓂᐦ ᐁ ᓄᑯᓯᔨᐟ ᑭᐢᑌᔨᑖᑯᓯᐃᐧᓂᕽ, ᒥᓇ ᐁ ᑕᓯᑕᒥᔨᐟ ᐊᓂᒪ ᑫ ᐃᓯ ᓂᐱᐟ ᒉᕒᐅᓴᓬᐊᒥᕽ.
[32] ᐱᑕᕒ ᒫᑲ ᐊᓯᒋ ᐊᓂᐦᐃ ᑳ ᐃᐧᒉᐃᐧᑯᐟ ᓈᐢᐱᐨ ᑭ ᓄᑌᑲᐧᓯᐊᐧᐠ; ᒫᑲ ᐃᐢᐱ ᒥᑐᓂ ᑳ ᐯᑯᐸᔨᒋᐠ, ᑭ ᐋᐧᐸᐦᑕᒣᐧᐊᐧᐠ ᐅ ᑭᐢᑌᔨᑖᑯᓯᐃᐧᓂᔨᐤ ᐊᓯᒋ ᐊᓂᐦᐃ ᓂᓱ ᐊᔨᓯᔨᓂᐊᐧ ᑳ ᐃᐧᒋᑳᐸᐃᐧᐢᑕᑯᔨᐟ.
[33] ᑭ ᐊᔨᑭᐣ ᒫᑲ, ᐃᐢᐱ ᐁ ᐊᑎ ᐸᐢᑫᐃᐧᐃᑯᐟ, ᐱᑕᕒ ᑭ ᐃᑌᐤ ᒋᓴᓴ, ᐅᑭᐢᑭᓄᐦᐊᒫᑫᐤ, ᒥᔮᐧᓯᐣ ᐅᑕ ᑭᑕ ᐊᔮᔭᕽ: ᑭᔮᑦ ᓂ ᑲ ᐅᓯᑖᓈᐣ ᓂᐢᑐ ᒥᑭᐋᐧᐸ; ᐯᔭᐠ ᑭᔭ ᑭᑕ ᐊᔮᔭᐣ, ᐁᑯᓯ ᐯᔭᐠ ᒧᓯᐢ, ᒥᓇ ᐯᔭᐠ ᐃᓬᐊᐃᒐ: ᐁᑳ ᐁ ᑭᐢᑫᔨᑕᕽ ᑖᓂᓯ ᐁ ᐃᑌᐧᐟ.
[34] ᒣᑳᐧᐨ ᐅᒪ ᐁ ᐃᑌᐧᐟ, ᐁᑯᑕ ᑭ ᐯ ᔨᑯᐸᔨᐤ ᐊᐧᐢᑯ, ᑭ ᓭᑭᓯᐊᐧᐠ ᒫᑲ ᐊᐧᐢᑯᕽ ᐁ ᐊᑎ ᐊᔮᒋᐠ.
[35] ᐁᑯᓯ ᐊᐃᐧᔭᐠ ᑭ ᐯᐦᑖᑯᓯᐤ ᐊᐧᐢᑯᕽ ᐅᐦᒋ; ᐁ ᐃᑌᐧᐟ, ᐁᐊᐧᑲᐧᐊᐧ ᓂᑯᓯᐢ ᑳ ᓇᐊᐧᓱᓇᐠ, ᓇᑐᑖᕽ.
[36] ᐃᐢᐱ ᒫᑲ ᐁ ᐳᓂ ᐯᑖᑲᐧᕽ, ᒋᓴᐢ ᐳᑎ ᑭ ᐯᔭᑯ. ᒥᑐᓂ ᒫᑲ ᑭ ᑲᓇᐁᐧᔨᑕᒪᐧᐠ, ᐁᑳ ᐊᐃᐧᔭ ᐊᔨᓯᔨᓂᐊᐧ ᐁᑯᐢᐱ ᐁ ᑭ ᐃᐧᐦᑕᒪᐋᐧᒋᐠ ᐊᓂᐦᐃ ᑳ ᑭ ᐋᐧᐸᐦᑕᐦᑭᐠ.
[37] ᐁᑯᓯ ᑭ ᐃᐦᑭᐣ, ᐁ ᐊᑎ ᐋᐧᐸᕽ, ᐃᐢᐱ ᐁ ᑭ ᐯ ᓂᑕᒋᐁᐧᒋᐠ ᐊᐧᒋᕽ ᐅᐦᒋ, ᒥᓴᒋ ᐊᔨᓯᔨᓂᐊᐧ ᑭ ᓇᑭᐢᑳᐠ.
[38] ᐁᑯᓯ ᒋᐢᐟ, ᐯᔭᐠ ᓈᐯᐤ ᐊᔨᓯᔨᓂᓈᕽ ᐅᐦᒋ ᑭ ᒪᐃᐧᒧᐢᑖᐠ, ᐁ ᐃᑌᐧᔨᐟ, ᐅᑭᐢᑭᓄᐦᐊᒫᑫᐤ ᑭ ᒪᐃᐧᒧᐢᑕᑎᐣ ᑭᑕ ᑲᓇᐋᐧᐸᒪᐟ ᓂ ᑯᓯᐢ; ᐃᐧᔭ, ᐁᐊᐧᑯ, ᐱᑯ ᐁ ᐯᔭᑯᐟ ᓂᐟ ᐊᐋᐧᓯᒥᐢ:
[39] ᒫᑎᑲ ᒫᑲ, ᐊᐦᒑᐦᑲᐧ ᐅᑎᑎᓂᐠ ᒪᓇ, ᐁᑯᓯ ᑫᑕᑕᐁᐧ ᒪᐃᐧᒧ; ᒥᓇ ᐱᑯᐱᑎᐠ, ᐱᔨᐢ ᒪᓇ ᐱᐢᑌᐃᐧᑐᓀᐤ, ᐁᑯᓯ ᐊᑳᐊᐧᐨ ᐁ ᓇᑲᑎᑯᐟ ᒥᑐᓂ ᑭᑎᓈᒋᐱᑎᐠ.
[40] ᓂ ᑭ ᑳᑭᓯᒧᑐᑕᐋᐧᐊᐧᐠ ᒫᑲ ᑭ ᑭᐢᑭᓄᐦᐊᒪᐋᐧᑲᓇᐠ ᑭᑕ ᐊᐧᔭᐃᐧᐁᐧᐱᓈᒋᐠ, ᒫᑲ ᓇᒪᐃᐧᔭ ᑭ ᑲᐢᑭᑖᐊᐧᐠ.
[41] ᐁᑯᓯ ᒋᓴᐢ ᑭ ᓇᐢᑫᐧᐊᐧᓯᒣᐤ, ᐁ ᐃᑖᐟ, ᐋ ᑭᔭᐋᐧᐤ ᐁᑳ ᑳ ᐅᑖᐯᐧᑕᒧᐃᐧᓂᔦᐠ ᒥᓇ ᑳ ᓇᔦᑖᐊᐧᑎᓯᔦᐠ, ᑖᓂᔨᑯᕽ ᑫ ᐃᐧᒉᐃᐧᑕᑯᐠ, ᒥᓇ ᑫ ᓯᑐᐃᐧᔨᑕᑯᐠ? ᐯᓯᐤ ᐅᑕ ᑭᑯᓯᐢ.
[42] ᒣᑳᐧᐨ ᒫᑲ ᐁ ᐯ ᐃᑐᐦᑌᐟ, ᒪᒋ ᐊᐦᒑᐦᑲᐧ ᑭ ᐸᑲᒥᓯᒥᐠ, ᒥᓇ ᐁ ᐱᑯᐱᑎᑯᐟ: ᒫᑲ ᒋᓴᐢ ᑭ ᑭᑐᑌᐤ ᒪᒋ ᐊᐦᒑᐦᑲᐧ, ᐁ ᑭ ᐃᔨᓂᑲᐦᐋᐟ ᐊᓂᐦᐃ ᓈᐯᓯᓴ, ᒥᓇ ᑲᐃᐧ ᐅᑕᐃᐧᔨᐊᐧ ᐁ ᑭ ᒥᔮᐟ.
[43] ᑲᐦᑭᔭᐤ ᒫᑲ ᑭ ᒫᒪᐢᑳᑕᒣᐧᐊᐧᐠ ᐊᓂᒪ ᐅ ᑭᐦᒋ ᒪᐢᑲᐃᐧᓯᐃᐧᓂᔨᐤ ᑭᓭᒪᓂᑐᐊᐧ. ᒫᑲ ᒣᑳᐧᐨ ᐁ ᒫᒪᐢᑲᑕᑭᐠ ᑲᐦᑭᔭᐤ ᑫᑲᐧᔭ ᑳ ᑭ ᐃᑐᑕᒥᔨᐟ, ᑭ ᐃᑌᐤ, ᐅ ᑭᐢᑭᓄᐦᐊᒪᐋᐧᑲᓇ
[44] ᑭᔮᑦ ᐅᐦᐃ ᐱᑭᐢᑫᐧᐃᐧᓇ ᑭᑕ ᑯᑖᐃᐧᐸᔨᐊᐧ ᑭᑕᐊᐧᑳᐋᐧᕽ; ᒋᑫᒪ ᐃᔨᓂᐃᐧᑯᓯᓵᐣ ᑭᑕ ᐸᑭᑎᓈᐤ ᐅᒋᐦᒋᔨᕽ ᐊᔨᓯᔨᓂᐊᐧ.
[45] ᒫᑲ ᓇᒪᐃᐧᔭ ᑭ ᓂᓯᑐᐦᑕᒪᐧᐠ ᐅᒪ ᐃᑌᐧᐃᐧᐣ, ᐃᐧᔭ ᐁ ᑭ ᑳᑕᒫᒋᐠ, ᐁᑳ ᑭᑕ ᐋᐧᐸᐦᑕᐦᑭᐠ; ᒥᓇ ᐁ ᑭ ᒪᓈ ᑲᑫᐧᒋᒪᒋᐠ ᐅᒪ ᐃᑌᐧᐃᐧᐣ.
[46] ᑭ ᒫᒋᐸᔨᐤ ᒫᑲ ᐁ ᑲᑫᐧᒋᑐᒋᐠ, ᐊᐁᐧᓇ ᐃᐧᔭᐋᐧᐤ ᑳ ᐃᐦᑕᓯᒋᐠ ᑫ ᓂᑳᓀᔨᑖᑯᓯᐟ.
[47] ᒫᑲ ᐃᐢᐱ ᒋᓴᐢ ᐃᐧᔮᐸᐦᑕᕽ ᐁ ᐃᓯ ᓇᑲᑕᐁᐧᔨᑕᒥᔨᐟ ᐅᑌᐃᔨᕽ, ᑭ ᐅᑎᓀᐤ ᐁ ᐊᐱᓯᓯᓯᔨᐟ ᐊᐋᐧᓯᓴ, ᐁᑯᓯ ᐁ ᑭ ᓇᐦᐋᐱᐋᐟ ᐃᑕ ᐁ ᐊᐱᐟ,
[48] ᒥᓇ ᐁ ᑭ ᐃᑖᐟ. ᐱᑯ ᐊᐃᐧᔭᐠ ᑫ ᐅᑎᓈᑫᐧ ᐅᐦᐃ ᐊᐋᐧᓯᓴ ᓂ ᐃᐧᔪᐃᐧᓂᕽ ᓂᔭ ᓂᐟ ᐅᑎᓂᐠ: ᒥᓇ ᐊᓇ ᑫ ᐅᑎᓂᐟ, ᐅᑎᓀᐤ ᐊᓂᐦᐃ ᑳ ᑭ ᐯ ᐃᓯᑎᓴᐅᔨᐟ; ᒋᑫᒪ ᐊᓇ ᑭᔭᐋᐧᐤ ᑳ ᒫᐊᐧᒋ ᐊᐱᐢᑌᔨᑖᑯᓯᐟ, ᐁᐊᐧᑳᐧᓇ ᑫ ᑭᐦᒑᔨᐃᐧᐟ.
[49] ᒑᐣ ᒫᑲ ᑭ ᓇᐢᑫᐧᐊᐧᓯᒣᐤ ᒥᓇ ᐁ ᑭ ᐃᑌᐧᐟ, ᑭᐢᑭᓄᐊᒪᑫᔭᐣ ᓂ ᑭ ᐋᐧᐸᒫᓈᐣ ᐯᔭᐠ ᐁ ᐊᐧᔭᐃᐧ ᐁᐧᐱᓈᐟ ᒪᒋ ᐊᐦᒑᐦᑲᐧ ᑭ ᐃᐧᔪᐃᐧᓂᕽ; ᐁᑯᓯ ᓂ ᑭ ᑭᑖᐊᒪᐋᐧᓈᐣ, ᒋᑫᒫ ᐁᑳ ᐁ ᐱᒥᑎᓴᐅᑯᔮᕽ.
[50] ᒋᓴᐢ ᒫᑲ ᑭ ᐃᑌᐤ, ᐁᑳᐃᐧᔭ ᑭᑕᐊᒫᕽ: ᐃᐧᔭ ᐊᓇ ᐁᑳ ᑳ ᓇᑳᐢᑳᑯᔦᐠ ᑭ ᐃᐧᒉᑯᐋᐧᐤ
[51] ᑭ ᐊᔨᑭᐣ ᒫᑲ, ᐃᐢᐱ ᐁᑎ ᐃᐢᐸᔨᔨᐠ ᐃᑕ ᐊᓂᒪ ᑭᑕ ᐅᑎᓂᐟ ᐃᐢᐱᒥᕽ ᑭ ᒪᐢᑲᐃᐧ ᐃᑎᐢᑫᐧᔨᐤ ᒉᕒᐅᓴᓬᐊᒥᕽ ᑭᑕ ᐃᑐᐦᑌᐟ,
[52] ᐁᑯᓯ ᑭ ᓂᑲᓂ ᐃᓯᑎᓴᐁᐧᐤ ᐅᑖᒋᒧᐊᐧ: ᐁ ᑭ ᐃᑐᐦᑌᔨᐟ ᒫᑲ, ᒥᓇ ᐁ ᑭ ᐱᐦᑐᑫᔨᐟ ᓴᒪᕒᐃᑕᐣ ᑭᐢᑕᐱᓈᓂᕽ, ᐁᑯᑕ ᑭᑕ ᑲᐧᔮᒋᐦᑕᒫᑯᐟ.
[53] ᒫᑲ ᓇᒪᐃᐧᔭ ᑭ ᐱᑐᑲᐃᐠ, ᒋᑫᒪ ᒪᓇ ᐱᑯ ᒉᕒᐅᓴᓬᐊᒥᕽ ᐁ ᐃᐧ ᐃᑐᐦᑌᐟ ᑭ ᐃᑕᐸᒥᓈᑯᓯᐤ.
[54] ᐃᐢᐱ ᒫᑲ ᐅ ᑭᐢᑭᓄᐦᐊᒪᐋᐧᑲᓇ ᒉᒥᐢ ᒥᓇ ᒑᐣ ᐃᐧᔭᐸᑕᑭᐠ ᐅᒪ, ᑭ ᐃᑌᐧᐊᐧᐠ, ᑳ ᑎᐯᔨᐦᒋᑫᔭᐣ, ᓂ ᑲ ᑌᐹᐧᑌᓈᐣ ᒋ ᐃᐢᑯᑌᐤ ᑭᓯᑯᕽ ᐅᐦᒋ, ᑭᑕ ᓂᓯᐊᐧᓈᒋᐃᑯᒋᐠ?
[55] ᒫᑲ ᑭ ᐋᐸᒥᑳᐸᐃᐧᐤ, ᑭ ᑭᑐᑌᐤ, ᒥᓇ ᑭ ᐃᑌᐤ, ᓇᒪᐃᐧᔭ ᑭ ᑭᐢᑫᔨᑌᓈᐋᐧᐤ ᑫᑯ ᐊᐦᒑᕽ ᑳ ᑭᑭᐢᑳᑯᔦᐠ.
[56] ᒋᑫᒪ ᐃᔨᓂᐃᐧᑯᓯᓵᐣ ᓇᒪᐃᐧᔭ ᐯ ᐃᑐᐦᑌᐤ ᑭᑕ ᓂᓯᐊᐧᓈᒋᐦᐋᐟ ᐊᔨᓯᔨᓂᐊᐧ ᒫᑲ ᑭᑕ ᐱᒫᒋᐦᐋᐟ. ᐁᑯᓯ ᑯᑕᐠ ᑭᐢᑕᐱᓈᓂᕽ ᑭ ᐃᑐᐦᑌᐊᐧᐠ.
[57] ᐁ ᐊᑎ ᓯᐯᐧᑌᒋᐠ ᒫᑲ, ᐯᔭᐠ ᓈᐯᐊᐧ ᑭ ᐃᑎᐠ, ᑭ ᑲ ᐱᒥᑎᓴᐦᐅᑎᐣ ᐱᑯ ᐃᑕ ᑫ ᐃᑐᑌᐊᐧᓀ.
[58] ᐁᑯᓯ ᒋᓴᐢ ᑭ ᐃᑌᐤ, ᒪᐦᑫᓯᓴᐠ ᐅ ᐊᐧᑎᐊᐧᐠ ᒥᓇ ᐱᔦᓯᓴᐠ ᐃᐢᐱᒥᕽ ᑳ ᐊᔮᒋᐠ ᐅ ᐊᐧᒋᐢᑐᓂᐊᐧᐠ; ᒫᑲ ᐃᐧᔭ ᐃᔨᓂᐃᐧᑯᓯᓵᐣ, ᓇᒪᐃᐧᔭ ᐊᔮᐤ ᐃᑕ ᑫ ᐃᓯ ᐊᐢᐱᐢᑫᐧᓯᒧᐟ.
[59] ᑯᑕᑲ ᒫᑲ ᑭ ᐃᑌᐤ, ᐱᒥᑎᓴᐦᐅᐣ, ᒫᑲ ᑭ ᐃᑌᐧᔨᐊᐧ, ᑳ ᑎᐯᔨᐦᒋᑫᔭᐣ, ᐸᑭᑎᓇᒪᐃᐧᐣ ᐱᑕ ᑭᑕ ᐃᑐᐦᑌᔮᐣ ᑭᑕ ᓇᐦᐃᓇᐠ ᓄᑖᐃᐧ.
[60] ᒋᓴᐢ ᒫᑲ ᑭ ᐃᑌᐤ, ᓇᑲᓯᐠ ᑳ ᓂᐱᒋᐠ ᑭᑕ ᓇᐃᓈᒋᐠ ᐅᓂᐳᒥᐋᐧᐊᐧ; ᒫᑲ ᐃᐧᔭ ᑭᔭ ᒥᓯᐁᐧ ᓇᑕᐃᐧ ᐊᑐᑕ ᐅᐟ ᐅᑌᓇᐃᐧᐃᐧᐣ ᑭᓭᒪᓂᑐ.
[61] ᑯᑕᑲ ᒥᓇ ᑭ ᐃᑌᐧᔨᐊᐧ, ᑳ ᑎᐯᔨᐦᒋᑫᔭᐣ, ᑭ ᑲ ᐱᒥᑎᓴᐦᐅᑎᐣ; ᒫᑲ ᐱᑕ ᐸᑭᑎᓂᐣ ᑭᑕ ᓇᑕᐃᐧ ᐊᑕᒥᐢᑲᐊᐧᑭᐠ ᐊᓂᑭ ᑳ ᐊᔮᒋᐠ ᓂᑭᕽ.
[62] ᒫᑲ ᒋᓴᐢ ᑭ ᐃᑌᐤ, ᓇᒪᐃᐧᔭ ᐊᐃᐧᔭᐠ ᐊᔨᓯᔨᓂᐤ ᑳ ᐹᐦᑲᒋ ᐅᑎᑎᓇᑭ ᐱᑯᐱᒋᑲᐣ, ᐋᐸᓴᐱᒋ ᒫᑲ, ᑌᐱ ᐃᐢᐱᑌᔨᑖᑯᓯᐢᑕᑦ ᑭᓭᒪᓂᑐ ᐅᐟ ᐅᑌᓇᐃᐧᐃᐧᐣ.